Read Awing Akyaʼəmə́nuə 9 Bible Online

Akyaʼəmə́nuə 9 - Awing bible

Akyaʼəmə́nuə 9

¹Ntseŋndɛ̂sê a zoŋkə̂ nə́ pɛ́n nəkwa lə́, á tɔ̂ŋ nəjí nəpaŋə. Maŋ tíʼ ńdzə́ənə mɔ́ sáŋ páʼ á lǒo nə́ á nəpó ńgwǔəə á ndu mbîə, pə́ fɛ̂ kî pə́ lɔg nə́ ńtsɔ́ʼ ntsoolə atéemə́təndwegtə zə́ wɨ́ lə́ nə́ yə́.

²Mɔ́ sáŋ wə́ a tsɔ́ʼ ntsoolə atá yi ə́wə́, ndíʼ ə́ tíʼ ə́fɛ́lə á mə́m ə́wə́ ándó ndíʼ páʼ ə́fɛ́d nə́ á mə́m mɛ́ tə́kɔʼ mógə́, mə́nu pó nəpó ə́sɛdnə̂ ə́sɛ̂n ńté ndíʼ páʼ ə́ kə̈ fɛ́d nə́ á mə́mə atá yəwə́.

³Ngwumnə́ tíʼ ə́fɛ́lə á mə́m ndíʼ yi əwɨ́ ńtsóolə á ndu mbîə, pə́ tíʼ ə́fɛ̂ mətəənə á mbô zə́ələ́ ándó mi mə́ŋgâsê a túg nə́.[44]

⁴Pə́ nə sóŋə á mbô pó ńgə́ kɔ pó límkə nəyeŋə́ kɨ mətǐə kəənə ajú yə pǐ nə́ yətsə́; pó nə ńchîə á mə́ límkə nə́ lə́ tsɔʼə pɨ pó nə ńkě nə́ aleŋkə Əsê á nəzeŋnə́ pó túg pô.[45]

⁵Ngwumnə́ zɨ ə́ nə ńkě chîə á mə́ jwítə nə́ pɨ pɨ pô, ə́ nə ńchî lə́ tsɔʼə á mə́ nɨd nə́ ághɔ́b nə́ ngə́ʼ nə́ sáŋ tênə. Mbɛ́n páʼ ngə́ʼ yi wɨ́ kə fɛ̂ nə́ nə́ pó ə́ kə chî lə́ ándó mbɛ́n mə́ mə́ŋgâsê á lúm nə́ ŋwunə.

⁶Nə́ sáŋ zɨ tâ pɨ pɨ pó yǐ náŋ ndú ətsəmə á mə́ kwû nə́, ə́ pə́ kě nəwû zɨ́ pô; pó yǐ loonə̂ á mə́ kwû nə́, lə́ nəwûə á pə́ ńkəələ̂ ághóobə́.

⁷Ngwumnə́ yi wɨ́ ə́ chîə ándó pələəmə́ páʼ pó tə́ nə́ ńgɛnə̂ á ntsoolə; Á atû pó, ajûtsə́ á chîə ándó lɛ nəfɔ pə́ tsoŋkə̂ nə́ nə́ gôlə; məshî mɔ́b mə́ chîə ándó məshî mə́ pəənə.[46]

⁸Mənoŋ mə́ atû mɔ́b mə́ chîə ándó mimə pəngyě, məsɔŋ mɔ́b mə́ chîə ándó mimə sáambaŋə.[47]

⁹Pə́ kə kə́bkə ghaŋ əghɔb nə́ ajûtsə́ á chî nə́ ándó kɨ́ʼ ntso ghaŋ yə atəənə́, mbab mɔ́b mə́ zoolə̂ ándó pəmuto pipə nɨ́ nə́ páʼ pələəmə́ pə̈ soŋ nə́ ńgɛnə̂ á ntsoolə.[48]

¹⁰Pó túg əsaŋə́ ándó pi mə́ŋgâsê, mətû mə́ əsaŋə́ pɔ́b kə́ ńchîə ándó pi mə́ŋgâsê, mətɨ móobə́ á mə́ límkə nə́ ŋwu nə́ sáŋ tâ mə́ chî lə́ asaŋə́ pó.

