Read Awing Akyaʼəmə́nuə 3 Bible Online

Akyaʼəmə́nuə 3 - Awing bible

Akyaʼəmə́nuə 3

¹Ŋwaʼlə̂ aŋwaʼlə ə́fɛ̂ á mbô ntseŋndɛ̂sê páʼ a chî nə́ á mə́m nkyeetə pɔ́ pə́ Əsê á Sadisə ńgə́, Lɛ̌ nkɨ páʼ ə́ lǒo nə́ á mbô yí páʼ a túg nə́ əjwi pə́ pɛ́nə asaambɛ̂ pi Əsê, pópə pɔ́ pəsáŋ pɛ́nə asaambɛ̂. Maŋ jîə anu pɨ̈ faʼ nə́. Maŋ jî ńgə́ pə́ jîə áwə́ənə́ ándó pɨ páʼ pó chî nə́ á mbîə, páʼ pɨ pǎ nə́ tə ńkwû lə́.

²Lə́ á pə́ ńgə́ nə́ lǒo əsê, ńnéŋ mətɨ nə́ afaʼə azɨ́ páʼ á pɛ́d nə́ kɔ zə́ələ́ megnə̂ ńkwûə. Ńté ńgə́ maŋ zɨ́ ńgə́ anu ghö faʼ nə́ á kě ŋwaʼ ńgɛn ə́fyagə̂ á mbi Əsê mə pô.

³Tíʼ ńkwúmtə anu pə́ kə zéʼkə nə́ gho ə́wə́, pópə yi gho kə zóʼ nə́, ńdzóʼnə zɨ́d ə́fɛ́lə á mə́m pətəpɔŋ pô. Təmbɔʼ pɨ chîə á ndəsê lǒo, maŋ yǐ ńtsóolə á ndu pəənə́ ándó ndzə̌lə, tə gho yǐ ńkě jîə á pə́ əghâ maŋ yǐ nə́ yǐ pô.

⁴Lə́, ntaʼlə pəənə á mə́m pəənə́ á Sadisə pó sog ətsəʼ əpɔ́b ə́ ŋwaʼə̂. Pó yǐ nyi pəg po, ə́wê pəfúfú pə́ ətsəʼ, ńté ńgə́ pó koʼnə̂ á mə́ chî nə́ ə́lə́ələ́.

⁵Pəənə ándó pó maʼ nə́ ntso ńdaŋ pó yǒ kə́ wê pəfúfú pə́ ətsəʼ lə́ tsɔʼə ándó pó, maŋ kě məlɛ́n móobə́ á mə́mə aŋwaʼlə pɨ pó chî nə́ á mbî kə̂ fógə pô. Maŋ yǐ sóŋə á mbi Tǎ mə pó pətseŋpə́ndɛ̂ pí á əshîsaŋ ńgə́ pó lə́ pəənə mə.[16]

⁶Təmbɔʼ nə túg mətôglə nə́ jwə́ʼtə anuə Ajwiə ä sóŋ nə́ á mbô mənkyeetə mə́ pɔ́ pə́ Əsê.

⁷Ŋwaʼlə̂ aŋwaʼlə á mbô ntseŋndɛ̂sê a chî nə́ Filadefya ńgə́:[17] Lɛ̌ nkɨ ə́ lǒo nə́ á mbô yi páʼ a ŋwaʼ nə́ ńkə̈ ńtséebə ndə̌ŋdəŋə́, a túg pəkî pə́ Debilə[18] á mbô yí páʼ təmbɔʼ a tsɔ́ʼ ntsǒndɛ̂, ŋwu tsə̌ a kě fwɔn pô, ńkə́ fwɔn ŋwu tsə̌ a kě tsɔ́ʼ pô.

⁸Maŋ jîə anu ghö faʼ nə́; maŋ jî ńgə́ mətɨ mô mə́ kə́gə; gho kə zoŋ ndzeʼkə́ mə, ńkə́ faʼə̂ nə́ ntɨ́ əgho ətsəmə á mbô maŋə. Maŋ tsɔ́ʼ ntsǒndɛ̂ á mbi gho, páʼ mbɔʼ ŋwu tsə̌ a kě fwɔn pô.

⁹Jwə́ʼtə nə́, nə́ anu ńté pəənə ándó pó chî nə́ á mə́m nkyeetə Satan lə́, ngǎŋntsɨd zə́ pó fóŋ nə́ mbɨ əzɔb nə́ Pəjus páʼ pó kě nə́ pɨ́d pó lə́, maŋ yǐ ghɛd pó yǐ ńkwə́ʼtə á mbi pəənə́: pó pətsəm yǐ jî ńgə́ maŋ kɔŋə̂ áwə́ənə́.[19]

¹⁰Ńté ńgə́ gho kə zóʼnə ntəgə́ mə páʼ ə́ lɔ nə́ ńgə́ gho túgə awaamə́ntɨ́, maŋ yǐ kə́ kɨ́ʼtə gho əghâ ngə́ʼ ə́ yǐ nə́ yǐəə á mə́m mbîə á mə́ jwə́ʼ nə́ ŋwu ntsəmə.

¹¹Maŋ tə́ ńgyǐəə tsɔʼə əghâ nə́, wam ntɨ́ nə́ maŋ ńjî ńgə́ kɔ ŋwu tsə̌ a zə ntsɔ́ʼəfaʼ əzo páʼ gho maʼ nə́ ntso ńdaŋ pə́ fɛ̂.

