Read Awing Akyaʼəmə́nuə 16 Bible Online

Akyaʼəmə́nuə 16 - Awing bible

Akyaʼəmə́nuə 16

¹Maŋ tíʼ ńdzóʼ tə́kɔʼ ngye yitsə̌ á fɛ́lə á mə́m tə́kɔʼndɛ̂sê ə́sóŋ nə́ pətseŋpə́ndɛ́pə́sê pə́ pɛn asaambɛ̂ ńgə́, “Ghɛn nə́ ńkwɛd əkáŋ pə́ páʼ ə́ túg nə́ azáŋə́ndé Əsê pɛn asaambɛ̂ lə́ á ndu mbîə!”

²Ntsɛɛmbi ntseŋndɛ̂sê a tíʼ ńgɛn ńkwɛlə̂ ajíə akáŋ páʼ á túg nə́ azáŋə́ndé Əsê lə́ á ndu mbîə. Mbô məfəŋ yitsə̌ ḿbyádnə ńdzáŋə ə́ tíʼ ə́fɛ́dkə a mbɨ pɨ páʼ pó kə túg nə́ aleŋkə na nəyeŋə́ zə̂, ńkə́ ńgóʼkə móonə akɔ́ əyǐ lə́.

³Ntseŋndɛ̂sê páʼ a nə ńdzoŋkə̂ nə́ yi ntsɛɛmbi wə́ lə́, a kwɛlə̂ ajíə ashǎdnə akáŋ zə̂ á mə́m nə́ənə, nkǐ tíʼ ə́sɛdnə̂ ńchîə ándó achǐə akwûə ŋwunə, ńdaŋ ə́lɨ́d ajúmə atsəm á mə́m nɨ́ páʼ á túg nə́ nchîmbîə á kwúkə.

⁴Yitsə̌ ntseŋndɛ̂sê páʼ a nə ńdzoŋkə̂ nə́ pɛ́n pɛ̌ lə́ a tíʼ ńkwɛlə̂ ajíə akáŋə á mə́m pətə́kɔʼ pə́ nkǐ pó pəsáʼə́sê nkǐə, mənkǐ mimə wɨ́ mə́ tíʼ ə́sɛlə̂ achǐə.

⁵Maŋ tíʼ ńdzóʼ ntseŋndɛ̂sê páʼ ä náŋ nə́ mənkǐ lə́ a sóŋ ńgə́, “Gho tɨ́ ndə̌ŋdəŋə́ á mə́m məsáʼ mi páʼ gho tsɔ́ʼtə nə́ lə́, gho páʼ gho chî nə́ ə́wə́, páʼ gho nə ḿbeg nə́ ńkə́ ńchî ə́wə́, gho Ŋwaʼə̂.

⁶Ńté ńgə́ pə́ kə kwɛlə̂ achǐə pɨ pô, pópə yə məntú mô, gho pɛn ńkə́ ə́fɛ̂ achǐə á mbô pó ńgə́ pó nô, lə́ ngə́ʼ páʼ pó lɔ nə́ páʼ ə́ koʼnə̂ nə́ á mbô pó!”

⁷Maŋ zóʼ ngye fɛ́lə á nəpá nə́ Əsê ə́sóŋ ńgə́, “Mmaʼmbîə á pə́ nə́ Əsê páʼ ə́ tsɛ nə́ ajúmə atsəm, gho tsɔ́ʼtə əsáʼ nə́ ndú páʼ ə́ tɨ́ nə́ ndə̌ŋdəŋ ńkə́ ńkoʼnə̂!”

⁸Yitsə̌ ntseŋndɛ̂sê páʼ a zoŋkə̂ nə́ pɛ́n teelə́ pə̂ a kwɛlə̂ ajíə akáŋə á mə́m mə́numə, ə́fɛ̂ mətɨ nə́ mə́nu á tɔ pɨ nə́ mógə́.

⁹Atyǎntə ajúʼə móg yəwə́ á kə toonə̂ ághóobə́, pó tíʼ ńdzɔmtə̂ əlɛ́n Əsê páʼ a túg nə́ mətəənə á mə́ yǐ nə́ nə́ əpúmə́tsəŋkə ŋwu məsɔŋ pəənə́, ḿbə́ ńkě məntɨ́ mɔ́b kwúblə ə́fɛ́lə á mə́m pətəpɔŋ pɔ́b ńtíʼ əfɛ̂ nəgháʼə á mbô Əsê pô.

¹⁰Yitsə̌ ntseŋndɛ̂sê páʼ a zoŋkə̂ pɛ́n nəkwa lə́ a kwɛlə̂ ajíə akáŋ zə̂ á aləŋənə́fɔ nə́ na nəyeŋə́ zə̂. Ndzəmə ə́ wǔəə á mə́mə aliʼə́ nəfoonə na nəyeŋə́ zə̂, pɨ pə́ tíʼə ńkɔ́d əlɨ́ əpɔ́b ńté ngə́ʼ pó nə ńchî nə́ á mə́m ə́wə́,[70]

¹¹ńtíʼə ńdzɔmtə̂ Əsê páʼ ə́ chî nə́ á nəpó ńté əliʼnə́záŋ pópə məfəŋ páʼ pó nə ńtúg nə́, lə́ ḿbə́ ńkǐə ághóobə́ á mə́ kwúblə nə́ məntɨ́ mɔ́b ə́fɛ́lə á mə́m pətəpɔŋ pó nə̈ ńgɛd nə́.

