Read Awing Akyaʼəmə́nuə 22 Bible Online

Akyaʼəmə́nuə 22 - Awing bible

Akyaʼəmə́nuə 22

¹Ntseŋndɛ̂sê wə́ a kə́ ḿbɨ ńnəələ̂ mə nə́ nkǐ páʼ ə́ fɛ̂ nə́ nchîmbîə, ŋ́ŋwaʼə̂ ándó klista, wɨ̈d fɛ́lə lə́ aləŋənə́fɔ Əsê, nə́ kə́ nə́ ḿbə́ yi nə́ Mɔ́ Mbéŋ Ndzɛlə,

²nkǐ wə́ tíʼ ńkóŋ ńdaŋə̂ á tətəənə alaŋə́ á mə́m tə́kɔʼ tɔ́ŋə. Á nkǎŋkǐ yi wɨ́ məlá mətsəm, atǐ páʼ ä fɛ̂ nə́ nchîmbî á nə ńchî ə́wə́, páʼ zə́ələ́ á zə́m nə́ mənta ngǎ ntsɔb pɛ̌ á mə́m ngoʼ ətsəmə, táʼ ngǎ á mə́m sáŋ ntsəmə, məfǔ mə́ atǐ yə́ wɨ́ pə́ nə ńdɔgə̂ ńtsóʼ mbî ntsəm ə́wə́.

³Ajú tsə̌ páʼ Əsê a néŋ nə́ ndoonə atû wɨ́ pə́ kě ázə́ələ́ á mə́m tə́kɔʼ tɔ̂ŋ yi wɨ́ zɨ́ pô. Aləŋənə́foonə Əsê, á kə́ nə́ ḿbə́ yə Mɔ́ Mbéŋ ndzɛd á yǒ chîə á mə́m tə́kɔʼ tɔ̂ŋ yi wə́, ngaŋə́faʼ Əsê ə́ tíʼə ńgóʼkə yə́.

⁴Pó yǒ zɨ́nə məshî pópə Əsê, əlɛ́n Əsê kə́ ńchîə á nəzeŋnə́ pó.

⁵Ndzəmə ə́ yǒ kě pɨ chî pô, pó yǒ kě pəlam kəənə mə́nu pɨ chwa pô, ńté ńgə́ Mmaʼmbî á pə́ nə́ Əsê a yǒ pə́ lə́ nkyaʼ əzoobə́, pó tíʼ ə́sáʼ mbîə ándó pəfo tə ḿmɛdnə̂.

⁶Ntseŋndɛ̂sê wə́ a tíʼ ə́sóŋə á mbô maŋ ńgə́, “Ətsáb pɨ maŋ tsáb nə́ á mbô gho lə́ ndə̌ŋdəŋə́, néŋ nə́ ntɨ́ ə́wə́. Lə́, Mmaʼmbî páʼ a pə́ nə́ Əsê páʼ a fɛ̂ nə́ Ajwiə ají á mbô məntúmə́sê lə́, a túmə á ntseŋndɛ̂sê ńgə́ a nɨd ngaŋə́faʼ əjí nə́ anu páʼ á yǐ nə́ lɔgə̂ aliʼ tsɔʼə əghâ nə́.”

⁷Yeso a sóŋ ńgə́, “Jwə́ʼtə nə́, ngǎ pɛ̌ maŋ yǐəə! Mbɔŋə́ yə pɨ páʼ pó zóʼnə nə́ mənu pə́ ŋwaʼlə̂ nə́ á mə́mə aŋwaʼlə zɨ, mə́ yǐ nə́ ə́lɔgə̂ aliʼ əghâ nə́ ə́ kə́ ə́lɔgə̂ aliʼ nə́ ndɛd páʼ ə́ yǐ nə́ yǐəə.”

⁸Maŋ Jɔnə, maŋ zóʼ ńkə́ ńdzɨ́ ndɛn mənu ghɛnə́. Lə́ əghâ ándó maŋ kə ḿməgtə̂ nə́ á mə́ zóʼ nə́ ə́ kə́ zɨ́ mənu mɨ́d mɨ lə́, maŋ tíʼ ńgwǔəə məko ntseŋndɛ̂sê páʼ a nɨd nə́ mənu mɨ́d mɨ lə́, ńtíʼ ńgóʼkə yə́.

⁹Lə́ a sóŋə á mbô maŋ ńgə́, “Kɔ gho ghɛd ə́lə́ələ́, ńté ńgə́ maŋ kə́ ḿbə́ lə́ ngaŋəfaʼ Əsê ándó gho, ńkə́ ḿbə́ ándó pəlim pó á mə́m Klisto páʼ pó pə́ nə́ məntúmə́sê, ńdzoŋ ḿbə́ nə́ ŋwu ntsəm páʼ a zóʼnə nə́ anu páʼə aŋwaʼlə zəənə́ á sóŋ nə́. Ghóʼkə á pə́ Əsê!”

¹⁰A pɨ sóŋə á mbô maŋ ńgə́, “Kɔ gho lyáŋ pɨ nə́ mənu pə́ ŋwaʼlə̂ nə́ á mə́mə aŋwaʼlə zɨ mə́ yǒ nə́ ə́lɔgə̂ aliʼə́, ńté ńgə́ ndɛd páatə páʼ mənu mɨ mətsəm mə́ yǐ nə́ lɔgə̂ aliʼə́.

