Read Awing Akyaʼəmə́nuə 14 Bible Online

Akyaʼəmə́nuə 14 - Awing bible

Akyaʼəmə́nuə 14

¹Əghâ yi wɨ́, maŋ náŋ ńtíʼ ńdzə́ənə Mɔ́ mbéŋ ndzɛlə á tə́əmə á ndu nkwəənə Zayɔn; a nə ńchî ə́wɨ́ lə́ pópə pɨ táʼ nkɛd nə́ məghə́m mɛ́n nəkwa ńchúʼ tɔsə nəkwa, pə́ nə ŋwaʼlə̂ əlɛ́n əyí pó yi Tǎ əyǐə á nəzeŋnə́ pó.

²Maŋ tíʼ ńdzóʼ ngye yitsə̌ ə́ fɛ́lə nəpóolə ándó ngye mənkǐ mimə nɨ́ nə́ mə́ tə́ nə́ ńdzoolə̂, ńkə́ ḿbɨ ńchîə ándó ngye tə́kɔʼ nəfaŋə, ngye maŋ nə ńdzóʼ nə́ lə́ ə́ kə chîə ándó ngye ngaŋə́póʼə́pɛ́n pó póʼ nə́ əpúmə apɛ́n əpɔ́b pə́ fóŋ nə́ nə́ məloŋ mə́ məŋkɛlə́.

³Pɨ pɨ táʼ nkɛd nə́ məghə́m mɛ́n nəkwa ńchúʼ tɔsə nəkwa tíʼə ńdzɔb nkǐ yi fî yitsə̌ á mbiə aləŋənə́fɔ, á mbi məna mə́ mɛ́n nəkwa ńdzoŋ ḿbá mətû mə́. Təmbɔʼ ŋwu tsə̌ a nə ńkě nkǐ yi wɨ́ zéʼ pô tə ńdéʼtə pɨ 144,000 páʼ Əsê a nə ńtsóʼ nə́ atûə azóobə́ á ndu mbî lə́.

⁴Lə́ pɨ pɨ páʼ pó nə ńdɔʼkə̂ nə́ mbɨ əzɔb ə́ ŋwaʼ ńkě kéelə ńdzɔ́ʼ ndzɔʼə́ mbǒʼḿbóʼ pópə pəngyě pô; pó kě anuə pəngyě jî pô. Pö zoŋə̂ Mɔ́ Mbéŋ Ndzɛd wə́ aliʼə́ atsəm páʼ á ghɛn nə́ ə́wə́. Lə́ pɨ páʼ Əsê a nə ńtsóʼ nə́ atûə azóobə́ á mə́m pɨ pə́ mbî pó tíʼ ńchîə ándó ntsɛɛmbi nənta nə́ atǐ pə́ fɛ̂ nə́ á mbô Əsê pó Mɔ́ Mbéŋ ndzɛd wə́.

⁵Pó nə ńkě ntsɨd kə́ láʼə tsəələ̂ pô; pó nə ńkě awǔənu yətsə́ túg pô.[67]

⁶Maŋ tíʼ ńdzə́ənə táʼ ntseŋndɛ̂sê wə́ yitsə̌ a tə́ ńdzagə̂ chigə atǐə, a nə ńtúg Nkɨ Əsê yi əshîʼnə wə́ páʼ wɨ́d mɛdnə̂, á mə́ fɛ̂ nə́ á mbô pɨ pó chî nə́ á ndu mbîə, á mbô ətú ətsəmə, əla ətsəm, ətsáb ətsəmə ńtíʼ ḿbá ntê ŋwu məsɔŋ ntsəmə.

⁷A tsáb nə́ tə́kɔʼ ngye ə́sóŋ ńgə́, “Pɔ́g Əsê ńkə́ fɛ̂ nəgháʼ əyǐə; ńté ńgə́ ndɛd ə́ koʼə̂ á mbô yə́ á mə́ tsɔ́ʼtə nə́ əsáʼ pɨ pə́ mbîə; ghóʼkə nə́ yí páʼ a tsoŋkə̂ nə́ nəpó pó mbî nə́ nə́ənə, ńdzoŋ ḿbə́ nə́ mənkǐ páʼ mə́ sáʼ nə́ əsê!”

⁸Yitsə̌ ntseŋndɛ̂sê páʼ a zoŋkə̂ nə́ yi ntsɛɛmbiə, a zoŋə̂ ə́sóŋ ńgə́, “A wǔəə, Babilɔn páʼ á pə́ nə́ tə́kɔʼə aláʼə a wǔəə, a nə fɛ̂ məloʼ míə á mbô ŋwu ntsəm ńtíʼ ńgɛd pó nô mə́ələ́, məloʼ mimə tyantə̂ nə́ páʼ mɨ́d mə́ nə ńgɛd nə́ pó zɔ́ʼ ndzɔʼə́ tə apímnə!”[68]

⁹Yitsə̌ ntseŋndɛ̂sê páʼ a kə́ nə́ ḿbɨ ńdzoŋkə̂ pɛ́n pɛ̌ pə́, ä zoŋə̂ sóŋə nə́ tə́kɔʼ ngye ńgə́, “Ŋwu ntsəm páʼ a ghóʼkə nə́ na nəyeŋə́ zə́ pó móonə akɔ́ yi ńkə́ ńkwáalə aleŋkə ajíə á nəzeŋnə́ yí kəənə apô yí,

¹⁰yí nə́ nkɔ̌ʼmbɨ yí á yǒ nô məloʼ mə́ azáŋə́ndé Əsê, páʼ pə́ kwɛd nə́ mə́ələ́ á mə́m ndɔ́ŋə azáŋə́ndé Əsê nə́ mətəənə. Á mbi pətseŋpə́ndɛ́pə́sê pí pipə ŋwaʼ nə pó Mɔ́ Mbéŋ Ndzɛd wə́, pó yǒ zɨ́ ngə́ʼə á mə́m móg ə́ kə́ zɨ́ ngə́ʼə á mə́mə ajûtsə́ páʼ á kɛ́d nə́ móg əyí chîə ándó mbəəmə amúʼ yə paŋ nə́.

