Read Awing Akyaʼəmə́nuə 2 Bible Online

Akyaʼəmə́nuə 2 - Awing bible

Akyaʼəmə́nuə 2

¹Ŋwaʼlə̂ aŋwaʼlə á mbô ntseŋndɛ̂sê páʼ a chî nə́ á mə́m nkyeetə pɔ́ pə́ Əsê á Efesusə ńgə́: Nkɨ ghɛn lǒo lə́ á mbô ŋwu páʼ a túg nə́ pɔ́ pə́ sáŋ pɛnə̂ asaambɛ̂ apô yí yə təənə, yí páʼ a nyi nə́ á mə́m əpúmə atə́gə́lam pə̂ pɛ́nə asaambɛ̂ pə́ tsoŋkə̂ nə́ nə́ gôlə lə́.

²Maŋ jîə anu gho faʼ nə́, maŋ jî ńgə́ gho kə pyádnə ńtə́gə atû nə́ afaʼ ńkə́ ńtúgə awaamə́ntə́əmə, maŋ jî ńgə́ gho kě kɔŋə̂ á mə́ zɨ́ nə́ ŋwu təpɔŋ pô, ńkə́ ńjî ńgə́ gho jwə́ʼ pəənə ándó pó sóŋ nə́ ńgə́ pó lə́ məntú mə́ Yeso, páʼ pó kě nə́ lə́ mɨ́d pô, gho jwə́ʼə ághɔ́b ńdzɨ́ ńgə́ pó lə́ ngǎŋntsəələ.

³Gho túgə awaamə́ntə́əmə, ńdzɨ́ ngə́ʼ ńté mə, ńkě kə́ ńká pô.

⁴Lɛ̌ anu gho ghɛd nə́ á kě á mbô maŋ koʼnə̂ pô, gho kě mə pɨ ḿbɛ́d ńkɔŋ əghâ nə́ ndzaŋ gho nə ńkɔŋ nə́ á ntsɛɛmbi pô.

⁵Kwaŋ nə́ atûə azô ndzaŋ gho wǔ nə́. Fɛ́lə á mə́m pətəpɔŋ pó ńtə́ faʼə̂ anu gho nə̈ faʼ nə́ á ntsɛɛmbi. Təmbɔʼ gho chîə á mə́m təpɔŋ gho fɛ́d pô maŋ yǐ ńgyǐ ńtwáamə ajúmə atə́gə́lámə azô aliʼ páʼ á nə ńchî nə́ ə́wə́.

⁶Lɛ̌ anu páʼ a pɔŋ nə́ ńté gho, ńgə́ gho peenə̂ anu pɨ pó zoŋ nə́ Nikolas pö faʼ nə́, tsɔʼə ndzaŋ páʼ maŋ kə́ nə́ ḿbeenə̂.

⁷Təmbɔʼ gho túg mətôglə, gho jwə́ʼtə anu Ajwiə a sóŋ nə́ á mbô mənkyeetə mə́ pɔ́ pə́ Əsê![9] A mbô pɨ pó maʼ nə́ ntso ńdaŋ, maŋ yǐ fɛ̂ əseenə á mbô pó, pó jî nənta nə́ atǐ nə́ nchîmbî páʼ nə̈ kɔ́ʼ nə́ á mə́m Nkáʼ Məjî Əsê.

⁸Ŋwaʼlə̂ aŋwaʼlə á mbô ntseŋndɛ̂sê a chî nə́ á mə́m nkyeetə pɔ́ pə́ Əsê Smylna ńgə́:[10] Lɛ̌ nkɨ páʼ ə́ lǒo nə́ á mbô ŋwu páʼ a pə́ nə́ nəchwaakənə́ ńkə́ ḿbə́ nəlwigtənə́, a kə́ kwû ńkə́ ḿbɨ́ ńchîə á mbî ngǎ yitsə̌.

⁹Maŋ jî məngə́ʼ mô; maŋ jî ńgə́ gho lə́ mbóŋə, ḿbə́ lə́ əfoʼə! Maŋ jî mənu mimə təpɔŋ pɨ pö sóŋ nə́ ńté gho, pəənə ándó pó fóŋ nə́ mbɨ əzɔb nə́ pəjusə ḿbə́ ńkě lə́ pɨ́d pô; pó chî lə́ á mə́m nkyeetə páʼ ə́ pə́ nə́ yǐ Satanə!

¹⁰Kɔ pɔ́g ngə́ʼ páʼ ə́ chî nə́ á mə́ yǐ nə́ a mbɨ gho. Jwə́ʼtə nə́! Dɛbəələ a yǐ néŋə áwɨ́ pətsə́ á nkáʼə atsáŋə, ə́ lɔg ə́lɨ́d ə́jwə́ʼə áwə́ənə́, məngə́ʼ mɨ mə́ yǐ ḿbə́ ḿměe á mə́m əlěmbî nəghə́mə. Təmbɔʼ á pə́ pə́ nəwû á tə́ nə́ ńgyǐ nə́ ghɛn nə́ mbiə á mə́ túg nə́ mbimə́ nə́ maŋ, maŋ yǐ fɛ̂ nchîmbî á mbô pəənə́ ándó ntsɔ́ʼəfaʼ əzəənə́.

