Read Awing Akyaʼəmə́nuə 15 Bible Online

Akyaʼəmə́nuə 15 - Awing bible

Akyaʼəmə́nuə 15

¹Maŋ tíʼ ńdzə́ənə tə́kɔʼ nkɨʼnə akyeʼə́nu yitsə̌ nəpóolə. Maŋ zɨ́ Pətseŋpə́ndɛ́pə́sê pɛ́n asaambɛ̂ pó túg əpúmə́tsəŋkə ŋwu məsɔŋ asaambɛ̂ páʼ pɨ́d pə́ nə́ pi ndwigtə ńté ńgə́ lə́ nə ḿbə́ ndwigtə ndúmə á mə́ nɨd nə́ azáŋə́ndé Əsê.

²Maŋ tíʼ ńdzə́ənə ajûtsə́ páʼ á fî nə́ nə́ənə, ńchîə ándó akyaʼə́shîə, ńgwɛdnə̂ nə́ mógə́. Maŋ kə́ ḿbɨ ńdzɨ́ pɨ páʼ pó nə maʼ nə́ ntso ńtsɛ na nəyeŋ zə̂ pó móonə akɔ́ əyǐə, ńkə́ ḿbɨ ńtsɛɛlə̂ yitsə̌ ŋwu páʼ əlɛ́n yí nə ḿbə́ nə́ nɔmba. Pó nə ńtɨ́ ḿbáatə nə́ənə a kə chî nə́ ándó akyaʼə́shî lə́, ńtúg məloŋ mə́ məŋkɛd páʼ Əsê a fɛ̂ nə́ á mbô pó.

³Pó nə ńtə́ ńdzɔb nkǐ Mosisə a pə́ nə́ ngaŋəfaʼ Əsê ḿbɨ ḿbə́ nə́ nkǐ Mɔ́ Mbéŋ ndzɛd wə̈, ə́sóŋə ńgə́: “Əsê páʼ a pə́ nə́ Mmaʼmbî, ńtsɛɛlə̂ ajúmə atsəmə, gho faʼə̂ chigə pətə́kɔʼ pə́ mənu mimə yɛ́d nə́ yɛ́d nə́. Əfo mbî ntsəm, gho faʼə̂ mənu mətsəm lə́ nə́ ndú páʼ ə́ koʼnə̂ nə́ ńkə́ ńtɨ́ ndə̌ŋdəŋə́.

⁴Mmaʼmbî, əwə a kě nə́ ghö pɔ́gə ńkě nəgháʼ nə́ əlɛ́n əgho kə̈ fɛ̂? Lə́ tsɔʼə gho páʼ gho ŋwaʼ nə́. Ətú ətsəm ə́ yǒ yǐ ghóʼkə gho, ńté ńgə́ ndə̌ŋdəŋə́ afaʼ əgho á fɛ́lə á əshîsaŋə.”

⁵Ndzaŋə ándó zəənə́ a nə ńdaŋ nə́ lə́, maŋ zə́ənə tə́kɔʼndɛ̂sê á nəpóolə á ŋáʼnə, Ntaŋ yi Ŋwaʼ nə́ wə́ ə́ chîə á mə́m ə́wə́.

⁶Əghâ yi wɨ́ pətseŋpə́ndɛ́pə́sê pə́ pɛn asaambɛ̂ páʼ pó túg nə́ əpúmə́tsəŋkə ŋwu məsɔŋ pə́ asaambɛ̂ lə́ pó fɛ́lə á mə́m tə́kɔʼndɛ̂sê, pó nə ńgwê pəfúfú pə́ ətsəʼ pi ŋwaʼ nə́ pi ŋwaŋkə̂ nə́, ńtíʼ ńkwúd ətwéŋ páʼ pə́ tsoŋkə̂ nə́ nə́ gôlə á ghaŋ pó.

⁷Táʼə á mə́m məna mə́ mɛ́n nəkwa mə́ chî nə́ á mbî lə́, zɨ́d fɛ̂ əkáŋ páʼ pə́ tsoŋkə̂ nə́ nə́ gôlə pɛn asaambɛ̂ páʼ ə́ nə ńdwɛ́nkə nə́ nə́ azáŋə́ndé Əsê, ə́ fɛ̂ á mbô pətseŋpə́ndɛ̂ pə́ asaambɛ̂ páʼ pó chî nə́ ḿmɛdnə̂ lə́.

⁸Tə́kɔʼndɛ̂sê a nə ńdwɛ́nkə nə́ ndíʼ páʼ ə́ nə ḿbə́ nə́ lə́ nəgháʼ pó mətɨ mə́ Əsê. Ŋwu tsə̌ a nə ńkě ə́wɨ́ chî təmbɔʼ a nə ńkwúnə tə́kɔʼndɛ̂sê tə ńkoʼə̂ á əghâ əpúmə́tsəŋkə ŋwu məsɔŋ pə́ pɛ́n asaambɛ̂ ə́ měe nə́, əpú páʼ pətseŋpə́ndɛ̂ pə́ pɛ́n asaambɛ̂ kə yǐ nə́ nə́ pɨd lə́.