Read Awing Akyaʼəmə́nuə 19 Bible Online

Akyaʼəmə́nuə 19 - Awing bible

Akyaʼəmə́nuə 19

¹Ndzaŋ zəənə́ a nə ńdaŋ nə́ lə́ maŋ tíʼ ńdzóʼ tə́kɔʼ ngye ándó ngye mboŋ pəənə á nəpó, ə̈ sóŋə ńgə́, “Ŋáŋkə nə́ Əsê, lə́ chwádkə Əsê ńchwádkə pəənə á mə́m ngə́ʼə, nəgháʼ pó mətɨ ə́ chîə á mbô Əsê əzɛnə̂!

²Ndə̌ŋdəŋ pó mə tɨ́ nə́ ndə̌ŋdəŋ lə́ əsáʼsáʼ əjǐə! A sáʼ əsáʼ tə́kɔʼ məngyě akwɛlə wə́ páʼ a tsəŋkə̂ nə́ mbî ntsəm nə́ ndzɔʼə́ tə apímnə. Əsê a néŋ ngə́ʼə á atû yí ńté ńgə́ a nə ńjwítə ngaŋə́faʼ əjíə.”

³Ngǎ yitsə̌ pó kə́ ḿbɨ ńtsáb ngye kɔ́ʼə atǐ, ə́sóŋə ńgə́, “Ŋáŋkə nə́ Əsê! Ndíʼ páʼ wɨ́d fɛ́d nə́ á mə́m tə́kɔʼ tɔ̂ŋ wə́ á tə́ nə́ ńkɛ́lə lə́ wɨ́d kɔ́ʼə ńgɛnə̂ atǐ tə láʼ kě měe pô!”

⁴Mətû mə́ məghə́m mɛ́n mbɛ̌ nə́ nəkwa ḿbá məna mə́ chî nə́ á mbî mɛ́n nəkwa lə́ pó wǔəə á ndəsê ńtíʼ ńgóʼkə Əsê páʼ ə́ náanə nə́ aləŋənə́fɔ ə́sóŋ ńgə́, “Amɛn, ŋáŋkə nə́ Əsê!”

⁵Ngye tíʼ ə́fɛ́lə aləŋənə́fɔ ə́sóŋə ńgə́, “Ŋáŋkə nə́ Əsê əzɛ̂nə, pɨ pətsəm páʼ pɨ pə́ nə́ ngaŋə́faʼ əjíə, ḿbéenə ŋwu ntsəm páʼ á pɔ́g nə́ yə́, kəənə a pə́ mɔ́ kə́nyaŋ kɨ tə́kɔʼ ŋwunə.”

⁶Maŋ tíʼ ńdzóʼ ngye yitsə̌ ándó ngye mboŋ pɨ, ándó mənkǐ mimə nɨ́ nə́ mə́ tə́ ńdzoolə̂, ńkə́ ḿbɨ ńchîə ándó nəfaŋ nə́ tə́ ḿbyádnə sáʼkə. Maŋ tíʼ ńdzóʼ pó sóŋ ńgə́, “Ŋáŋkə nə́ Əsê! ńté ńgə́ lə́ Mmaʼmbî, á pə́ nə́ Əsê əzɛ̂n páʼ a tsɛ nə́ ajúmə atsəm lə́, lə́ əfo.

⁷Pɛn tə́ ńkɔŋtə̂ mbɨ əzɛ̂n ə́ kə́ ńtə́ ḿbɔŋə̂ pɛn tíʼ ə́fɛ̂ nəgháʼə á mbô yə́! Ńté ńgə́ ndɛd nkaŋ ndzɔʼə́ Mɔ́ mbéŋ ndzɛd wə́ ə́ koʼə̂, mɔ̂ məngyě a kə́ ńtíʼ ńtyáŋtə mbɨ əjǐ nə́ alě yəwə́.

⁸Pə́ nə fɛ̂ ətsəʼ nkáb pi ŋwaʼ nə́ ə́ ŋwaŋkə̂ nə́ á mbô yí ńgə́ á wê,” (ətsəʼ nkáb pipə wɨ́ lə́ məfaʼ mimə əshîʼnə páʼ pɨ pə́ Əsê pó faʼ nə́).

⁹Ntseŋndɛ̂sê wə́ a tíʼ ə́sóŋ nə́ maŋ ńgə́, “Ŋwaʼlə̂ zəənə́; mbɔŋə́ lə́ yə pɨ pə́ fóŋ nə́ ághóobə́ aliʼə́ nkaŋ ndzɔʼə́ Mɔ́ Mbéŋ ndzɛd wə́.” Ntseŋndɛ̂sê wə́ a pɨ ḿbeg ńgə́, “Lɛ̌ ndə̌ŋdəŋə́ atséebə Əsê.”

¹⁰Maŋ tíʼ ńgwǔəə á məko yə́ á mə́ ghóʼkə nə́ yə́, lə́ a pə́ ə́sóŋə á mbô maŋ ńgə́, “Kɔ ghɛlə̂ zə̂! Maŋ lə́ pə́pə̌ ngaŋəfaʼə ándó gho, ńkə́ ḿbə́ yi pəlim pó á mə́m Yeso pó kə tɨ́ nə́ ńtyantə̂, ńdzɨ́ ńkə́ ńdzóʼ ńgə́ nkɨ Yeso a kə kyaʼ nə́ lə́ ndə̌ŋdəŋə́, Ghóʼkə Əsê!” Ńté ńgə́ lə́ ndə̌ŋdəŋ páʼ Yeso a nə́ ńgyǐ nə́ nə́ wɨ́d lə́ páʼ á fɛ̂ nə́ mətəənə á mbô məntúmə́sê ńgə́ pó sóŋ mənu mə́ yǒ nə́ lɔgə̂ aliʼə́.

