Read Awing Akyaʼəmə́nuə 21 Bible Online

Akyaʼəmə́nuə 21 - Awing bible

Akyaʼəmə́nuə 21

¹Maŋ tíʼ ńdzɨ́ nəpó yi nəfî pó mbî yi fîə. Ntsɛɛmbi nəpó pó ntsɛɛmbi mbî pó péŋə, nə́ənə á nə ńkě pɨ ḿbɛ́d pô.

²Maŋ tíʼ ńdzə́ənə tə́kɔʼ Tɔ̂ŋ yi Ŋwaʼ nə́, á pə́ nə́ Jɛlusalɛm yi fîə, á lǒo á nəpó á mbô Əsê ńtə́ ńtsóolə, pə́ tyáŋtə yə́ ándó mɔ̂ məngyě pə́ wê nə́ məshu mí ńtə́ ńgɛnə̂ á mə́ fɛ̂ nə́ á mbô ndúmə.

³Maŋ tíʼ ńdzóʼ tə́kɔʼ ngye yətsə́ á fɛ́lə á mə́m aləŋənə́fɔ ə́sóŋ ńgə́, “Aliʼ Əsê a chî nə́ ə́wə́ a chîə á mə́m pɨ pə́ mbî! Əsê nə́ nkɔ̌ʼmbɨ yə́ a yǒ chî pó po, pó tíʼ ḿbə́ pɨ píə. Əsê nə́ nkɔ̌ʼmbɨ yə́ a yǒ chî pó po, a pə́ Əsê əzoobə́.

⁴A yǒ shíg nkǐmə́g ətsəm á əmə́g pô. Nəwûə á yǒ kě pɨ chî pô, ŋwunə a yǒ kě pɨ fɨnə̂ pô, ə́ kě pɨ kyéŋ pô, ə́ kě aliʼ yə záŋ nə́ pɨ zóʼ pô. Pəlɛn pə́ mənu pətsəm pə́ laŋə̂.”

⁵Əghâ yi wɨ́ lə́, ŋwunə a náanə nə́ aləŋənə́foonə a tíʼ ə́sóŋ ńgə́, “Əghâ nə́ maŋ yǐ ghɛlə̂ ajúmə ntsəmə á tíʼ yə fîə!” A kə́ ḿbɨ ə́sóŋə á mbô maŋ ńgə́, “Ŋwaʼlə̂ zəənə́, ńté ńgə́ atsáb zɨ lə́ ndə̌ŋdəŋ ńkə́ ḿbə́ atsáb mbɔʼ pɨ pə́ néŋ ntɨ́ wə́.”

⁶A sóŋə á mbô maŋ ngǎ yitsə̌ ńgə́, “Maŋ ghɛd mənu mətsəmə! Maŋ lə́ Alfa ńkə́ ḿbə́ Omega, ḿbə́ nəchwaakənə́ ńkə́ ḿbə́ nəlwigtənə́. Ŋwu ntsəm páʼ nji nkǐ tə́ nə́ ńdzáŋə yí, maŋ yǐ fɛ̂ nkǐə á mbô yí kətaŋ, nkǐ ə́ lǒo nə́ á mə́m sáʼə́sê nkǐ páʼ á fɛ̂ nə́ nchîmbîə.

⁷Ŋwu ntsəm páʼ a maʼ nə́ ntso ńdaŋə̂, a yǒ kwá əpú pɨ ətsəmə; maŋ yǒ pə́ Əsê əjǐ a kə́ ḿbə́ móonə mə́.

⁸Lə́ pɨ páʼ pö pɔ́g nə́ əliʼ, pɨ páʼ pó kě nə́ mbimə́ túg pô, pɨ pə́ támkə nə́ mbô mənu ntsəmə, pɨ páʼ pó jwítə nə́, pɨ páʼ pó zɔ́ʼ nə́ ndzɔʼə́ tə apímnə, pɨ páʼ pó ghɛd nə́ nəkaŋə, pɨ páʼ pó ghóʼkə nə́ pɔ́ pə́ akɔ́ pópə ngǎŋntsɨd ətsəmə, aliʼə́ azɔ́b lə́ əfooghɨ páʼ á túg nə́ móg ə́ kɛ́d nə́ tsɔʼə nə́ ngə́ʼə, lə́ ndzoŋkə nəwûə.”

