Read Awing Akyaʼəmə́nuə 20 Bible Online

Akyaʼəmə́nuə 20 - Awing bible

Akyaʼəmə́nuə 20

¹Maŋ tíʼ ńdzɨ́ ntseŋndɛ̂sê a lǒo nəpó ńtə́ ńtsóolə, ńtúg pəkî pə́ atéemə́təndwegtə pó mɛ́ tə́kɔʼ nkɛlə́ atəənə́ á mbô yə́.

²A wam na zə́ pə́ fóŋ nə́ dəlagɔn lə́, páʼ á pə́ nə́ ndɛn nó ngoʼ pəchə́ ńkə́ ḿbə́ Dɛbəəl kɨ Satan lə́, ńtíʼ ńkwúlə yí nə́ ngoʼ táʼ tɔsə.

³Ntseŋndɛ̂sê wə́ a maʼə̂ yə́ á mə́m atéemə́təndwegtə zə́ ə́fwɔnə̂, ńkə́bkə ázɨ́d ńtíʼ ńnéŋə aleŋkə wə́, ńjî ńgə́ təmbɔʼ á kě pɨ pə́ mbî pɨ fɨg pô tə ngoʼ táʼ tɔsə yǒ ńdaŋə̂, ándó ngoʼ táʼ tɔsə ə́ yǒ nə́ laŋ lə́, a pɨ ńnyáʼ ḿmɛdtə̂ yí nə́ mɔ́ akəmə ndɛlə́.

⁴Maŋ tíʼ ńdzɨ́ ələŋəmə́foonə, Əsê a nə fɛ̂ mətɨ nə́ pɨ pó nə náanə nə́ á ndu wɨ́ ńgə́ pó tə́ ə́sáʼə məsáʼə. Maŋ kə́ ḿbɨ ńdzɨ́ əjwi pɨ páʼ pə́ nə ńjwítə nə́ ághɔ́b ńté ńgə́ pó nə ńtɨ́ ńtyantə̂ nə́ anu ńté Yeso pó atséebə Əsê. Pó nə ńkě na nəyeŋə́ zə́ kəənə móonə akɔ́ əyǐ ghóʼkə pô, pó nə ńkě kə́ ńtúgə aleŋkə na nəyeŋə́ zə́ á nəzeŋnə́ pó pô, kəənə á mbô pó pô. Pó kə pɨ ńtúg nchîmbî ńtíʼə ńnoolə̂ ə́sáʼ mbî pópə Yeso Klisto ándó pəfo nə́ ngoʼ táʼ tɔsə.

⁵Pətsə́ pəkwû pó nə́ ńkě nəwû júmnə pô tə ngoʼ táʼ tɔsə yǒ ńdaŋə̂. Zɨ lə́ ntsɛɛmbi mə júmnə nə́ nəwûə.

⁶Ŋwu ntsəm páʼ a yǒ nə́ ńchîə á mə́m ntsɛɛmbi mə júmnə nə́ nəwû ghɛn, Əsê a yǒ fɛ̂ afoʼə ajíə, a kə́ ŋ́ŋwaʼə̂. Azoŋkə nəwûə á kě mətəənə á ndu pó túg pô, pó yǒ pə́ lə́ ngaŋə́pêsê yi Əsê pó Klisto, pó yǒ sáʼ mbî pó po nə́ ngoʼ táʼ tɔsə.

⁷Ndzaŋə ándó ngoʼ táʼ tɔsə ə́ yǒ nə́ laŋ lə́, pə́ fógə Satanə á nkáʼə́tsáŋ yə́,

⁸a yǒ ə́fɛ́lə á atsáŋ lə́ ə́ ghɛnə̂ á apeŋə́ á mə́m məlá mə́ mbî mɛ́n nəkwa ə́fɨg pɨ ə́wə́, ətú mbî pɨ lə́ Gog pó Magog. Satanə a yǒ tíʼ kyeetə̂ ághɔ́b pətsəm táʼ aliʼə́ á mə́ póʼnə nə́ ntsoolə, pó yǒ nə́ənə ándó wáakə́ á nkaŋ nə́ənə[79].

⁹Pó kə shamnə̂ á mə́m mbî ntsəm ńtíʼ ńdíblə aliʼ páʼ pɨ pə́ Əsê pó chî nə́ ə́wə́, ḿbéenə á tə́kɔʼ tɔ̂ŋ páʼ Əsê a kɔŋ nə́. Lə́ móg fɛ́lə á nəpó ńtsó ńtsəŋkə̂ ághɔ́b pətsəmə.

¹⁰Lə́ Dɛbəəl páʼ a nə fɨg nə́ ághɔ́b lə́, pə́ tíʼ ḿmaʼə̂ yə́ á mə́m əfooghɨ páʼ móg chî nə́ ə́wə́, móg ə́ kɛ́d nə́ ándó anuə ndaʼə, aliʼ páʼ pə́ nə ḿbeg nə́ ḿmaʼ na nəyeŋə́ zə́ ə́wɨ́ pópə məntúmə́sê mimə məfɨgə lə́, aliʼ pó yǒ nə̈ ə́ kɔ́lə na nô əzɔb nətúʼ pópə nənumnə tə mɛdnə̂.

¹¹Maŋ tíʼ ńdzə́ənə tə́kɔʼ fúfú aləŋənə́fɔ pó ŋwu páʼ a náanə nə́ á ndu ə́wə́. Mbî pó nəpó ə́ tíʼ ńkəələ̂ á nəpɛnə́ yə́, aliʼ yətsə́ á nə́ ńkě ə́wɨ́ á mbô pó pɨ ńchî pô.

¹²Maŋ tíʼ ńdzɨ́ pəkwûə, pətə́kɔʼ pópə pɔ́ pə́ kə́nyaŋə́, pó tə́əmə á mbi aləŋənə́foonə, əŋwaʼlə tíʼ ŋ́ŋáʼ nə́, yətsə́ á kə́ ḿbɨ ŋ́ŋáʼnə, páʼ á pə́ nə́ aŋwaʼlə nchîmbîə. Pə́ sáʼ əsáʼ pəkwû lə́ nə́ mənu pə́ nə ŋwaʼlə̂ nə́ á mə́m əŋwaʼlə pí wɨ́ ńdzoŋ mənu pó nə̈ faʼ nə́.

¹³Lə́, pɨ pə́ kə kwû nə́ á mə́m nə́ənə, pó kə́ ńgɛnə̂ á mbô Əsê ńgə́ pə́ sáʼ əghɔ́b əsáʼə, pəənə ándó nəwûə a kə lɔg nə́ pó yǐ ńgə́ pə́ sáʼ əghɔ́b əsáʼə, pəənə ándó pó chî nə́ á aláʼ pəkwû pó kə́ ńgyǐ ńgə́ pə́ sáʼ əsáʼ əghóobə́. Pə́ nə sáʼ əsáʼ əghɔ́b pətsəm ńdzoŋ lə́ mənu pó nə faʼ nə́.

¹⁴Pə́ tíʼ ḿmaʼə̂ nəwû pópə aláʼə pəkwûə á mə́m əfooghɨ páʼ a túg nə́ mógə́. Əfooghɨ ghɛn páʼ a túg nə́ móg lə́ kə pə́ azoŋkə nəwûə.

¹⁵Ŋwu ntsəm páʼ pə́ nə ńkě nə́ əlɛ́n yə́ á mə́mə aŋwaʼlə nchîmbî ŋwaʼlə̂ pô, pə́ nə maʼə̂ yə́ á mə́m əfooghɨ páʼ á túg nə́ mógə́.