Read Awing Akyaʼəmə́nuə 8 Bible Online

Akyaʼəmə́nuə 8 - Awing bible

Akyaʼəmə́nuə 8

¹Əghâ ándó Mɔ́ Mbéŋ ndzɛd wə́ a kə ŋáʼ nə́ fɨdnu wə́ á zoŋkə̂ nə́ pɛ́n ntogə́ lə́, əliʼ kə naʼə̂ á nəpó tə ńkoʼə̂ ándó táʼə akəmə mə́numə.

²Maŋ tíʼ ńdzɨ́ pətseŋpə́ndɛ́pə́sê pɛn asaambɛ̂ pó tə́əmə á mbi Əsê pə́ fɛ̂ məpaŋ nə́ pó mɛ́n asaambɛ̂.

³Yitsə̌ ntseŋndɛ̂sê páʼ a kə túg nə́ ajúmə atoonə́leŋ pə́ lɔg nə́ gôlə ńtsoŋkə̂ ə́wə́ a yǐ ńtə́əmə á mbi nəpéenə. Pə́ kə fɛ̂ aleŋ nə́ yí tə á nə́ənə, ńjî ńgə́ a lɔg ḿbegə̂ achaʼtə́sê pɨ pə́ Əsê wɨ́ ńtíʼ ə́fɛ̂ ázə́ələ́ á ndu nəpá pə́ tsoŋkə̂ nə́ nə́ gôlə, nə́ tə́əmə á mbiə aləŋənə́fɔ lə́.

⁴Ndíʼə aleŋ wə́ ə́ kə fɛ́d nə́ á mbô ntseŋndɛ̂sê lə́, ə́ kə̈ fɛ́lə á mbô yí ńkɔ́ʼə ńgɛnə̂ lə́ pópə achaʼtə́sê pɨ pə́ Əsê. Ntseŋndɛ̂sê wə́ a kə tɨ́ lə́ á mbi Əsê.

⁵Ntseŋndɛ̂sê wə́ a tíʼ ńtwáamə ajúmə atoonə́leŋ zə́ ńdɔg mógə́ á nəpá ńnéŋ wɨ́ tə ə́ lwɛ́nkə á maʼə̂ á ndu mbîə. Nəfaŋ nə́ tíʼə ńdzoolə̂ ə́sáʼkə ḿbəənə̂ ŋ́ŋwaŋkə̂, ndəsê ə́ tíʼə ńchiʼnə̂.

⁶Pətseŋpə́ndɛ́pə́sê pə́ pɛn asaambɛ̂ pó túg nə́ məpaŋ mə́ asaambɛ̂ lə́, pó tíʼə ńchwíʼtə məmbɨ móobə́ á mə́ tɔ́ŋ nə́ mə́ələ́.

⁷Ntsɛɛmbi ntseŋndɛ̂sê a tɔ́ŋ nəjí nəpaŋ, məwəŋ pópə móg ńdzoŋ ńgwɛlə̂ achǐ ə́wɨ́ tíʼə ńkwɛdnə̂ á ndu mbîə. Mbî ghabnə̂ məlá mɛ́n teelə́, táʼ əléemə á kɛ́d ḿměe. Mətǐ mə́ ghabnə̂ məlá mɛ́n teelə́ táʼ əléemə á kɛ́d ḿměe, nəyeŋə́ ntsəm á kə féŋtə nə́ á kə́ ńkɛ́lə.[42]

⁸Ntseŋndɛ̂sê a zoŋkə̂ nə́ á ntsɛɛmbi wə́ á kə́ ńtɔ́ŋ nəjí nəpaŋə. Pə́ tíʼ ḿmaʼə̂ ajûtsə́ páʼ á chî nə́ ándó mɛ́ nkwəənə a tə́ nə́ ńkɛ́lə, á mə́m nə́ənə.

⁹Nə́ənə á ghabnə̂ məlá mɛ́n teelə́, táʼ əléemə á sɛlə̂ yə́ achǐə, məna mə́ chî nə́ á mə́m nɨ́ mə́ ghabnə̂ əkwɛlə teelə́, táʼə akwɛlə a kwúkə. Əpáŋnkǐ ə́ nə ńchî nə́ á nkǐ pɨ́d ghabnə̂ əliʼ teelə́, pə́ tsəŋkə̂ táʼə aliʼə́.

¹⁰Ntseŋndɛ̂sê páʼə a zoŋkə̂ nə́ pɛ́n pɛ̌, a tɔ́ŋ nəjí nəpaŋ mɛ́ mɔ́ sáŋə á fɛ́lə nəpö ńkɛ́lə ándó tɔsəlamə, ńdǒo atǐ ńtsó ńgwǔəə. Mənkǐ pó pəsáʼə́sê ghabnə̂ əliʼ teelə́ á wǔəə á ndu táʼə aliʼə́.[43]

¹¹(Pə́ kə fóŋə sáŋ ghɛn lə́ ńgə́, “ajú yə Lwǐ nə́.”) Mənkǐ mə́ ghabnə̂ əliʼ teelə́, táʼə aliʼə́ á sɛdnə̂ ńtíʼə ńdwǐə, pɨ pə́ nə nô nə́ nkǐ yi wɨ́ pó nə ńkwúkə ńté ńgə́ nkǐ yi wɨ́ kə sɛdnə̂ ńtíʼə ńdwǐə.

¹²Ntseŋndɛ̂sê a zoŋkə̂ nə́ pɛ́n teelə́ lə́ a kə́ ḿbɨ ńtɔ́ŋ nəjí nəpaŋə. Mə́numə á ghabnə̂ əliʼ teelə́ ajûtsə́ á kɔnə̂ táʼə aliʼə́, sáŋə á ghabnə̂ əliʼ teelə́ ajûtsə́ á kɔnə̂ táʼə aliʼə́, pɔ́ pə́ sáŋ pə́ ghabnə̂ əliʼ teelə́ ajûtsə́ kɔnə̂ táʼə aliʼə́. Aliʼ pə́ kə̈ kɔn nə́ lə́, nkyaʼ kě ə́wɨ́ pɛ́lə ńkɛ́lə pô! ənumnə pó nətúʼ nə ńgabnə̂ əkəm teelə́ táʼə akəmə á kě nkyaʼ túg pô.

¹³Maŋ tíʼ ńnáŋ ńdzóʼ mbôʼmə́wú yitsə̌ á tə́ ńdzagə̂ chigə atǐə, ńtíʼə ńtɔ́ŋnə ə́sóŋə ńgə́, “Ndoonə! Ndoonə! ndɔ ə́ chîə á atû ŋwu ntsəmə á chî nə́ mbî əghâ ándó pətseŋpə́ndɛ̂ pə́ pó pɛ́n teelə́ yǐ nə́ tɔ́ŋ məmɔ́b məpaŋə!”