Read Awing Akyaʼəmə́nuə 17 Bible Online

Akyaʼəmə́nuə 17 - Awing bible

Akyaʼəmə́nuə 17

¹Əghâ yi wɨ́ lə́ táʼ ntseŋndɛ̂sê á mə́m pətseŋpə́ndɛ́pə́sê pə̂ pɛ́n asaambɛ̂ páʼ a nə ńtúg nə́ əshǎdnə əkáŋ pə́ asaambɛ̂, a yǐəə á mbô maŋ ə́sóŋ ńgə́, “Yǐəə, Maŋ yǐ nəələ̂ gho ndzaŋ pə́ yǐ nə́ néŋ ngə́ʼə á atû tə́kɔʼə akwɛlə məngyě wə́, lə́ tə́kɔʼ tɔ̂ŋ páʼ pə́ kwúd nə́ ḿbáatə mənkǐ mimə nɨ́ nə́.[77]

²Pəfo pə́ ndu mbî pó zɔ́ʼ ndzɔʼə́ tə apímnə pópə tə́kɔʼ akwɛlə məngyě wə̂, pɨ pə́ mbî pó tíʼ nô məloʼ mə́ məngyě wə́ ḿbɛ́ ńtíʼə ńdzɔ́ʼ ndzɔʼə́ tə apímnə əjǐə.”[78]

³Ajwǐəsê a tíʼ ńgyǐəə á mbɨ maŋə, ntseŋndɛ̂sê a twáamə mə ńgɛnə̂ á kɔŋ məŋkwâʼlə̌. Ə́wɨ́ maŋ zə́ənə məngyě a náanə á ndu paŋpaŋ na nəyeŋə́, páʼ ə́ túg nə́ məlɛ́n pə́ ŋwaʼlə̂ nə́ á mbɨ yí ntsəm ńdzɔmtə̂ Əsê. Na nəyeŋə́ yi wɨ́ ə́ túg ətû pɛ́n asaambɛ̂ nə́ məndɔ́ŋ mɛ́n nəghə́mə.

⁴Məngyě yi wɨ́ a nə ńgwê paŋpaŋə atsəʼə́ nkéebə, mbɨ əjǐ ntsəm pə́ nə ńkə́bkə nə́ əpú pə́ tsoŋkə̂ nə́ nə́ gôlə, nə́ ngɔʼ ə́ səglə̂ nə́ ŋ́ŋwaŋkə̂, ḿbɨ ḿbə́ nə́ əpú pi səglə̂ nə́. A nə ńtúg ndɔ́ŋ yitsə̌ á mbô yí páʼ pə́ nə ńtsoŋkə̂ nə́ nə́ gôlə, páʼ ntê ndɔtíə anu ntsəm ə́ nə ńchî nə́ ə́wɨ́ ńté afaʼə akwɛlə ajíə.

⁵Əlɛ́n yitsə̌ nə ńchîə á nəzeŋnə́ yi páʼ pə́ nə ńkě nə́ anu páʼ wɨ́d söŋ nə́ jî pô. Pə́ ŋwaʼlə̂ ńgə́ “Atyǎntə Babilɔn, mǎpə əkwɛlə atsəmə, mǎ páʼ a yǐ nə́ nə́ ndɔtí mənu mətsəmə á mə́m mbîə.”

⁶Maŋ tíʼ ńdzɨ́ ńgə́ məngyě yi wə́ a nô achǐ ḿbɛ́ɛlə, achǐə pɨ pə́ Əsê pópə yə pɨ pə́ nə ńjwítə ághɔ́b ńté ńgə́ pó tə́ ńdzoŋ ndzəm Yeso. Əghâ maŋ nə ńdzɨ́ nə́ yí, anu yəwə́ á pyádnə ńkɨʼnə̂ mə.

⁷Ntseŋndɛ̂sê wə́ a pítə mə ńgə́, “Á gho lə́ tsɛɛlə̂ akə̂? Maŋ yǐ fiʼtə̂ gho nə́ anuə nəlyaŋnə́ ńté məngyě wə́ pó na nəyeŋə́ páʼ ə́ nə ńtwá nə́ yə́, na nəyeŋə́ zə́ nə́ ətûə asaambɛ̂ nə́ məndɔ́ŋ mɛ́n nəghə́mə.

⁸Na nəyeŋə́ gho nə ńdzɨ́ nə́ lə́, ə́ nə ḿbɛ́dtə ńchîə á mbîə, lə́ ə́ pɛn kě á mbî pɛ́d pô! ə́ chîə á mə́ fɛ́d nə́ á mə́mə atéemə́təndwegtə zə́ ə́ kɔ́ʼ pə́ tíʼ ńtsəŋkə̂ yə́. Pɨ páʼ pó chî nə́ á ndu mbî páʼ pə́ nə ńkě nə́ məlɛ́n mɔ́b ŋwaʼlə̂ á mə́mə aŋwaʼlə nchîmbî, záʼ pə́ pɔŋə̂ yǒ tsoŋkə̂ mbî, á yǒ kɨʼnə̂ ághɔ́b əghâ pó yǒ nə́ zɨ́ na nəyeŋə́ zə́. Ə́ nə ḿbɛ́dtə ńchîə á mbî lə́, nə́ pə́ əghâ nə́ ə́ pɛ́n ńkě á mbî pɨ ńchî pô, lə́ ə́ yǒ pɨ chîə á mbîə.”

