Read Awing Akyaʼəmə́nuə 13 Bible Online

Akyaʼəmə́nuə 13 - Awing bible

Akyaʼəmə́nuə 13

¹Maŋ tíʼ ńjɨ́ na nəyeŋə́ fɛ́lə á mə́m nə́ənə, ə́ kə túg məndɔ́ŋ mɛ́n nəghə́m nə́ ətû pɛ́n asaambɛ̂; á ndu ndɔ́ŋ əjǐ ntsəm lɛ nəfoonə a chî ə́wə́. A ndumə atûə ajíə atsəm pə́ kə ŋwaʼlə̂ əlɛ́n ə́wɨ́ páʼ wɨ́d zɔmtə̂ nə́ Əsê.

²Na məyeŋə́ maŋ kə zɨ́ nə́ lə́ mbɨ əjǐ kə́ ńchî lə́ ándó yə afunə́, ńtúg məko mə́ fáŋkə ńkə́ ńtúg mənoŋə ándó mimə́ ambǒnə, ntso yí chîə ándó yi sáambaŋə. Satanə á tíʼ fɛ̂ mətɨ mí, pó aləŋə nəfoonə ají nə́ mətɨ mí mimə tə ndɛdtə

³Táʼə atûə na nəyeŋə́ wə́ yitsə̌ á kə́ ńchîə pə́ ándó pə́ kə néŋə mɛ́ nəfəŋ ə́wə́, lə́ mɛ́ nəfəŋ yi wə́ á kə pə́ ńjúmə. Anu yəwə́ a tsɛ mbî ntsəm pó tíʼə ńdzoŋə̂ na nəyeŋə́ zə̂.

⁴Ŋwu ntsəmə á ghóʼkə Satan wə́ ńté ńgə́ a fɛ̂ mətɨ míə á mbô na nəyeŋə́ zə́. Pö ghóʼkə na nəyeŋə́ zə́ ə́sóŋə ńgə́, “Lə́ əwə a chî nə́ ándó na nəyeŋə́ zə̂? Lə́ əwə mbɔʼ á póʼnə pó yə́?”

⁵Pə́ kə mɛdtə̂ na nəyeŋə́ zɨ ńgə́ a tíʼ ńkɔ́ʼkə mbɨ əjï ə́sóŋə mənu páʼ mə̈ zɔ nə́ Əsê, pə́ kə kə́ mɛdtə̂ yí ńgə́ a túg mətɨ tə ńkoʼ sáŋ məghə́m mɛ́n nəkwa nə́ sáŋ pɛ̌.

⁶Á chúʼə mə́ zɔ nə́ Əsê, ńdzɔ əlɛ́n əyí pó aliʼ páʼ a chî nə́ ə́wə́, ndzoŋ ḿbegə̂ ŋwu ntsəm ə́wɨ́ páʼ a chî nə́ á nəpóolə.

⁷Pə́ kə kə́ ḿmɛdtə̂ yí ńgə́ a mmaʼntso pópə pɨ pə́ Əsê ńtíʼ ńtsɛɛlə̂ ághóobə́. Pə́ kə kə́ fɛ̂ mətəənə á mbô yə́ á ndu əla ətsəmə, ətú ətsəmə, ətsáb ətú ətsəmə, ndzoŋ ḿbá ngwud ŋwu məsɔŋ ətsəmə.

⁸Ŋwu ntsəmə a chî nə́ á ndu mbî a yǒ ghóʼkə zə́ələ́. Tə ńdéʼtə pəənə ándó pə́ kə ŋwaʼlə̂ nə́ əlɛ́n əghɔ́b nə́ aŋwaʼlə záʼ pə́ yǒ ḿbɔŋə́ tsoŋkə̂ mbî lə́. Pə́ kə ŋwaʼlə̂ lə́ nə́ aŋwaʼlə nchîmbî á pə́ nə́ yə Mɔ́ Mbéŋ ndzɛd pə́ kə jwítə nə́ lə́.

⁹Mbɔʼ ŋwu ntsəmə a túg nə́ mətôglə a zóʼə.