⁹Táʼ ntseŋndɛ̂ á mə́m pətseŋpə́ndɛ́pə́sê pə́ pɛ́n asaambɛ̂ páʼ a nə ńtúg nə́ əkáŋ pə́ pɛ́n asaambɛ̂ páʼ ə́ nə ńdwɛ́nkə nə́ nə́ əpúmə́tsəŋkə ŋwu məsɔŋ pə́ asaambɛ̂ lə́, a tíʼ ńtséebə á mbô maŋ ə́sóŋ ńgə́, “Yǐəə, Maŋ yǐ nəələ̂ gho nə́ mɔ̂ məngyě ndzɔʼə́ wə́ páʼ á pə́ nə́ ngwě Mɔ́ Mbéŋ ndzɛd lə́”

¹⁰Ajwǐəsê á kwúnə mbɨ maŋ ntseŋndɛ̂sê wə́ á lɔgə̂ mə ńkɔ́ʼ nə́ maŋə á ndu mɛ́ tə́sɛ nkwəənə. Ńtíʼ nəələ̂ mə nə́ Jɛlusalɛm páʼ á pə́ nə́ tə́kɔʼ Tɔ́ŋ yi Ŋwaʼ nə́ á lǒo nə́ nəpóolə á mbô Əsê ńtíʼə ńtsóolə,

¹¹ŋ́ŋwaŋkə̂ nə́ nəgháʼ Əsê. Tə́kɔʼ tɔ̂ŋ yiwə́ á ŋwaŋkə̂ ándó ngɔʼ páʼ ə́səglə̂ nə́, ándó yi pə́ fóŋ nə́ nə́ jaspa, ngɔʼ yi wɨ́ ə́ ŋwaʼə̂ ándó Klista.

¹²Tə́kɔʼ tɔ̂ŋ yiwə́ a kə túgə mɛ́ nkáʼ páʼ wɨ́d ŋáŋnə nə́, ńdíblə tɔ̂ŋ yiwə́. Nkáʼ yi wɨ́ ə́ kə túg məntso ntsɔb pɛ̌, pətseŋpə́ndɛ́pə́sê ntsɔb pɛ̌ pó kə tɨ́ ńtə́ ńnáŋə məntso mimə wə́. Nə́ məntso mə́ nkáʼ mimə wɨ́ pə́ nə́ ŋwaʼlə̂ məlɛ́n mə́ məla mə́ pɔ́ pə́ Islɛl wɨ́ ntsɔb pɛ̌.

¹³Əlá nkáʼ ətsəm ə́ nə ńtúg lə məntso mɛ́n teelə́: á əlá əsáʼmə́nu mɛ́n teelə́, á əlá mətoŋə́ mɛ́n teelə́, á əlá məkɔʼnə́ mɛ́n teelə́, ḿbɨ́ ḿbə́ nə́ əlá mɛ́dmə́nu mɛ́n teelə́.

¹⁴Pə́ nə ńkwúd nkáʼ tə́kɔʼ tɔ̂ŋ yi wɨ́ lə́ á ndu məngɔʼ ntsɔb pɛ̌, á ndu məngɔʼ mə́ ntsɔb pɛ̌ pə́ nə ŋwaʼlə̂ məlɛ́n mə́ məntû mə́ Yeso mə́ ntsɔb pɛ̌, məntú mi mə́ nə ḿbə́ lə́ mimə́ Mɔ́ Mbéŋ ndzɛd wə́.

¹⁵Ntseŋndɛ̂sê páʼ a nə ńtsáb nə́ nə́ maŋ a nə ńtúg mbaŋ pə́ tsoŋkə̂ nə́ nə́ gôl, á lɔgə̂ zɨ́d ə́fiʼə̂ tə́kɔʼ tɔ̂ŋ wɨ́d wə́, ə́fiʼə̂ məntso mí pópə əsagə́ píə.

¹⁶Tə́kɔʼ tɔ̂ŋ yiwɨ́ məlá mətsəm mɛ́n nəkwa mə́ kə pə́ lə́ ndə̌ŋdəŋə́, ndzaŋ wə́ələ́ á nə sag nə́ lə, lə́ kə́ ḿbə́ ndzaŋ wə́ələ́ á nə ńgáʼ nə́. Ntseŋndɛ̂sê wə́ a tíʼ ə́fiʼə̂ tə́kɔʼ tɔ̂ŋ wə́ nə́ mbaŋə afiʼə́pú əjǐə: Á nə ḿbə́ lə́ pə kilometa 2,400 á mə́ sag nə́, mə gháʼ nə́ mí pópə mə ŋáŋnə nə́ kɔ́ʼə á atǐ lə́ nə ḿbə́ tsɔʼə ndə̌ŋdəŋə́ ándó mə sag nə́.

¹⁷Ntseŋndɛ̂sê wə́ a kə́ fiʼ əsagə́ nkáʼ pipə wɨ́ ə́ pə́ pəmeta 60 á mə́ ŋáŋnə nə́, ndzoŋ nə́ ajú páʼ ŋwu ntsəmə á lɔg nə́ fiʼə̂ wə́.

¹⁸Pə́ nə ńdɔg lə́ məngɔʼ pə́ fóŋ nə́ nə́ jaspa ḿbɔ́ əsagə́ nkáʼ pipə wɨ́ ə́wə́, tə́kɔʼ tɔ̂ŋ yi wɨ́ nə́ nkɔ̌ʼmbɨ yí, pə́ nə ḿbɔ́ lə́ tsɔʼə nə́ gôlə, a ŋwaʼə̂ ándó gəlasə.

