Read Awing Akyaʼəmə́nuə 7 Bible Online

Akyaʼəmə́nuə 7 - Awing bible

Akyaʼəmə́nuə 7

¹Ndzaŋə anu zəənə́ á nə ńdaŋ nə́ lə́, maŋ zɨ́ pətseŋpə́ndɛ́pə́sê pɛ́n nəkwa pó tɨ́ nə́ məlá mə́ mbî mɛ́n nəkwa ńtə́ ḿbɨnkə̂ pəkəfɨd pɛn nəkwa ńjî ńgə́ kɔ kəfəələ á kɔ́ʼə á mə́m mbî kəənə á mə́m nɨ́ kɨ ńchiʼə̂ atǐ yətsə̌.

²Maŋ tíʼ ńdzə́ənə yitsə̌ ntseŋndɛ̂sê a fɛ́lə á əsáʼ mənu ńtə́ ńkɔ́ʼə ńtúgə aleŋkə Əsê, Əsê páʼ ə́ chî nə́ á mbîə. A kə lɔgə̂ tə́kɔʼ ngye ə́fóŋnə pətseŋpə́ndɛ̂ pə̂ pɛn nəkwa Əsê a kə fɛ̂ nə́ mətɨ nə́ pó ńgə́ pó tsəŋkə̂ mbî ə́wɨ́ pópə nɨ́ lə́.

³Ntseŋndɛ̂sê wə́ a sóŋ ńgə́, “Kɔ nə́ tə́mə́sɛ́ nə́ mbî kɨ nə́ nə́ənə kɨ nə́ atǐ tə ndɛd ə́ yǐ ńkoʼ páʼ pɛn yǐ nə́ leŋkə̂ ngaŋə́faʼ Əsê əzɛ̂n nə́ aleŋkə á nəzeŋnə́ á mbiə atû pó.”

⁴Pə́ tíʼ fiʼtə̂ mə ńgə́ ndɛn pəənə ándó pə́ kə leŋkə̂ nə́ ághɔ́b nə́ aleŋkə Əsê á mbiə atû pó lə́ nə́ ḿbə́ táʼ nkɛd nə́ tɔsə məghə́m mɛ́n nəkwa nə́ tɔsə nəkwa. Pó kə fɛ́d lə́ á mə́m məla mə́ pɔ́ pə́ Islɛl mə́ ntsɔb pɛ̌.

⁵Pɨ pə́ kə néŋ nə́ aleŋkə nə́ pó á mə́m əla Juda lə́ kə pə́ tɔsə ntsɔb pɛ̌, ə́fɛ́lə á mə́m əla Leuben tɔsə ntsɔb pɛ̌, ə́fɛ́lə á mə́m əla Gad tɔsə ntsɔb pɛ̌

⁶ə́fɛ́lə á mə́m əla Asha tɔsə ntsɔb pɛ̌, ə́fɛ́lə á mə́m əla Naftali tɔsə ntsɔb pɛ̌, ə́fɛ́lə á mə́m əla Manase tɔsə ntsɔb pɛ̌,

⁷ə́fɛ́lə á mə́m əla Simeon tɔsə ntsɔb pɛ̌, ə́fɛ́lə á mə́m əla Lebi tɔsə ntsɔb pɛ̌, ə́fɛ́lə á mə́m əla Isaka tɔsə ntsɔb pɛ̌,

⁸ə́fɛ́lə á mə́m əla Zebulun tɔsə ntsɔb pɛ̌, ə́fɛ́lə á mə́m əla Jɔsɛfə tɔsə ntsɔb pɛ̌ ḿbɨ ə́fɛ́lə á mə́m əla Bɛnjamɛn tɔsə ntsɔb pɛ̌.