¹⁰Təmbɔʼ pə́ chîə mə́ wam nə́ ŋwu tsə̌ ándó apoʼə́ntso pə́ yǐ ńgwaamə̂ yə́. Ŋwu ntsəmə a ándó pə́ chî nə́ mə́ jwítə nə yí nə́ ŋwíŋ ntso, pə́ yǐ kə́ jwítə yi lə́ nə ŋwíŋ ntsoolə. Zəənə́ ä sóŋə á mbô pɨ pə́ Əsê lə́ ńgə́ pó túgə asəgə́ntɨ́ pópə mbimə́.

¹¹Maŋ tíʼ ńdzə́ənə yitsə̌ na məyeŋə́ páʼ zɨ́d fɛ́d nə́ á ndəsê; ə́ kə túg məndɔ́ŋ mɛ́n mbɛ̌ ándó mimə mɔ́ mbéŋ ndzɛlə, ḿbə́ ńtséebə ándó Satanə.

¹²A túg mətəənə á mə́ sóŋ nə́ mənu pə́ faʼə̂ ándó ntsɛɛmbi na nəyeŋə́ zə́ á mbi yə́. A ghɛd mbî pópə ajúmə atsəm wɨ́ ghóʼkə ntsɛɛmbi na nəyeŋə́ zə̂, páʼ mɛ́ nəfəŋ əyǐ wə́ a kə júm nə́ lə́.

¹³A faʼ pəmɛ́ pə́ əkyeʼmə́nu pipə nɨ́ nə́, ńtûə ńgɛlə̂ móg fɛ́lə á nəpó ńtsóolə á əshîsaŋə ŋwu ntsəmə á zə́ənə.

¹⁴Ńdaŋə̂ ndzəm əkyeʼmə́nu pə́ kə ghɛd nə́ a faʼə̂ á mbi na nəyeŋə́ zə́ lə́, á fɨgə̂ pɨ pətsəm pó chî nə́ ndu mbî, ńgɛd ńgə́ pó kóomə mɔ́pəkɔ́ páʼ a chî nə́ ándó na nəyeŋə́ zə́ páʼ pə́ kə néŋ nə́ nəfəŋ nə́ yí nə́ ŋwíŋ ntso a pə́ ńchî tsɔʼə mbî lə́.

¹⁵Pə́ kə mɛdtə̂ yí ńgə́ a ghɛd mɔ́pəkɔ́ na nəyeŋə́ wə́ a túg nchîmbî ńjî ńgə́ mbɔʼ mɔ́pəkɔ́ yi wə́ a tséebə, ńkə́ ńchî mbɔʼ a jwítə ŋwu páʼ a kě nə́ yí tə́ ńgóʼkə pô.

¹⁶Na nəyeŋə́ zə́ ə́ kə́ něe ŋwu ntsəm kəənə a pə́ mɛ́ ŋwu kɨ mɔ́ kə́nyaŋ, əfoʼ kɨ mbóŋ, apoʼ kɨ ŋwunə a chî nə́ ngǎ yí ńgə́ mbɔʼ pó túgə aleŋkə apô pó yə tɨ kəənə á mbîə atû pó.

¹⁷Mbɔʼ ŋwu tsə̌ a kə kě júnə ajú kɨ fi tə ghə́ a túgə aleŋkə zɨ pô, zɨ́d lə́ kə pə́ əlɛ́n na yi wɨ́ kɨ ajú pə́ sháŋ nə́ tə ńkoʼ ə́wə́ á tə́ nəələ̂ ńgə́ lə́ əlɛ́n na yi wə́.

¹⁸Zəənə́ á nəələ̂ ńgə́ ŋwunə á túgə ayáŋə. Ŋwu ntsəmə a túg nə́ ajíənu mbɔʼ a jîə ajú páʼ pə́ sháŋ nə́ ntɨ́ ə́wɨ́, á tə́ nɨd əlɛ́n na nəyeŋə́ zəənə́. Ńté ńgə́ pə́ sháŋ ńgɛn ńkoʼ nə́ ndɛn yi wə́ á tə́ nəələ̂ lə́ əlɛ́n ŋwu mbîə. Pə́ sháŋ ńkoʼ lə́ nə́ nkɛd ntogə́ nə́ məghə́m mɛ́n ntogə́ nə́ ntogə́.