¹⁹Achîə nkáʼə tə́kɔʼ tɔ̂ŋ yi wɨ́ pə́ nə ńdɔg lə́ ntê ńtê məngɔʼ mimə səglə̂ nə́ ḿbɔ́ wə́, ntsɛɛmbi ngɔʼə achîə nkáʼ yi wə́ á nə ḿbə́ lə́ jaspa, yi ə́ nə ńdzoŋkə̂ nə́ ə́ nə ḿbə́ lə́ safaya, yi ə́ nə ńdzoŋkə̂ nə́ pɛn pɛ̌ ə́ pə́ agatə, yi zoŋkə̂ nə́ pɛ́n teelə́ ə́ pə́ ɛmɛlɛdə,

²⁰yi kə zoŋkə̂ nə́ pɛ́n nəkwa ə́ pə́ onizə, yi zoŋkə̂ nə́ pɛ́n tâ ə́ pə́ kanəlya, yi zoŋkə̂ nə́ pɛ́n ntogə́ ə́ pə́ Yello kwatzə, yi zoŋkə̂ nə́ asaambɛ̂ ə́ pə́ Bɛli, yi zoŋkə̂ nə́ nəfeemə́ ə́ pə́ topakzə, yi zoŋkə̂ nə́ nəpuʼə́ ə́ pə́ chasidoni, yi zoŋkə̂ nə́ nəghə́m ə́ pə́ tukwasə, yi zoŋkə̂ nə́ ntsɔb mɔʼə́ ə́ pə́ ametist.

²¹Məntso mə́ nkáʼ mimə wɨ́ ntsɔb pɛ̌ mə́ kə tɨ́ lə́ nə́ əpú pi səglə̂ nə́ ntsɔb pɛ̌. Ntso nkáʼ ətsəm pə́ nə ńtsoŋkə̂ lə́ nə́ táʼə ajú yə səglə̂ nə́. Alaŋə́ á kə laŋ nə́ á mə́m tə́kɔʼ tɔ̂ŋ yi wɨ́ pə́ nə ḿbɔ́ lə́ tsɔʼə nə́ gôlə páʼ a kě nə́ dɔtə̂ pô, ŋ́ŋwaŋkə̂ ándó akyaʼə́shîə.

²²Maŋ nə ńkě ndɛ̂sê á mə́m tə́kɔʼ tɔ̂ŋ yi wɨ́ zɨ́ pô, ńté ńgə́ ndɛ̂sê aliʼ yə wɨ́ lə́ nə ḿbə́ Əsê páʼ a pə́ nə́ Mmaʼmbîə, ḿbə́ yí páʼ a tsɛ nə́ ajúmə atsəm ḿbɨ ḿbə́ nə́ Mɔ́ Mbéŋ Ndzɛlə.

²³Tə́kɔʼ tɔ̂ŋ yiwɨ́ a nə ńkě tə́ ńdoonə̂ mə́nu kəənə sáŋ ńgə́ á tɛ̂ wɨ́ pô, ńté ńgə́ nəgháʼ Əsê nkyaʼ ə́ nə̈ ńtɛ̂ nə́ ə́wə́, Mɔ́ mbéŋ ndzɛlə a kə́ ḿbə́ lamə a kə̈ kɛ́d nə́ ə́wə́.

²⁴Pɨ pə́ mbî pó yǒ lɔgə̂ lə́ nkyaʼ yi wɨ́ ə́faʼə̂ mənu mɔ́b ə́wə́, pəfo pə́ mbî pó yǐ nə́ afoʼə azóobə́ á mə́m tə́kɔʼ tɔ̂ŋ yi wə́.

²⁵Məntso mə́ nkáʼ mə́ tə́kɔʼ tɔ̂ŋ yi wɨ́ mə́ ŋáʼnə əlě ətsəmə, pə́ láʼ kě mɨ́d wuʼnə̂ pô, ńté ńgə́ túʼə á láʼ ə́ kě wɨ́ sɛ́n pô.

²⁶Əpú pipə əshîʼnə pópə afoʼə pɨ pə́ mbî pə́ yǒ lɔg yǐ nə́ zə́ələ́ á mə́m tɔ̂ŋ yi wə́.

²⁷Lə́, ajúmə atsəm páʼ á dɔtə̂ nə́, ŋwu ntsəm páʼ ä ghɛd nə́ mənu mə́ əshɨ́ pó ŋwu ntsəmə á tsɨd nə́ ntsɨd pó pətsəm yǒ kě á mə́m tə́kɔʼ tɔ̂ŋ yi wɨ́ kwú pô. Lə́ tsɔʼə pɨ páʼ pə́ ŋwaʼlə̂ nə́ məlɛ́n móobə́ á mə́mə aŋwaʼlə nchîmbî yə Mɔ́ Mbéŋ Ndzɛd wə́ pó yǒ nə́ kwúnə á mə́m tə́kɔʼ tɔ̂ŋ wə́.