Read Awing Akyaʼəmə́nuə 18 Bible Online

Akyaʼəmə́nuə 18 - Awing bible

Akyaʼəmə́nuə 18

¹Ndzaŋ zəənə́ á nə ńdaŋ nə́ lə́, maŋ pɨ ńkə́ ńdzə́ənə yitsə̌ ntseŋndɛ̂sê a lǒo nəpó ńtə́ ńtsóolə. A nə ńtúgə tə́kɔʼ mətəənə, nəgháʼ əyǐə á ŋwaʼə̂ á ndu mbî ntsəmə;

²A kyéŋ nə́ tə́kɔʼ ngye ə́sóŋ ńgə́, “A wǔəə! Atyǎntə Babilɔnə a wǔəə! A sɛlə̂ aliʼ páʼ pəpɛ̌sê pópə ntê əjwi ətsəm ə́ kě nə́ ŋwaʼ pô ə́ chî nə́ á mə́m yə́, ntê pəsə́ŋ ntsəm ə́ kě nə́ ŋwaʼ pô, pópə pəsə́ŋ pɨ pə́ kě nə́ kɔŋ pô pə́ chî nə́ á mə́m yə́.

³Ńté ńgə́ a nə fɛ̂ məloʼ míə á mbô pɨ pə́ ətú ətsəm ńtíʼ ńgɛd pó nô mə́ələ́, məloʼ mə̈ ghɛd nə́ pó lumə̂ nə́ anǔəndzɔ́ʼə́ tə apímnə ajíə. Pəfo pə́ ndu mbî pó zɔ́ʼ ndzɔʼə́ tə apímnə pó po, pɨ pó kə kə́ nə́ ńtáŋə məta pó kə túg nkáb ńté ńgə́ pó kə lwaʼə á mə́ ghɛd nə́ mənu mə́ təpɔŋ məngyě ghɛnə́ á kə̈ ghɛd nə́.”

⁴Maŋ tíʼ ńdzóʼ yitsə̌ ngye kə́ ḿbɨ ə́fɛ́lə nəpó ə́sóŋə ńgə́, “Pəənə mə, fɛ́d nə́ mə́m tə́kɔʼ tɔ̂ŋ wə́, ńjî ńgə́ nə́ yǐ ńkě faʼ mənu mə́ təpɔŋ páʼ pö faʼ nə́ lə́ pô, nə́ kě yǐ shib zɨ́ ngə́ʼə ándó á nə ńdzɨ́ nə́ lə́ pô!

⁵Ńté ńgə́ pó noŋkə̂ pətəpɔŋ pí, pə́ ŋáŋnə nə́ tə ńchîə ándó nəpóolə, Əsê a tíʼ ńkwúmtə mənu mə́ təpɔŋ mə́ tə́kɔʼ tɔ̂ŋ yi wə́.

⁶Faʼ nə́ nə́ wɨ́d tsɔʼə ndzaŋə ándó a nə faʼ nə́ nə́ pəənə́; Tû nə́ wɨ́d ngǎ pɛ̌ tsɔʼə ndzaŋə a nə faʼ nə́. Lwɛ́nkə nə́ ndɔ́ŋ əjǐ nə́ məloʼ ngǎ pɛ̌, mi mə́ tyantə̂ nə́ ńtsɛɛlə̂ mí a nə ńtsoŋkə̂ nə́ á mbô pɨ lə́.

⁷Ghɛd nə́ a zɨ́ ngə́ʼ ńkə́ ńkyéŋə, zɨ́d nɨ́ tə ńchîə ándó məshu pó pətə́kɔʼ nchîmbî a nə fɛ̂ nə́ nə́ mbɨ əjǐ lə́. A zá ə́sóŋə nə́ mbɨ əjǐ ńgə́: ‘Lɛ̌ aliʼ maŋ náanə ə́wə́, maŋ lə́ mɛ̂fo! Maŋ kě lə́ nkog pô, maŋ láʼ kě sɔbnə̂ pô.’

⁸Ńté anu zɨ, əpúmə́tsəŋkə ŋwu məsɔŋ yǒ yǐəə á mbɨ yí lə́ táʼə alě pɨ́d lə́ aghoonə́ təpɔŋ, asɔbnə, pópə njiə. Móg yǒ toonə̂ yə́, ńté ńgə́ Mmaʼmbîə a pə́ nə́ Əsê, ä sáʼ nə́ əsáʼ əyí lə́ a túg mətəənə.”