¹¹Ndíʼ móg páʼ ə́ kə tsaŋkə̂ nə́ ághɔ́b ə́ nə ńkɔ́ʼə lə́ əghâ ətsəm ńdáʼ ńkě měe pô; pɨ pɨ páʼ pó nə ńgóʼkə nə́ na nəyeŋə́ zə́ kəənə mɔ́pəkɔ́ əyǐ pó nə̈ ńkě jwitə̂ pô, kəənə nətúʼ kɨ nənumnə, ńdzoŋ ḿbegə̂ ŋwu ntsəm páʼ a nə ńkwá nə́ aleŋkə əlɛ́n yə́.”[69]

¹²Anu zəənə́ a nə ńchî lə́ á mə́ sóŋ nə́ á mbô pɨ pə́ Əsê ńgə́ pó túgə asəgə́ndzɔʼə, pɨ pó zóʼnə nə́ məntəgə́ mə́ Əsê ńkə́ ńtúg mbimə́ nə́ Yeso.

¹³Maŋ tíʼ ńdzóʼ ngye ə́ fɛ́lə á nəpö ə́sóŋə ńgə́, “Ŋwaʼlə̂ zəənə́: Nə́ pə əghâ nə́, mbɔŋə lə́ yə pɨ páʼ pó kwû nə́ á mə́m Mmaʼmbîə!” Ajwiə á sóŋ ńgə́, “Lə ndə̌ŋdəŋə́, pó yǐ jwitə̂ á mə́m məfaʼ móobə́, məfaʼ mɔ́b mimə əshîʼnə mə́ yǐ zoŋə̂ ághóobə́.”

¹⁴Maŋ tíʼ ńnáŋ ńdzə́ənə fúfúə alə́mə, á ndu fúfúə alə́m wə́ ajûtsə́ a náanə ə́wə́ ándó Mɔ́ ŋwunə, ńgwê lɛ nəfɔ pə́ tsoŋkə̂ nə́ nə́ gôlə á atû yí ḿbɨ ńtúg ŋwíŋə́ afoʼəmə́jîə á mbô yə́.

¹⁵Yitsə̌ ntseŋndɛ̂sê a pɨ ńkə́ ə́fɛ́lə á mə́m tə́kɔʼndɛ̂sê, ńtíʼ ə́fóŋə yi páʼ a náanə nə́ á ndumə alə́m zə́ nə́ tə́kɔʼ ngye ə́sóŋ ńgə́, “Lɔg ŋwíŋə́ afoʼəmə́jî əzo zə́ ə́foʼ məjî wɨ́ ńté ńgə́ ndɛlə́ afoʼəmə́jî ə́ koʼə̂, ńté ńgə́ məjî mə́ ndu mbî mə́ chígə́ ńtəənə̂.”

¹⁶Yi páʼ a nə náanə nə́ á ndumə alə́m zə́ a meg ŋwíŋə́ afoʼəmə́jî əjǐə á ndu mbî ńtíʼ foʼ məjî mə́ ndu mbîə.

¹⁷Əghâ yi wɨ́ maŋ pɨ ńdzə́ənə yitsə̌ ntseŋndɛ̂sê a fɛ́lə á mə́m tə́kɔʼndɛ̂sê á nəpóolə, a kə́ ḿbɨ ńtúg əjǐ ŋwíŋə́ afoʼəmə́jî yi ńtsə́g nə́.

¹⁸Yitsə̌ ntseŋndɛ̂sê páʼ a nə̈ ńdɔg nə́ ndɛd nə́ móg, a fɛ́lə á nəpéenə, ńtíʼ ńtɔ́ŋnə nə́ tə́kɔʼ ngye á mbô yitsə̌ ntseŋndɛ̂sê wə́ páʼ a nə ńtúg nə́ ŋwíŋə́ afoʼəmə́jî yi ńtsə́g nə́ lə́ ə́sóŋ ńgə́, “Lɔg ŋwíŋə́ afoʼəmə́jî əzo zə́ ńkə́ʼ mənta mə́ glebə á mə́m nkáʼ pə́ pi nə́ gleb wə́, ńté ńgə́ mənta mə́ gleb mə́ təənə̂!”

¹⁹Ntseŋndɛ̂sê a tíʼ meg ŋwíŋ əjǐə á ndu mbî, ńdə́gtə mənta mə́ glebə á mə́m məfag ńtíʼ ḿmaʼə̂ á mə́mə apɛ́d pə́ tsoŋkə̂ nə́ məloʼ wɨ́, páʼ á pə́ nə́ azáŋə́ndé Əsê.

²⁰Pə́ nə ńkyám mənta mə́ gleb mimə ə́wə́ á mə́mə apɛ́lə məloʼ á kə chî nə́ ndzəmə apeŋ tə́kɔʼ tɔ̂ŋ, achǐə a tíʼ ə́fɛ́lə á mə́mə apɛ́lə məloʼ zə́ ńkóŋ nyi ńkoʼə̂ ándó pəmad nkɛd pɛ̌ ḿbɨ ə́shǐəə ándó táʼ meta nə́ akəmə.