¹²Maŋ yǐ ghɛd ńgə́ pɨ páʼ pó maʼ nə́ ntso ńdaŋ pó tíʼ ḿbə́ məntɔ́ mə́ ndɛ̂ á mə́m tə́kɔʼndɛ̂sê Əsê mə, pó láʼ kě á mə́m ə́wɨ́ fɛ́d pô. Maŋ yǒ ŋwaʼlə̂ əlɛ́n Əsê mə á ndu pó, pópə əlɛ́n tə́kɔʼ tɔ̂ŋ Əsê mə á pə́ nə́ Jɛlusalɛm yi fî páʼ á yǐ nə́ lǒo á mbô Əsê mə á nəpó tsóolə. Maŋ yǐ kə́ ŋwaʼlə̂ əlɛ́nə mə yi fîə a mbɨ pó.[20]

¹³Təmbɔʼ gho túg mətôglə gho jwə́ʼtə anu Ajwiə á sóŋ nə́ á mbô mənkyeetə mə́ pɔ́ pə́ Əsê!

¹⁴Ŋwaʼlə̂ aŋwaʼlə á mbô ntseŋndɛ̂sê á chî nə́ á mə́m nkyeetə pɔ́ pə́ Əsê ə́ chî Laodɛsya ńgə́: [21] Lɛ̌ nkɨ ə́ lǒo nə́ á mbô Amɛnə. Ŋwunə ä faʼ nə́ nə́ ntɨ́ əyí ətsəm ḿbɨ́ ńkə́ ḿbə́ ŋwunə a zɨ́ nə́ ńkə́ ḿbí ńgə́ lə́ ndə̌ŋdəŋə́, Əsê kə laŋ lə́ nə́ yí ńtsoŋkə̂ ajúmə atsəmə.

¹⁵Maŋ jî məfaʼ mə́ənə́, maŋ jî ńgə́ pɨ kě féŋ pô ńkě kə́ ńtɔnə̂ pô, maŋ pěʼ ḿbyádnə ńkɔŋ ńgə́ təmbɔʼ pɨ pěʼ ḿbə́ táʼə á mə́m mənu mə́ənə́.

¹⁶Ńté ńgə́ pɨ póʼtə ńchîə wə́ənə́, ńkě tɔnə̂ ńkě kə́ féŋ pô, maŋ yǐ twǐə wɨ́ ə́fógə á ntso maŋə!

¹⁷Nə́ sóŋ ńgə́, Pəg túgə afoʼə azə́gə́ ńkě ajûtsə́ tə́ ḿbóŋə pô; pəg túgə ajúmə atsəm pəg pěʼ nə́ ńchîə mə́ túg nə́; Lə́ pɨ pə́ ńkě jî ńgə́ pɨ lə́ pɨ pə́ tə əlá əyí, páʼ pə́ póʼtə nə́ ńchî pô. Pɨ lə́ pəpóŋə, ntɨ́ ntə̌blə, ńkə́ ə́fəgə̂.

¹⁸Maŋ tíʼə ńtə́gtə áwɨ́ lə́ ńgə́ pɨ júnə gôlə á mbô maŋə, Gôlə pə́ laŋkə̂ nə́ á mə́m mógə́ á ŋwaʼə̂, ńjî ńgə́ təmbɔʼ pɨ túgə afoʼə. Pɨ yǐ kə́ júnə fúfúə atsəʼ ə́wê a mbɨ pɨ ńjî ńgə́ pɨ kə́bkə ntə̌blə əzɨ́ kɔ əsɨ́ tə́ ńkóolə áwə́ənə́. Pɨ yǐ kə́ júnə afǔə əmə́g ńnéŋə á əmə́g pɨ ńjî ńgə́ təmbɔʼ nə́ zɨ́ əliʼə́.

¹⁹Pɨ maŋ kɔŋ nə́ ághɔ́b maŋ sáʼə ághɔ́b ńkə́ ńtə́gə ághɔ́b nə́ ndú yi záŋ nə́, tə́ nə́ ńkɔŋtə̂ á mə́ fɛ́d nə́ á mə́m pətəpɔŋ pə́ənə́.[22]

²⁰Jwə́ʼtə! Maŋ tə́əmə ntsǒndɛ̂ ńtə́ ńkɔŋtə̂, mbɔʼ ŋwu tsə̌ a zóʼ ngye mə ŋ́ŋáʼ ntsǒndɛ̂, maŋ kwúnə á ndɛ̂ pəg yí jî məjîə, a kə́ ńjî məjî pəg yə́.

²¹Nə́ pəənə ándó pó maʼ nə́ ntso ńdaŋ maŋ yǐ fɛ̂ əseenə á mbô pó mbɔʼ pó náanə á nəpɛnə́ maŋə á aləŋənə́fɔ maŋə, tsɔʼə ndzaŋə ándó maŋ nə maʼ nə́ məntso ńdaŋ ńtíʼ ńnáanə pəg Tǎ mə aləŋənə́fɔ yə́.

²²“Təmbɔʼ pɨ túg mətôglə nə́ jwə́ʼtə anu Ajwiə ä sóŋ nə́ á mbô mənkyeetə mə́ pɔ́ pə́ Əsê!”