Read Awing Akyaʼəmə́nuə 6 Bible Online

Akyaʼəmə́nuə 6 - Awing bible

Akyaʼəmə́nuə 6

¹Maŋ tíʼ ńdzɨ́ Mɔ́ Mbéŋ Ndzɛd wə́ a lə́gə ntsɛɛmbiə á mə́m pəfɨdnû pə́ asaambɛ̂ ŋ́ŋáʼkə. Maŋ tíʼ ńdzóʼ táʼə á mə́m məna mə́ mɛ́n nəkwa a tsáb nə́ ngye yitsə̌ ə́ kə chû nə́ pə́ ándó nəfaŋ ńgə́, “Yǐəə!”

²Maŋ pɨ ńnáŋ ńdzə́ənə fúfú ləəmə́. Ŋwunə a nə ńkə nə́ wə́ələ́ a kə túg nkyílə, pə́ kə kə́ ə́fɛ̂ lɛ nəfɔ nə́ yə́. A kə fɛ́d lə́ ándó ŋwunə á maʼ nə́ ntso ńdaŋ, ńkə́ ńgɛn lə́ mə́ maʼ nə́ ntso ə́laŋə̂.[33]

³Mɔ́ Mbéŋ Ndzɛd wə́ á pɨ ńkə́ ńdə́gə fɨdnû a zoŋkə̂ nə́ yi ntsɛɛmbi wə́ ŋ́ŋáʼə. Maŋ pɨ ńkə́ ńdzóʼ na zoŋkə̂ nə́ yǐ ə́ pěʼ nə́ ńtséebə á ntsɛɛmbi lə́ ə́ sóŋ ńgə́, “Yǐəə!”

⁴Yitsə̌ ləəmə́ a kə́ ḿbɨ́ ə́fɛ́lə, ḿbə́ paŋpaŋə. Ŋwunə a nə ńkə nə́ áwɨ́d pə́ fɛ̂ mətɨ nə́ yí ńgə́ yǐ nə́ ntsoolə á mə́m mbîə, ńjî ńgə́ pɨ pə́ jwítə məmbɨ móobə́. Pə́ kə fɛ̂ tə́kɔʼ ŋwéŋ ntso nə́ yə́.[34]

⁵Mɔ́ Mbéŋ Ndzɛd wə́ a pɨ ńkə́ ńdə́gə fɨdnû á zoŋkə̂ nə́ pɛ́n pɛ̌ lə́, maŋ tíʼ ńdzóʼ táʼ na wə́ yitsə̌ a zoŋkə̂ nə́ pɛ́n pɛ̌ lə́ á ghə́ “Yǐəə!” Maŋ náŋ ńdzə́ənə shíshí ləəmə́. Ŋwunə a kə nə́ wə́ələ́ a kə túgə kilo awɛ̂púmə á mbô yə́.[35]

⁶Maŋ kə zóʼ ngye yitsə̌ ə́ chîə pə́ ándó zɨ́d fɛ́lə lə́ á mə́m məna mə́ mɛ́n nəkwa mə́ chî nə́ mbî lə́, zɨ́d sóŋ ńgə́, “Táʼ kilo ngəsáŋ məkálə́ pə́ fóŋ nə́ nə́ wit lə́ nkéebə alěmbîə afaʼə, ngəsáŋ məkálə́ pə́ fóŋ nə́ nə́ bale á pə́ nə́ Kilo teelə́, á pə́ nkéebə alěmbîə afaʼə. Lə́ kɔ tə́mə́sɛ́ nə́ mətǐ mə́ Olif mə́ pópə nkáʼ mətǐ mə́ məloʼ wə́.”

⁷Mɔ́ Mbéŋ Ndzɛd wə́ a pɨ ńkə́ ńdə́gə fɨdnû wə́ á zoŋkə̂ nə́ pɛ́n teelə́ lə́ ŋ́ŋáʼə wə́ələ́. Maŋ zóʼ táʼ na wə́ yitsə̌ a zoŋkə̂ nə́ pɛ́n teelə́ lə́ a ghə́, “yǐəə!”