⁹Ndzaŋ zəənə́ á nə ńdaŋ nə́ lə́, maŋ náŋ ńdzə́ənə tə́kɔʼə apoŋə pɨ pətsə́ páʼ təmbɔʼ ŋwu tsə̌ a kě ághɔ́b pətsəm sháŋ pô, pó kə fɛ́d lə́ á ətú ətúmə, á mə́m məla mətsəm, ntê ŋwu məsɔŋ ntsəmə, ḿbɨ́ ńkə̈ ńtsáb ətsáb əláʼ ətsəmə, ńtíʼ ńgyǐ ńtə́əmə á mbi aləŋənə́fɔ ńkə́ ńtə́əmə á mbi Mɔ́ Mbéŋ Ndzɛd wə́ ńgwê pəfúfú pə́ atsəʼ ńtúgə azáŋə á mbô pó.

¹⁰Pó tɔ́ŋnə nə́ tə́kɔʼ ngye ə́sóŋ ńgə́, “Nchwadkə́ ə́ lǒo lə́ á mbô Əsê əzəg páʼ ə́ náanə nə́ á aləŋənə́fɔ ńkə́ ńdǒ á mbô Mɔ́ Mbéŋ Ndzɛlə!”

¹¹Pɨ pə́ kə tɨ́ nə́ ńdíblə aliʼənə́fɔ zə́ lə́ kə pə́ pətseŋpə́ndɛ́pə́sê pə̂ pətsəm, mətû pópə məna mə̂ mɛ́n nəkwa. Pó tíʼ ńnoŋnə̂ á ndəsê nə́ məshî móobə́ á mbi aləŋənə́fɔ ńtíʼə ńgóʼkə Əsê.

¹²Pó kə tíʼə ə́sóŋə ńgə́, “Amɛn! afoʼə, pó nəgháʼ nə́ ayáŋ ḿbéenə ndǎ á mbô Əsê nə́ ngóʼkə pó mətɨ nə́ apɛ̂ chî lə́ á mbô Əsê əzɛ̂n əghâ ətsəm tə ḿmɛdnə̂! Amɛn!”

¹³Táʼ nətû wə́ yitsə́ a pítə mə ńgə́, “Lɛ̌ mbə̂kə̂ pó maʼ nə́ pəfúfú pə́ ətsəʼ lɛ̌, pó kə́ ńdǒo lə́ ə́fó?”

¹⁴Maŋ kwěe ńgə́, “Maŋ kě jî pô ḿbə́ Tǎ afaʼ, lə́ jî gho.” A tíʼ sóŋə á mbô maŋ ńgə́, “Lɛ̌ pɨ páʼ pó chwád nə́ á mə́m tə́kɔʼə atsaŋkə. Pó sog pəsooko pɔ́b nə́ achǐə mɔ́ Mbéŋ Ndzɛlə, ńgɛd pɨ́d tíʼə ə́fógə.

¹⁵Lə́ ghɛd ə́lɨ́d pö tə́əmə á mbi aləŋənə́fɔ Əsê ə́faʼə̂ á mbô yə́ á ndɛ̂sê á nənumnə pó nətúʼə. Yi páʼ a náanə nə́ á aləŋənə́fɔ yí a yǐ tə́ pyáabə ághɔ́b əghâ ətsəm a chî nə́ ə́wə́.

¹⁶Nji láʼ ńkě ághɔ́b pɨ ńdzáŋ pô, kɨ yi məjî kɨ yi ajú yə nô nə́. Mə́nu kəənə ajûtsə́ á tɔnə̂ nə́ á kě ághɔ́b yǐ tɔ pô!

¹⁷Ńté ńgə́ Mɔ́ Mbéŋ Ndzɛd wə́ a chî nə́ á tətəənə aləŋənə́fɔ zə́ a yǐ pə́ lə́ ntseŋnə əghoobə́, a yǐ nəələ̂ ághɔ́b nə́ məndú mə́ nkǐ mimə sáʼ nə́ mə́ fɛ̂ nə́ nchîmbîə. Əsê yǒ kə́ shíg nkǐmə́g ətsəmə á atû pó.”