¹²Ntseŋndɛ̂sê páʼ a zoŋkə̂ nə́ pɛ́n tâ lə́ a kwɛlə̂ ajíə akáŋə á mə́m mɛ́ tə́kɔʼ nkǐ Ufeletisə, nkǐ wə́ ə́ júmə, á mə́ tsoŋkə̂ nə́ ndúmə á mbô pəfo pó yǐ nə́ ə́fɛ́lə á ndú mə́numə á sáʼ nə́ ə́wə́.[71]

¹³Əghâ yi wɨ́ maŋ tíʼ ńdzɨ́ əjwi təpɔŋ pɛ́n teelə́ pɨd chîə ándó pəmə́túʼə́, pɨ́d fɛ́lə a ntso Satan, ńkə́ ə́fɛ́lə a ntso na nəyeŋə́ zə́ ńkə́ ḿbɨ ə́fɛ́lə a ntso məntú mə́ əsê mə́ məfɨgə.

¹⁴Ńté ńgə́ pó lə́ əjwi pɛ̌sê páʼ pö faʼ nə́ əkyeʼmə́nuə. Əjwi pɨ pɛ́n teelə́ ə́ fɛ́d ńgɛnə̂ á mbô pəfo pə́ mbî pətsəmə, á mə́ tsɛntə̂ nə́ ághɔ́b táʼ aliʼ pó póʼnə ntsoolə á tə́kɔʼ alěmbîə Əsê, Əsê páʼ a tsɛ nə́ ajúmə atsəmə.

¹⁵“Yeso á sóŋ ńgə́, Jwə́ʼtə nə́! Maŋ yǐ lə́ ándó ndzə̌lə! Lə́ a pɔŋə́ yə ŋwu páʼ a kě nə́ tə́ ńdê pô ńtə́ ńdɔg ndɛd nə́ ətsəʼ pí ńjî ńgə́ kɔ a yǐ ńnyi ntə̌blə əsɨ́ ə́ tə́ ńkóolə yə́ á əshîsaŋə!”[72]

¹⁶Lə́, əjwi pə̂ ə́ tíʼ ńgyǐ nə́ pəfo pətsəmə aliʼ pə́ fóŋ nə́ nə́ atséebə Iblu ńgə́ Amagedon.[73]

¹⁷Ntseŋndɛ̂sê páʼ a zoŋ nə́ pɛ́n ntogə́ a kwɛlə̂ ajíə akáŋ zə́ á atǐə á mə́m əfə́gə: tə́kɔʼ ngye á fɛ́lə á aləŋənə́foonə á mə́m tə́kɔʼndɛ̂sê ə́sóŋ ńgə́, “Pə́ faʼə̂!”

¹⁸Maŋ tíʼ ńdzɨ́ nəfaŋ nə́ ŋwaŋkə̂, ńdzoolə̂ ńtíʼə sáʼkə, ndəsê tíʼ ńchígə́ ńchiʼnə̂. Ə́fɛ́lə ándó Əsê a nə tsoŋkə̂ nə́ ŋwu ndəsê ə́ nə ńkě nə́ ndú wɨ́d wə́ kə́ chiʼnə̂ pô. Ndú ghɛn páʼ ndəsê ə́ nə ńchiʼnə̂ nə́ ə́wɨ́ lə́ ə́ nə ńtyantə̂ ńtsɛ ndú ətsəmə.

¹⁹Mɛ́ tə́kɔʼ tɔ̂ŋə a nə ńgabnə̂ əpag teelə́, pətɔ̂ŋ pə́ ətú ətsəm pə́ shaʼkə̂, Əsê a wə́ʼtə mɛ́ tə́kɔʼ tɔ̂ŋ Babilɔnə, ńtíʼ ńgɛd á nô məloʼə á mə́m ndɔ́ŋ əjǐə, məloʼ mə́ tə́kɔʼ azáŋə́ndé əyíə.[74]

²⁰Pəkyádkənkǐ pətsəm pə́ péŋkə, məŋnkwəənə mətsəm mə́ kə́ ḿbéŋkə.[75]

²¹Pəmɛ́ pə́ məwəŋ, táʼə á lɛlə̂ ándó kilo məghə́m mɛ́n tâ, mə́ lookə̂ á nəpó ńtíʼə ńgwukə̂ á ndu pəənə. Pɨ pó tíʼə ńdzɔmtə̂ Əsê ńté məwəŋ á lɔg nə́ ńtsəŋkə̂ ŋwu məsɔŋ wə́.[76]