⁸Maŋ náŋ ńdzə́ənə ləəmə́ mbɨ əjǐ fîə nəyeŋə́ á tə́ nə́ ńkwúkə. Ŋwunə a kə nə́ wɨ́d pə́ kə fóŋə yí lə́ ńgə́ Nəwûə, mbî pəkwû ə́ chîə á ndzəm yí ńdzoŋə̂ yə́. Pə́ kə ghabnə̂ mbî nə́ əliʼ pɛ́n nəkwa ə́fɛ̂ táʼə aliʼə́ á mbô pó ńgə́ pó jwítə á ntsoolə, nə́ njiə, nə́ məghoonə́ pópə məna mə́ təpɔŋə.[36]

⁹Mɔ́ Mbéŋ Ndzɛd wə́ a pɨ ńkə́ ńdə́gə yitsə̌ fɨdnûə á zoŋkə̂ nə́ pɛ́n nəkwa lə́. Maŋ zɨ́ məntɨ́ mə́ pəənə á nətɛ́n nə́ nəpéenə. Lə́ kə pə́ məntɨ́ mə́ pɨ pə́ kə jwítə nə́ ághɔ́b ńté ńgə́ pó kə tə́ náŋkə nkɨ Əsê ńkə́ ḿbɨ́ ńgə́, pó kə tə́ sóŋə anu pó zɨ́ nə́ ńkə́ ḿbí ńgə́ lə́ ndə̌ŋdəŋ lə́, nə́ ntɨ́ əghɔ́b ətsəmə.

¹⁰Pó kə tsáb nə́ tə́kɔʼ ngye ńgə́, “Mmaʼmbî páʼ a tsɛ nə́ ajúmə atsəm, ŋ́ŋwaʼ ńkə́ ńtséebə ndə̌ŋdəŋ! A yǐ chî tə koʼ lə́ ə́lɛ́ gho pɔŋə́ tsɔ́ʼtə əsáʼ pɨ pə́ mbî ńnéŋ ngə́ʼə á mbɨ pó ńté ńgə́ pó kə jwítə áwə́gə́?”

¹¹Pə́ kə fɛ̂ táʼ táʼ fúfú atsəʼə́ á mbô pó pətsəmə, ńtíʼ ə́fiʼtə̂ ághɔ́b ńgə́ po nyáʼ ńjwitə̂ ngǎ pɛ̌, tə ndɛlə́ ándó pə́ yǒ nə́ jwítə ngaŋmə́ko zɨ́ ngaŋə́faʼ Əsê pópə pɔ́ pə́ Klisto tə koʼ ndɛn əghɔ́b pətsəm, tsɔʼə ndzaŋ á kə pěʼ nə́ ńchîə.

¹²Maŋ tíʼ ńdzə́ənə Mɔ́ Mbéŋ Ndzɛd wə́ á lə́gə fɨdnû wə́ a zoŋkə̂ nə́ pɛ́n tâ lə́. Ndəsê tíʼə ńchiʼnə̂, mə́numə sɛlə̂ shíshí ńtíʼə sɛ́nə ándó atsəʼə́ afɨnə, sáŋə á sɛdnə̂ ńtíʼə ḿbaŋə̂ ándó achǐə.[37]

¹³Pɔ́ pə́ sáŋ pó lǒo atǐ ńgwukə̂ á ndu mbîə ándó mənta mə́ atǐ mə́ fig mimə pə́g mə́ tə ńkwɛdnə̂ á ndɛlə́ atyǎntə sə́mə á tə́ nə́ ńkɔ́ʼə.[38]

¹⁴Nəpó nə́ nwáŋə zə́ələ́ ándó aŋwaʼlə yə kádtə nə́ pə̈ tə nə́ ńkéelə, məŋnkwəənə pópə pəkyádkənkǐ fɛ́dkə nə́ əliʼ pó kə chî nə́ ə́wə́.

¹⁵Pəfo pə́ mbî, pəənə ándó pó sáʼ nə́ mbî nə́ pətə́kɔʼ pə́ ngaŋə́póʼnə́tso, pəfoʼ pópə pəmɛ́ pə́ pəənə aláʼə, ńdzoŋ ḿbá əpoʼ ətsəm wɨ́ pópə pɨ pə́ kě nə́ əpoʼ pô, pó tíʼ ńgɛn ḿbántə á mə́m əghəʼ pópə məngwúb mə́ chî nə́ á mətɛ́n mə́ məŋnkwəənə.[39]

¹⁶Pö tíʼə ə́fóŋnə məŋnkwəənə pópə məngwúb ə́sóŋə ńgə́, “Wukə̂ nə́ á ndu pəg ńdyáŋə áwə́g ńjî ńgə́ ŋwunə á náanə nə́ á aləŋənə́fɔ kɔ á zə́ənə áwə́gə́, pəg kə́ ḿbánə azáŋə́ndé Mɔ́ Mbéŋ Ndzɛd wə́![40]

¹⁷Chigə alězáŋə́ndé təpɔŋə azóobə́ a yǐəə, təmbɔʼ lə́ tɨ́ əwə pó zɨ́d póʼnə?” [41]