⁹“Ńté anu zɨ pɨ pə́ chîə á mə́ túg nə́ ayáŋə, atûə azóobə́ a kə́ ńtsɔ́ʼnə. Ətû pə́ pɛn asaambɛ̂ ə́ tɨ́ lə́ nə́ məmbá mə́ mɛ́n asaambɛ̂ páʼ məngyě yi wə́ a náanə nə́ á ndu ə́wɨ́ Pəfo pə́ kə́ ńchî ə́wɨ́ pɛ́n asaambɛ̂:

¹⁰A mə́m pó asaambɛ̂, pó pɛ́n tâ pó pɛ́dtə ńkwúkə, táʼə a pə́ ḿbɛ́lə nəfoonə, lə́ yitsə̌ táʼə a pə́ ńkě kə̂ yǐəə pô, əghâ páʼ a yǒ nə́ yǐ a yǒ sáʼ nəfɔ lə́ tsɔʼə nə́ mɔ́ akəmə ndɛlə́.

¹¹Na nəyeŋə́ zə́ páʼ ə́ nə ḿbɛ́d nə́ tə ńchîə á mbî ə́ pɛn ńkě ə́wɨ́ pɨ ńchî lə́, a nə ḿbə́ lə́ əfo a zoŋkə̂ nə́ ághóobə́ asaambɛ̂ lə́ nə́ nkɔ̌ʼmbɨ əyí páʼ a nə ńchî nə́ á mə́m pətsə́ pəfo pə́ pɛ́n asaambɛ̂, á ghɛnə̂ lə́ aliʼ pə́ yǐ nə́ tsəŋkə̂ yí ə́wə́.

¹²Məndɔ́ŋ mə́ nəghə́m gho zɨ́ nə́ lə́ mə́ tɨ́ lə́ nə́ pəfo pɛ́n nəghə́m páʼ pó kě nə́ kə́ chwáakə á mə́ sáʼ nə́ nəfɔ pô, lə́ pə́ yǐ pə́ fɛ̂ mətɨ nə́ pó ńgə́ pó sáʼ nəfoonə ándó pəfo pópə na nəyeŋə́ zə́ á mə́m táʼ mə́numə.

¹³Pəfo pɨ pɛ́n nəghə́m pó chî lə́ tsɔʼə nə́ táʼə anuə, pó tíʼ ə́fɛ̂ mətɨ mɔ́b pópə mətɨ pó sáʼ nə́ pɨ wə́ á mbô na nəyeŋə́ zə́.

¹⁴Pó yǒ waamə̂ Mɔ́ Mbéŋ ndzɛd wə́ nə́ məlaʼə́; Mɔ́ mbéŋ ndzɛd wə́ a yǒ tsɛɛlə̂ ághóobə́, pópə pɨ páʼ Əsê a fóŋ nə́ ághóobə́ ńkə́ ńtsɔ́ʼə ághɔ́b pó kə́ ə́faʼə̂ á mbô yí nə́ ntɨ́ əghɔ́b ətsəmə. Pó yǒ tsɛɛlə̂ ághɔ́b ə́ té ńgə́ yí lə́ Mmaʼmbî pəmaʼmbî ńkə́ ḿbə́ əfo pəfo.”

¹⁵Ntseŋndɛ̂sê wə́ a kə́ ḿbɨ ə́sóŋə á mbô maŋ ńgə́, “Mənkǐ páʼ gho nə ńdzɨ́ nə́ məngyě akwɛlə wə́ a náanə ə́wɨ́ lə́, lə́ ətú ətúmə, pəənə, məngwud mə́ ŋwu məsɔŋə́, ḿbɨ ḿbə́ nə́ ətsáb əláʼə.

¹⁶Məndɔ́ŋ mə́ mɛ́n nəghə́m gho nə ńdzɨ́ nə́ ḿbɨ ḿbə́ nə́ na nəyeŋə́ zə́ lə́, pó yǒ peenə̂ məngyě akwɛlə wə́; pó yǒ kwáalə ajúmə atsəm páʼ a túg nə́ ḿmɛdtə̂ yí ntə̌blə; pó yǒ kɔ́d na mbɨ əjǐ ə́ tíʼ tsəŋkə̂ yí nə́ mógə́.

¹⁷Ńté ńgə́ Əsê a nə néŋə á məntɨ́ pó ńgə́, pó kɔŋə̂ á mə́ faʼ nə́ anu páʼ na zə́ lɔ́btə nə́, ńdaŋ ndzaŋ pó faʼ nə́ nə́ táʼə akwaŋ, ńtíʼ ńkə́ fɛ̂ məntɨ́ mɔ́b nə na nəyeŋə́ zə́ ńgə́ á sáʼ nəfɔ wə́, tə ńkoʼ ndɛd atséebə Əsê á yǒ nə́ lɔgə̂ aliʼə́.

¹⁸Məngyě páʼ pɨ nə ńdzɨ́ nə́ lə́, lə́ nə ḿbə́ atyǎntə tə́kɔʼ tɔ̂ŋ páʼ wə́ələ́ a sáʼ nə́ pəfo pə́ ndu mbî lə́.”