¹¹Ŋwu ntsəm páʼ á pə́ nə́ ŋwu təpɔŋ a yǐ shib ghɛn nə́ mbiə á mə́ tə́ nə́ ghɛlə̂ təpɔŋə, ŋwu ntsəm páʼ a ghɛn nə́ nə́ mbiə á mə́ ghɛd nə́ mənu mə́ ndɔtíə a ghɛn nə́ mbiə á mə́ ghɛd nə́ mənu mə́ ndɔtíə, ŋwu ntsəm páʼ a pə́ nə́ ŋwu yi əshîʼnə a ghɛn nə́ mbiə á mə́ ghɛd nə́ əshîʼnə, ŋwu ntsəm páʼ a ŋwaʼ nə́ a ghɛn nə́ mbiə á mə́ ghɛd nə́ mənu mimə ŋwaʼ nə́.”

¹²Yeso a sóŋə á mbô pó ńgə́, “Jwə́ʼtə nə́, maŋ tə́ ńgyǐ nga pɛ̌, maŋ yǐ yǐ nə́ ntsɔ́ʼəfaʼə mə, ə́fɛ̂ á mbô ŋwu ntsəm ə́ zoŋ ndzaŋ páʼ a faʼ nə́.

¹³Maŋ lə́ Alfa ńkə́ ḿbə́ Omega, ḿbə́ mbi ńkə́ ḿbə́ ndzəmə, ḿbə́ nəchwaakənə́ ńkə́ ḿbə́ nəlwigtənə́.”

¹⁴Apɔŋə́ yə pɨ páʼ pó sog nə́ pətə́sɛ pə́ ətsəʼ əpɔ́b pə́ ŋwaʼə̂, ńdaŋ ə́lɨ́d pó túg əseenə á mə́ jî nə́ nənta páʼ nə́ lǒo nə́ atǐ páʼ ä fɛ̂ nə́ nchîmbîə, ńkə́ ńdaŋə̂ á ntsǒnkáʼ ńkwúnə á tə́kɔʼ tɔ́ŋə.

¹⁵Pɨ pó yǒ nə́ kě á ntsǒnkáʼ kwú pô lə́ pɨ pó tá nə́ ntê afanə atsəmə, pópə ngaŋnə́kaŋə, ḿbá ngaŋə́zɔ́ʼə ndzɔʼə́ tə apímnə, ngaŋə́jwítə pəənə, ngaŋə́ghóʼkə pɔ́ pə́ akóomə́, ḿbɨ ḿbéenə ŋwu ntsəm páʼ ä tsɨd nə́ ntsɨd nə́ atséebə ají pópə məfaʼ míə.

¹⁶“Maŋ Yeso, maŋ túmə ntseŋndɛ̂ mə ńgə́ a náŋkə mənu məənə́ á mbô pəənə́ á mə́m mənkyeetə mə́ pɔ́ pə́ Əsê. Maŋ fɛ́d lə́ á mə́m ngwud Debilə. Maŋ lə́ mɔ́ sáŋ ndúumbî páʼ a tɛ̂ nə́.”

¹⁷Ajwi pó mɔ̂ məngyě ndzɔʼə́ sóŋ ńgə́, “Yǐəə!” Ŋwu ntsəm páʼ a zóʼ nə́ anu zɨ a yǐ kə́ shib sóŋ ńgə́, “Yǐəə!” Ŋwu ntsəm páʼ nji nkǐ tə́ nə́ ńdzáŋə yə́ a yǐ nô nkǐ páʼ wɨ̈d ghɛd nə́ pɨ pə́ túg nchîmbîə. Ŋwu ntsəm páʼ a lɔ nə́ nkǐ ghɛn á yí kwáalə wɨ́d kətaŋə.

¹⁸Maŋ Jɔn, maŋ lánə ńkwantə̂ ŋwu ntsəm páʼ a zóʼ nə́ ətsáb pə́ ŋwaʼlə̂ nə́ á mə́mə aŋwaʼlə zɨ; ətsáb páʼ ə́ yǐ nə́ lɔgə̂ aliʼə́. Təmbɔʼ ŋwu tsə̌ a pegə̂ anu yətsə́ á mə́m mənu pə́ ŋwaʼlə̂ nə́ á mə́mə aŋwaʼlə zɨ, Əsê a yǐ ńkə́ ḿbeg əpúmə́tsəŋkə ŋwu məsɔŋ páʼ pə́ ŋwaʼlə̂ nə́ á mə́mə aŋwaʼlə zəənə́ a mə́mə atsáŋə yə́.

¹⁹Lə́, təmbɔʼ ŋwu tsə̌ a fógə anu yitsə̌ páʼ pə́ ŋwaʼlə̂ nə́ á mə́mə aŋwaʼlə zɨ ńté mənu páʼ mə́ yǐ nə́ lɔgə̂ aliʼ, Əsê a yǐ ńkə́ ńkwáalə ajíə alamə́ á mə́m nənta nə́ atǐ nə́ fɛ́d nə́ á mə́m atǐə nchîmbî pó Tə́kɔʼ Tɔ́ŋ yi Ŋwaʼ nə́. Mənu mɨ mətsəm pə́ lyaʼtə̂ mə́ələ́ á mə́mə aŋwaʼlə zəənə́.

²⁰Ŋwu páʼ a nə ńdzɨ́ nə́ ńkə́ ńtsáb ndə̌ŋdəŋ ńté mənu mɨ mətsəm a sóŋ ńgə́, “Lə́ ndə̌ŋdəŋə́! Maŋ tə́ ńgyǐəə tsɔʼə əghâ nə́!” Amɛn. Yǐəə, Mmaʼmbî Yeso.

²¹Ńgə́ apɔŋə́ntə́əmə Mmaʼmbî Yeso á chîə á mbô ŋwu ntsəmə.[80]