Read Awing Akyaʼəmə́nuə 5 Bible Online

Akyaʼəmə́nuə 5 - Awing bible

Akyaʼəmə́nuə 5

¹Maŋ kə zə́ənə aŋwaʼlə yə kádtə nə́ á mbô ŋwunə a kə náanə nə́ aləŋənə́fɔ lə́ a túgə á apô yí yə təənə. Pə́ kə ŋwaʼlə̂ əpú wɨ́ nə́ məlá mətsəmə, ńkád ńdɔg pə fɨdnû asaambɛ̂ ńdɔg ńgwam ə́wə́.[26]

²Maŋ tíʼ ńdzə́ənə atyǎntə ntseŋndɛ̂sê a tə́ náŋkə nə́ tə́kɔʼ ngye ńgə́, “Lə́ əwə a koʼnə̂ nə́ mbɔʼ á lə́gtə fɨdnû wə́ ńtíʼ ŋ́ŋáʼə aŋwaʼlə yə kádtə nə́ zə́?”

³Lə́ ŋwu tsə̌ pə́ ńkě nəpó chî, kəənə ndu mbî, kəənə á nətɛ́n nə́ mbî mbɔʼə á ŋáʼkə aŋwaʼlə yə kádtə nə́ zə́ ńnáŋ mə́m əji pô.

⁴Maŋ kə pyádnə ńkyéŋ ńté ńgə́ pə́ kə kě ŋwu tsə̌ jɨ́ páʼ a koʼnə̂ nə́ təmbɔʼ a ŋáʼkə aŋwaʼlə yə kádtə nə́ zə́ ńnáŋ mə́m əjǐ pô.

⁵Táʼ nətû yi nətsə́ nə́ tíʼ ə́sóŋ nə́ maŋ ńgə́, “Kɔ kə́ kyéŋə, náŋə! Sáambaŋə a fɛ́d nə́ á mə́m əlá Juda, a kə pə́ lə́ tə́kɔʼ ŋwunə á mə́m ngwud Debilə, a kə póʼnə nə́ ntso ńdaŋə̂. Lə́ ŋwu mbɔʼ a lə́gtə pə fɨdnû pə́ asaambɛ̂ ŋ́ŋáʼə aŋwaʼlə yə kádtə zə́.”[27]

⁶Maŋ tíʼ ńdzə́ənə Mɔ́ Mbéŋ Ndzɛlə á tə́əmə tətəənə aləŋənə́fɔ zə́, məna mə́ mɛ́n nəkwa pópə mətû mə́ tɨ́ ńdíblə yə́. Mɔ́ Mbéŋ Ndzɛd wə́ a chîə pə́ ándó pə́ jwítə yə́. A kə túg məndɔ́ŋ mɛ́n asaambɛ̂ pópə əmə́g mɛ́n asaambɛ̂ páʼ mə́ pə́ nə́ əjwi Əsê pə́ pɛ́n asaambɛ̂ páʼ pə́ kə tú nə́ á mə́m mbî ntsəmə.[28]

⁷Mɔ́ Mbéŋ Ndzɛd wə́ a ghɛn ńkwáalə aŋwaʼlə yə kádtə nə́ zə́ á chî nə́ apô yə tɨ ŋwu wə́ á náanə nə́ aləŋənə́fɔ lə́.

⁸Ndzaŋ a kə ghɛn nə́ ńkwá lə́, məna mə́ mɛ́n nəkwa pópə mətû mə́ məghə́m mɛ́n mbɛ̌ nə́ nəkwa wǔəə á mbi Mɔ́ Mbéŋ wə́. Ŋwu ntsəmə á mə́m mətû mə́ á túg nəloŋ nə́ məŋkɛd pó ashǎdnə akáŋ pə́ lɔg nə́ gôlə ńtsoŋkə̂ ə́wə́, aleŋə chîə á mə́m ə́wɨ́ tə ńdwɛ́nkə, zə́ələ́ a kə pə́ lə́ achaʼtə́sê pɨ pə́ Əsê. [29]

⁹Pó tíʼ ńdzɔb nkǐ yi fî ə́sóŋə ńgə́, “Gho koʼnə̂ á mə́ twá nə́ aŋwaʼlə yə kádtə zə́, ə́lə́gtə fɨdnû páʼ a chî nə́ wɨ́ ŋ́ŋáʼə zə́ələ́. Ńté ńgə́ pə́ kə jwítə gho, ńdaŋ nə́ nəwû əgho, pə́ lɔgə̂ achǐə azô ńtsóʼə atûə pɨ wə́ á mbô Əsê. Pó fɛ́d lə́ á mə́m əla ətsəmə á mə́m mbîə, ńtsáb ətsáb pipə nɨ́ nə́, ə́ fɛ́d nə́ á mə́m əláʼ pipə nɨ́ nə́, ńkə́ fɛ́lə á mə́m mbô ŋwu məsɔŋ ntsəmə [30]

¹⁰Gho ghɛlə̂ ághɔ́b pópə pəpépə́sê pó faʼ nə́ á mbô Əsê əzɛnə̂. Pó yǒ sáʼ mbîə.”[31]

¹¹Maŋ pɨ ńnáŋ ńdzɨ́ pətseŋpə́ndɛ́pə́sê pó chî ńkoʼ pətɔsə, tə ńdaŋ pətɔsə məŋkɛd mí, pó tɨ́mtə ńdíblə aliʼə́ aləŋənə́fɔ zə́, aliʼ məna mə́ mɛ́n nəkwa, pó mətû mə́ kə chî nə́ wə́.[32]

¹²Ńtíʼə ńdzoobə̂ nə́ tə́kɔʼ ngye ə́sóŋə ńgə́: “Mɔ́ mbéŋ ndzɛd wə́ pə́ kə jwítə nə́ lə́, a koʼnə̂ á mə́ kwá nə́ mətəənə, ə́ kwáalə afoʼə, ə́ kwáalə ayáŋə, ə́ kwá mətɨ mə́ mbəəmə, ə́ kwá ngóʼkə, ə́ kwáalə nəgháʼə, pə́ kə́ ŋ́ŋáŋkə yə́!”

¹³Maŋ tíʼ ńdzóʼ əpú ətsəm Əsê tsoŋkə̂ nə́ á nəpó pó ndu mbî nə́ pi páʼ ə́ chî nə́ á nətɛ́nə ndəsê, pópə pi páʼ ə́ chî nə́ á mə́m nɨ́ nə́ ajúmə atsəmə á jwǐ nə́ á mə́m məmbî mətsəm, pó tíʼə ńdzoobə̂ ə́sóŋə ńgə́: “Á mbô yí páʼ á náanə nə́ aləŋənə́fɔ, mbɨ ḿbə́ nə Mɔ́ Mbéŋ Ndzɛd wə́, pəg ŋáŋkə ághóobə́, ńgóʼkə ághóobə́, əfɛ̂ nəgháʼə á mbô pó, pópə mətəənə, tə mbî yǒ měe!”

¹⁴Məna mə́ nəkwa po kwěe ńgə́, “Amɛn!” Mətû mə́ mə́ tíʼ ńgwǔəə á Əsê əfɛ̂ ngóʼkə.