¹¹Təmbɔʼ gho túg mətôglə gho jwə́ʼtə anu páʼ Ajwiə ä sóŋ nə́ á mbô mənkyeetə mə́ pɔ́ pə́ Əsê![11] Pɨ pó maʼ nə́ ntso ńdaŋ, nəwû yi ndzəmə á kě ághɔ́b yǐ wam pô.

¹²Ŋwaʼlə̂ aŋwaʼlə ə́fɛ̂ á mbô nkyeetə pɔ́ pə́ Əsê páʼ ə́ chî nə́ Pəgamo ńgə́: Nkɨ ghɛn lǒo lə́ á mbô ŋwu páʼ a túg nə́ ŋwíŋ ntso mətû mətû páʼ á tsə́g nə́.

¹³Maŋ jîə aliʼ ghö chî nə́ ə́wə́, lə́ aliʼ Satanə a túg nə́ aləŋənə́foonə ají ə́wə́, gho lə́ ndə̌ŋdəŋ ŋwunə á mbô maŋə. Gho nə ńkě mbimə́ əzo gho nə ńtúg nə́ ńté mə myaʼ pô, tə ńkoʼə̂ á pə́ nə́ əghâ pə́ nə ńjwítə nə́ Antipas páʼ a kə pə́ nə́ ŋwunə a kə sóŋ nə́ anu ńté mə nə́ ntɨ́ əyí ətsəm, pə́ kə́ ńjwítə yí lə́ aliʼ Satanə ä chî nə́ ə́wə́.

¹⁴Lɛ̌ tsɔʼə pɔ́ pə́ mənu mäŋ túg nə́ ńté gho páʼ maŋ kě nə́ kɔŋ pô. Pɨ pətsə́ pó chîə á mə́m pɨ páʼ pó zoŋ nə́ ndzéʼkə Balaamə. Balaamə a kə zéʼkə Balag ndzaŋ təmbɔʼ a ghɛd pɔ́ pə́ Islɛl pó ghɛlə̂ təpɔŋə, ńdzéʼkə ághɔ́b ńgə́ pó jî məjî pə́ lɔg nə́ ə́fyaʼ məsê mə́ məfɨgə ə́wə́, ḿbɨ ńkə́ ńgɛd ńgə́ pó zɔ́ʼ ndzɔʼə́ tə apímnə.[12]

¹⁵Tsɔʼə nə́ ndú wɨ́d wə́ pətsə́ pɨ pó kə́ ńchîə á mə́m pɨ páʼ pó zoŋ nə́ ndzeʼkə́ pɨ pə́ zoŋ nə́ Nikolas.

¹⁶Nə́ pə́ əghâ nə́ fɛ́d nə́ á mə́m pətəpɔŋ pə́ənə́! Təmbɔʼ nə́ chî fɛ́d pô, maŋ yǐ ńgyǐ tsɔʼə əghâ nə́ ńdɔg ŋwíŋ ntsoolə mə páʼ ə́ fɛ́d nə́ á ntso maŋ ḿbóʼ pɨ pipə wɨ́ nə́ zə́ələ́.

¹⁷Təmbɔʼ nə́ túg mətôglə nə́ jwə́ʼtə anuə Ajwiə ä sóŋ nə́ á mbô mənkyeetə mə́ pɔ́ pə́ Əsê mə́![13] Pəənə ándó pó póʼnə nə́ ntso ńdaŋ maŋ yǐ fɛ̂ yitsə̌ mana yi ńdyáŋ nə́ wə́ á mbô pó, maŋ yǐ kə́ fɛ̂ táʼ fufu ngɔʼə á mbô ŋwu əghɔb ntsəmə, pə́ ŋwaʼlə̂ əlɛ́n yi fîə á ndu ngɔʼ zɨ páʼ ŋwu ndaʼ yitsə̌ a kě nə́ jî pô, tə ńdéʼtə ŋwu páʼ a kwá nə́ ngɔʼ yi wə́.

¹⁸Ŋwaʼlə̂ aŋwaʼlə á mbô ntseŋndɛ̂sê páʼ a chî nə́ á mə́m nkyeetə pɔ́ pə́ Əsê á Tiyatila ńgə́; Lɛ̌ nkɨ ə́ lǒo nə́ á mbô Mɔ́ Əsê, páʼ əmə́g mí mə̈ kɛ́d nə́ ándó mógə́, məko mí mə̈ ŋwaŋkə̂ ándó atəənə́ yitsə́ pə́ fóŋ nə́ nə́ Bəlasə, yi pə́ sog nə́.