⁹Pəfo pə́ ndu mbî páʼ pó pö zɔ́ʼ nə́ ndzɔʼə́ tə apímnə ńkə́ ńtúgə lwaʼə ándó yí, pó yǒ kyéŋ ə́ kə́ fɨnə̂ ə́ té tə́kɔʼ tɔ̂ŋ əghâ ándó pó yǒ nə́ zɨ́ ndíʼ móg ə̈ tɔ nə́ wɨ́d ə́ tə́ nə́ ńkɔ́ʼə.

¹⁰Pó yǒ tɨ́ ndi sag ńté ńgə́, pó tə́ ḿbɔ́gə á mə́ kə́ nə́ jɨ́ ngə́ʼə ándó yí, ńtíʼə ə́sóŋə ńgə́, “Á pə́gə! Á pə́g tə ńdaŋə̂! Babilɔn páʼ á gháʼ nə́ ńkə́ ńtúg mətəənə! Əsê a lɔg tsɔʼə táʼ mə́nu ńnéŋ ngə́ʼə á mə́m wə́!”

¹¹Ngaŋə́táŋə́mə́tá ndu mbî pó kə́ ńkyéŋ ńkə́ fɨnə̂ ńté yə́, ńté ńgə́ pɨ pə́ kě əpú məta əpɔ́b pɛ́lə ńjúnə pô!

¹²Ŋwu tsə̌ a kě gôlə á mbô pó pɛ́lə ńjúnə pô, sɛləba, məngɔʼ mimə səglə̂ nə́ pópə əpú məshumə́; ətsəʼ nkéebə, paŋpaŋ atsəʼə́ nkéebə, ətsəʼ əfə́g pi əshîʼnə, chigə paŋpaŋ ətsəʼə́, mbô mətǐ ətsəm páʼ mə́ túg nə́ azagə́ yə əshîʼnə, əpú pə́ tsoŋkə̂ nə́ nə́ məsɔŋ mə́ tə̂ŋkaʼə, əpú páʼ pə́ tsoŋkə̂ nə́ nə́ mətǐ mə́ pə́ jú nə́ nə́ tə́kɔʼ nkéebə, nə́ ngɔʼ yi səglə̂ nə́ pə́ fóŋ nə́ nə́ blonz, atəənə́, pó yi pə́ fóŋ nə́ nə́ mábel,

¹³Əpú pə́ fóŋ nə́ ńgə́ senamon, əpúmə azagə́ yə əshîʼnə, aleŋə, əpú pə́ fóŋ nə́ nə́ male pó Flaŋkisɛnə; məloʼ pópə məghɔ́lə, apéenə ngəsáŋ pó ngəsáŋ məkálə́, məna pópə məmbéŋ mə́ ndzɛlə, ləəmə́ pó pəmuto pələəmə́ pə̈ soŋ nə́, əpoʼ pópə nchîmbî pəənə.

¹⁴Ngaŋə́táŋə́mə́tá ə́ sóŋə á mbô məngyě wə́ ńgə́, “əpú pə́ ətsəm páʼ gho nə ńdɔ nə́ lə́ pɨ́d měe, afoʼə azô atsəm pópə əpú pipə əshîʼnə ətsəm gho nə̈ ńgwê nə́ ə́ měe, gho láʼ kě pɨ́d pɨ zɨ́ pô!”

¹⁵Ngaŋə́táŋə́mə́tá páʼ pó nə ńtúg nə́ nkáb ńté ńgə́ pó nə ńtáŋə məteenə́ á mə́m tə́kɔʼ tɔ̂ŋ wɨ́d wə́ pó yǒ tɨ́ ndi ə́ sag ńté ńgə́ pó tə́ ḿbɔ́g ngə́ʼ əjǐə; pó yǒ kyéŋ ə́ kə́ fɨnə̂,

¹⁶ə́sóŋə ńgə́, “Ndoonə á atû gho, ndoonə á atû gho, mɛ́ tə́kɔʼ tɔ́ŋə. A nə ńchî lə́ ńdzá ńgwê ətsəʼ pipə əshîʼnə a mbɨ yə́ ándó ətsəʼ nkéebə, pəpaŋpaŋ pə́ ətsəʼ nkéebə, pópə chigə paŋpaŋ ətsəʼə́, ńkə́ ńkə́bkə mbɨ əjǐ nə́ əpú páʼ pə́ tsoŋkə̂ nə́ nə́ gôlə, ńgwê məngɔʼ mimə səglə̂ nə́, pópə əpú məshumə́!

