Read Awing Akyaʼəmə́nuə 4 Bible Online

Akyaʼəmə́nuə 4 - Awing bible

Akyaʼəmə́nuə 4

¹Ndzaŋə ándó ndɛn mənu ghɛn kə laŋ nə́ lə́, Maŋ náŋ ńdzɨ́ ntsǒndɛ̂ ŋáʼnə á mbi maŋə á nəpóolə. Ngye maŋ kə pɛ́d nə́ tə ńdzóʼ zɨ́d tséebə á mbô maŋ lə́ zɨ́d chûə ándó nəpaŋ lə, ə́sóŋ ńgə́, “Kɔ́ʼ ńgyǐəə aliʼə́ nə́, maŋ yǐ nəələ̂ gho nə́ anu páʼ á yǐ nə́ shib lɔgə̂ aliʼə́ á əghâ mənu mɨ mə́ laŋ nə́.”

²Tsɔʼə əghâ yi wɨ́, Ajwiə á kwúnə á mə́m maŋ, maŋ tíʼ ńdzə́ənə aləŋənə́foonə á chîə nəpóolə, ŋwu tsə̌ náanə á ndu wə́. [23]

³A kɛ́lə ŋ́ŋwaŋkə̂ ándó məngɔʼ mimə səglə̂ nə́ mətsə́ pə́ fóŋə nə́ Jasəpa pó Kanelya, nkɔŋ nôngə́m pɨ ńkyádkə aləŋənə́fɔ ə́fîə pə́ yitsə̌ ngɔʼ yi səglə̂ nə́ pə́ fóŋə nə́ emeladə.

⁴Pətsə́ ələŋəmə́fɔ məghə́m mɛ́n mbɛ̌ nə́ pɛ́n nəkwa kyádkə aləŋənə́fɔ yə wɨ́, mətû məghə́m mɛ́n mbɛ̌ nə́ mɛ́n nəkwa náanə nə́ ələŋəmə́fɔ pipə wɨ́ ńgwê pəfúfú pə́ ətsəʼ nə́ pəlɛ pə́ nəfɔ pə́ lɔg nə́ gôlə ńtsoŋkə̂ ə́wə́.

⁵Nəfaŋ nə́ kə̈ ŋ́ŋwaŋkə̂, ńdzoolə̂, ə́sáʼkə ə́fɛ́lə á mə́mə aləŋənə́fɔ yəwə́. Á mbiə aləŋənə́fɔ yə wɨ́ mənkyaʼ mə́ tɔsəlam mɛn asaambɛ̂ mə́ chî wɨ́ ńtə́ ńkɛ́lə, mɨ́d mə́ kə pə́ lə́ əjwi Əsê pə́ pɛn asaambɛ̂. [24]

⁶Á mbi aləŋənə́fɔ yə wɨ́ ajûtsə́ á kə chî wə́ ándó nə́ənə, ŋ́ŋwaŋkə̂ ándó gəlasə, ŋ́ŋwaʼə̂ ándó ngɔʼ yi səglə̂ nə́ yitsə̌ pə́ fóŋə nə́ Klistal.[25] Ńdíblə aləŋənə́fɔ yə wɨ́ məlá mətsəm mɛ́n nəkwa məna mətsə́ mə́ chî nə́ á mbî, mə́ tɨ́mtə ə́wə́, əmə́g mə́ kə́bkə ághóobə́ á mbi pó ndzəmə.

⁷Ntsɛɛmbi neemə á chîə ándó sáambaŋə, ndzoŋkə á chîə ándó asə̌lə neemə, yə a pɨ nə́ ńkə́ ndzoŋkə á túg əshîə ándó yi ŋwunə, yitsə̌ pɨ ńtíʼ ńchîə ándó mbôʼmə́wúmə́ a tə́ nə́ ńdzagə̂.

⁸Pó pətsəm túg mbab mɛ́n ntogə́ ntogə́, əmə́g mə́ chîə aliʼə́ atsəmə á mbɨ pó, á mə́m pó apeŋə́. Ənumnə pó nətúʼ pó kə́ ńdzoobə̂ tsɔʼə nkǐ tə jwitə̂ ə́sóŋə ńgə́: “Yi páʼ a ŋwaʼ nə́, yi páʼə a ŋwaʼ nə́, yi páʼə a ŋwaʼ nə, lə́ Mmaʼmbî páʼ a pə́ nə́ Əsê páʼ ə́ tsɛ nə́ ajúmə atsəmə. Páʼ a nə ńchî nə́ ə́wə́, a chî nə́ ə́wɨ́ əghâ nə́, ńkə́ ḿbɛ́lə á mə́ yǒ nə́ yǐəə.”

⁹Məna mə́ mɛ́n nəkwa pó tíʼə ńdzoobə̂ mənkǐ əfɛ̂ nəgháʼə, ńgóʼkə ḿbəənə̂ əfɛ̂ ndǎ á mbô yí páʼ a náanə nə́ á aləŋənə́fɔ wə́ lə́, yí páʼ a chî nə́ mbî tə ghɛn mɛdnə̂ lə́. Əghâ po tə́ nə́ ńgɛlə̂ lɛ̌ lə́,

¹⁰mətû mə́ məghə́m mɛ́n mbɛ̌ nə́ mɛ́n nəkwa lə́ po wǔəə á mbi yí páʼ a náanə nə́ aləŋənə́fɔ wə́ lə́, ńgóʼkə yí páʼ a chî nə́ mbî tə ghɛn mɛdnə̂ lə́. Pó tíʼə maʼə̂ pəlɛ pə́ nəfɔ póobə́ á mbi aləŋənə́fɔ zə́ ńtíʼə ə́sóŋə ńgə́:

¹¹“Mmaʼmbî əwəg ńkə́ ḿbə́ Əsê əzəg! Gho koʼnə̂ mbɔʼ gho kwáalə nəgháʼə, pó ngóʼkə, nə́ mətəənə, ńté ńgə́ gho kə tsoŋkə̂ ajúmə atsəmə, ńkə ńgɛd pɨ́d chîə mbî, ńkə́ ńtúg nchîmbî ndzoŋ ndzaŋ páʼ gho lɔ nə́.”