¹¹Maŋ tíʼ ńdzɨ́ nəpó nə́ ŋáʼnə, ə́wɨ́ maŋ zə́ənə fúfú ləəmə́. Ŋwu páʼ a náanə nə́ á ndu ləəmə́ yi wɨ́ pə́ fóŋə yi nə́ Mbimə́ ńkə́ ḿbə́ Ndə̌ŋdəŋə́, a sáʼ əsáʼ əyí ndə̌ŋdəŋ ńkə́ ḿbóʼnə məlaʼ mí ndə̌ŋdəŋə́.

¹²Əmə́g mí mə́ chîə ándó alə́əmə mógə́, a tíʼ ńgwê pəlɛ pə́ nəfɔ pipə nɨ́ nə́ á atû yə́. A nə ńtúg əlɛ́n páʼ pə́ nə ŋwaʼlə̂ nə́ á mbɨ yə́, ŋwu tsə̌ a nə ńkě jîə ajú pə́ nə ŋwaʼlə̂ nə́ pô, tə ńdéʼtə yə́ a nə ńjî nə́.

¹³Tə́sɛ atsəʼə́ a nə ńgwê nə́, pə́ kə pwɔ́nə á mə́mə achǐə, əlɛ́n pə́ fóŋ nə́ yi ə́wɨ́ lə́ ńgə́, “Atséebə Əsê.”

¹⁴Ngaŋə́maʼə́ntso nəpó ə́ zoŋə̂ yə́, ńnáanə á ndu pəfúfú pə́ pələəmə́, ńkə́ ńgwê ətsəʼ nkáb pɨ́d pə́ nə́ pəfúfú, ńkə́ ŋ́ŋwaʼə̂.

¹⁵Ŋwíŋ ntso yi ńtsə́g nə́ á fɛ́lə á ntso yə́, a yǒ nə́ lɔgə̂ zɨ́d ə́ póʼnə məlaʼ ə́wɨ́ ə́ tsɛ ətú ətsəmə. A yǒ sáʼə ághɔ́b nə́ mbô mimə tyantə̂ nə́, a yǒ chúʼtə məloʼ mə́ fɛ́lə aliʼə́ atsoŋkəmə́loʼə á mə́ nɨd nə́ atyǎntə azáŋə́ndé Əsê, Əsê páʼ a tsɛ nə́ ajúmə atsəmə.

¹⁶Pə́ ŋwaʼlə̂ əlɛ́n nə́ tə́sɛ atsəʼ əyǐ pópə nətoʼ jí ńgə́, “Əfo pəfo pó Mmaʼmbî pəmaʼmbîə.”

¹⁷Maŋ tíʼ ńdzə́ənə ntseŋndɛ̂sê a tə́əmə á mə́m mə́numə. A tíʼ ńtɔ́ŋnə nə́ tə́kɔʼ ngye á mbô pəsə́ŋ pətsəm pə́ nə ńtə́ nə́ ńdzagə̂ á mə́mə atǐ, ńgə́ “Yǐ nə́ ńkyeetə̂ táʼə aliʼ ńté tə́kɔʼə alě akɔŋtə Əsê!

¹⁸Yǐ nə́ ńkɔ́d na mbɨ pəfo, yi mətû mə́ ngaŋə́maʼə́ntsoolə, yi ngaŋə́maʼə́ntsoolə, pópə na mbɨ pələəmə́ pópə yi pɨ pó náanə nə́ á ndu pó, pópə na mbɨ ŋwu ntsəmə, kɨ yi apoʼ kɨ yi ŋwu páʼ a kě nə́ apoʼ pô, kɨ yi tə́kɔʼ ŋwu kɨ mɔ́ kə́nyaŋ ŋwunə!”

¹⁹Maŋ tíʼ ńdzɨ́ na nəyeŋə́ zə́ pó pəfo pə́ ndu mbî nə́ ngaŋə́maʼə́ntso əzɔ́b ə́ kyeetə̂ á mə́ póʼnə nə́ ŋwu páʼ a nə náanə nə́ á ndu ləəmə́ wə́, pópə əjí ngaŋə́maʼə́ntsoolə.

²⁰Pə nə ńdɔg na nəyeŋə́ zə́ ándó ngaŋə́tsáŋ ḿbá məntúmə́sê mimə məfɨgə páʼ pó nə̈ ńgɛd nə́ əkɨʼnəmə́nuə á mbi yə́. (A nə ńdɔg lə́ əkɨʼnəmə́nu pipə wɨ́ ə́fɨgə̂ pɨ páʼ pó nə ńtúg nə́ aleŋkə na nəyeŋə́ zə́, ḿbá pɨ páʼ pó nə̈ ńgóʼkə nə́ móonə akɔ́ na nəyeŋə́ wə́). Pə́ nə maʼ na nəyeŋə́ zə́ pópə məntúmə́sê mimə məfɨgə mə́ páʼ pó pɛ́d nə́ mbîə, á mə́m tə́kɔʼ əfooghəəmə́ á kə túg nə́ mógə́, móg ə́ kɛ́d nə́ ándó anuə ndaʼə.

²¹Pə́ nə ńjwítə ngaŋə́maʼə́ntso əzɔ́b nə́ ŋwíŋ ntso páʼ ə́ fɛ́d nə́ á ntso ŋwu páʼ a nə náanə nə́ á ndu ləəmə́ wə́ lə́, pəsə́ŋ pə́ kɔ́d na mbɨ əzɔb tə ńdzɛ́lə ághóobə́.