¹⁷Á mə́m táʼ mə́nu a péŋə afoʼ zɨ tsɔʼə atsəmə!” Mətû mə́ əpáŋnkǐ, nə́ pɨ pó chî nə́ á mə́m wɨ́, pɨ pó soŋ nə́ əpáŋnkǐ, ḿbɨ ḿbéenə ŋwu ətsəm páʼ ä faʼ nə́ á mə́m nɨ́ pə̈ tûə yí, pó kə tɨ́ tə ndi ə́ sagə̂;

¹⁸ńtíʼ ńkyéŋ ndzaŋə ándó pó nə ńdzɨ́ nə́ ndíʼ əyí əghâ ándó a nə ńtə́ nə́ ńkɛ́lə pó tíʼ sóŋ ńgə́ “tə́kɔʼ tɔ́ŋ yitsə̌ á kě kə́ láʼə chîə ándó mɛ́ tə́kɔʼ tɔ̂ŋ ghɛn pô!”

¹⁹Pó kwɛlə̂ akəpóglə́ á atû pó ńtíʼə ńkyéŋə ə́fɨnə̂ ə́sóŋə ńgə́, “Ndoonə á atû gho, ndoonə á atû gho! á mɛ́ tə́kɔʼ tɔ̂ŋ! A nə ḿbə́ lə́ tə́kɔʼ tɔ̂ŋ páʼ ŋwu tsəm páʼ a túg nə́ apáŋə́nkǐə a kə túg nə́ nkáb ńté lə́ afoʼə ajíə; lə́ nə táʼ mə́nu a péŋkə ajúmə atsəmə!”

²⁰Nəpó nətsəm, tə nə́ ńkɔŋtə̂, ńté ńgə́ pə́ tsəŋkə̂ yə́! Pɨ pə́ Əsê, tə́ nə́ kɔŋtə̂, ḿbá məntú mə́ Yeso pópə məntúmə́sê! ńté ńgə́ Əsê a sáʼ əsáʼ əyə́, ńté anu a nə ńgɛd nə́ á mbô pəənə́!

²¹Mɛ́ tə́kɔʼ ntseŋndɛ̂sê a tíʼ ńtwá ngɔʼ páʼ ə́ gháʼ nə́ ándó ngɔʼə aghɔʼə apá ńtíʼ ḿmaʼə̂ á mə́m nɨ́ ə́sóŋ ńgə́, “Lə́ ndzaŋə ándó Əsê yǒ nə́ maʼə̂ mɛ́ tə́kɔʼ tɔ̂ŋ Babilɔnə á ndəsê nə́ mətəənə, tə pə́ láʼ ńkě wɨ́d pɨ ńdzɨ́ ngǎ yitsə̌ pô.

²²Ŋwunə a láʼ kě pɨ zóʼə apɛ́n páʼ pə́ póʼ nə́ nə́ məloŋ mə́ məŋkɛd ńdzoobə̂ nə́ ngye ŋwu məsɔŋ, pópə ngaŋə́ tɔ́ŋə ətso nə́ məpaŋ pô. Ńtê ngaŋə́faʼ ntsəm pə́ láʼ kě á mə́m gho pɨ zɨ́ pô. Pə́ láʼ kě pɨ zóʼ ndzaŋ pə́ ghɔʼ nə́ əpúmə á mə́m gho pô.

²³Pə́ láʼ kě pɨ zɨ́ nkyaʼ yitsə̌ ə́ kɛ́lə á mə́m gho pô! Pə́ láʼ kě pɨ zóʼ ngye tǎdndzɔʼə́ kɨ yi mɔ̂ məngyě ndzɔʼə́ á mə́m gho pô. Ngaŋə́táŋə́mə́tá əzô ə́ nə ńtúg mətɨ ńtsɛɛlə̂ ŋwu ətsəmə á ndu mbîə, gho lɔg məkaŋ mô mimə́ məfɨgə, ə́fɨgə̂ ŋwu ntsəm ə́wə́ á ndu mbîə.”

²⁴Əsê a kə néŋ ngə́ʼə á tû Babilɔn ńté ńgə́ pɨ pə́ Babilɔn pó kə kwɛlə̂ achǐə məntúmə́sê pópə yə pɨ pə́ Əsê á mə́m tə́kɔʼ tɔ̂ŋ yi wə́, ńdzoŋ ḿbegə̂ achǐə ŋwu ntsəm pə́ nə ńkwɛd nə́ á ndu mbîə.