¹⁹Maŋ jîə anu gho faʼ nə́, maŋ jî ndzaŋ gho kɔŋ nə́ mə, maŋ jî mbimə́ əzo, ńkə́ ńjî ndzaŋ gho tə́g nə́ atû nə́ afaʼ ńkə́ ńjî ndzaŋ gho túg nə́ awaamə́ntə́əmə. Maŋ jî ńgə́ gho pyádnə ńtə́ ə́faʼ əghâ nə́ ńtsɛ ndzaŋ gho nə̈ faʼ nə́ ntsɛɛmbiə.

²⁰Lə́, lɛ̌ anu maŋ kě nə́ kɔŋ ńté gho pô lə́, gho mɛdtə̂ məngyě wə́ pə́ fóŋ nə́ nə́ Jɛsəbɛl ńgə́ a faʼə̂ ajíə anuə, yí wə́ ä fóŋ nə́ mbɨ əjǐ ńgə́ yí lə́ ntûsê lə́. Ndzoŋ nə́ ndzeʼkə́ əjǐ a ghɛd ngaŋə́faʼə mə a fankə̂ alaŋə́ azɔ́b ńtíʼə ńdzɔ́ʼ ndzɔʼə́ tə apímnə ńkə́ ḿbɨ ńjîə məjî pə lɔg nə́ ə́fyaʼ əsê məfɨgə ə́wə́.[14]

²¹Maŋ fɛ̂ ndɛlə á mbô yí ńgə́ a kwúblə ntɨ́ əyí ə́fɛ́lə á mə́m pətəpɔŋ píə, lə́ a pə́ ńkě kɔŋə̂ á mə́ mɛdtə̂ nə́ ndzɔʼə́ tə apímnə pô.

²²Ńdaŋ ə́lɨ́d maŋ yǐ ḿmaʼə̂ yə́ á əkwunə́ aghɔ, pópə pəənə ándó pó po nə̈ ńjî nə́ mə̂ghabə lə́, pó yǐ ńdzɨ́ ngə́ʼ tə ńtóŋə yitsə̌ ńgwê. Maŋ yǐ faʼ ə́lɨ́d əghâ nə́, tə ńdéʼtə pó kwúblə məntɨ́ mɔ́b ə́fɛ́lə á mə́m pətəpɔŋ pö kə́ ghɛd nə́ pópə məngyě nə́

²³Maŋ yǐ kə́ jwítə pəənə ándó pó zoŋ nə́ ndzeʼkə́ əjǐə, mənkyeetə mə́ pɔ́ pə́ Əsê mətsəm mə tíʼ ńjî ńgə́ lə́ maŋ maŋ jî nə́ ntɨ́ ŋwu ntsəm ńkə́ ńjîə anu ŋwu ntsəmə a lɔ nə́. Maŋ yǐ tûə ŋwu əwɨ ntsəm ə́ zoŋ lə́ ndzaŋ a faʼ nə́.[15]

²⁴Lə́, apuʼə azɨ́ pətsəmə á Tiyatila ə́ kě ndzeʼkə́ təpɔŋ zɨ zoŋ pô; Nə́ kě zéʼə ajú páʼ pɨ pətsə́ pó fóŋ nə́ ńgə́, mənu mimə lyáŋ nə́ mə́ Satan páʼ mə́ shǐ nə́ pô. Maŋ fiʼtə̂ áwɨ́ ńgə́ maŋ kě yǐ pɨ sóŋ ńgə́ nə́ faʼə̂ anu yətsə́ páʼ á lɛd nə́ ńtsɛɛlə̂ áwɨ́ pô.

²⁵Lə́, tə ńkoʼ əghâ maŋ yǐ nə́ əyǐ, tɨ́ nə́ ńtyantə̂ á mə́mə anu atsəm nə́ tə nə́ ə́faʼə̂.

²⁶Ŋwunə ándó a maʼ nə́ ntso ńdaŋ ńkə́ ə́faʼə̂ anu maŋ lɔ nə́ tə ńkoʼə̂ ndwigtə, maŋ yǐ ghɛlə̂ a túg mətəənə á ndu ətú ətúmə.

²⁷A yǐ sáʼ ətú pipə wə́ nə́ ngwanə atəənə́, ńnwadtə̂ ághɔ́b tsɔʼə ndzaŋə ándó məkəŋ mə́ atsaʼ mə́ pakə̂ nə́ apagə́pag lə́, lə́ tsɔʼə ndzaŋə ándó maŋ nə́ nkɔ̌ʼmbəəmə mə maŋ kwá nə́ mətəənə á mbô Tǎ mə,

²⁸maŋ yǐ kə́ fɛ̂ mɔ́ sáŋ ndûmbîə á mbô yə́.

²⁹Ŋwu páʼ a túg nə́ mətôglə a zóʼə anu páʼ Ajwiə á sóŋ nə́ á mbô mənkyeetə mə́ pɔ́ pə́ Əsê.