¹¹Pó túgə əfo páʼ ä sáʼ nə́ ághɔ́b, páʼ a pə́ nə́ ntseŋndɛ̂sê páʼ a pyáb nə́ atéemə́təndwegtə. Əlɛ́n əyí nə́ Iblu lə́ ńgə́ Abadɔnə; ńkə́ ḿbə́ nə́ Glik ńgə́ Apolyɔnə (páʼ ə́ sóŋ nə́ lə́ ńgə́, “Ntsəŋkə”).

¹²Ntsɛɛmbi ndoonə a kə laŋə̂, ńdzoŋə̂ á ndzəm zɨ məndɔ mɛ́n mbɛ̌ mə́ pɛ́lə mə́ yǐ nə́ pɨ yǐəə.

¹³Ntseŋndɛ̂sê a zoŋ nə́ pɛ́n tâ lə́ á tɔ̂ŋ nəjí nəpaŋə. Maŋ zóʼ ngye yitsə̌ ə́ fɛ́lə á mə́m məlá mɛ́n nəkwa á nəpá pə́ tsoŋkə̂ nə́ nə́ gôlə nə́ tə́əmə á mbi Əsê lə́.

¹⁴Ngye yi wɨ́ ə́ sóŋə á mbô ntseŋndɛ̂sê a zoŋ nə́ pɛ́n tâ páʼ a túg nə́ nəpaŋ lə́ ńgə́, “Kyag nə́ pətseŋpə́ndɛ́pə́sê pə́ nəkwa páʼ pə́ kwúd nə́ ághóobə́ á mɛ́ nkǐ Ufeletis!”

¹⁵Pə tíʼ fóg pətseŋpə́ndɛ́pə́sê pə́ nəkwa páʼ pə́ nə ńkwúd nə́ ághɔ́b lə́. Pə́ kə tyáŋtə ághɔ́b pó tɨ́ ńkoʼnə̂ á mə́ jwítə nə́ táʼə aliʼə́ á mə́m ŋwu məsɔŋ ntsəm pə́ ghabnə̂ nə́ əliʼ teelə́, á mə́m táʼ mə́nu yi wɨ́, nə́ alěmbî yə wɨ́, nə́ sáŋ yi wə́ á ngoʼ ḿbí yi wə́.

¹⁶Pə́ nə fiʼtə̂ mə nə́ ndɛn ngaŋə́maʼə́ntso ə́ nə ńtɨ́ nə́ ńkoʼnə̂ á mə́ ghɛn nə́ á ntsoolə, pó nə ḿbə́ lə́ pəmiliyɔnə nkɛd pɛ̌.

¹⁷Á mə́m ndzəəmə atəəmə́tə́əmə mə, maŋ nə ńdzɨ́ pələəmə́ pópə pɨ pə̈ kə nə pɨ́d, pó nə ńtúg pəkɨ́ʼ pə́ ntso pə́ ghaŋ páʼ pə́ paŋ nə́ ándó mógə́, mbɨ əji ə́ sɛ́nə ándó ngɔʼ yi səglə̂ nə́ yitsə̌ pə́ fóŋə nə́ safaya, ḿbɨ́ əji kə́ ḿbɨ ńchîə ándó yə amúʼ yə paŋ nə́. Ətû pələəmə́ pipə wɨ ə́ nə ńchîə ándó ətû pəsáambaŋə, móg pópə ndíʼ nə́ ajûtsə́ á kɛ́d nə́ ńchîə ándó mbəəmə amúʼ yə paŋ nə́ ə́fɛ́lə á mə́m məntso pó.

¹⁸Pə́ nə ńgabtə̂ ŋwu məsɔŋ əliʼ teelə́, əpúmə́tsəŋkə ŋwu məsɔŋ pɨ teelə́ jwítə táʼə apagə; pə́ kə jwítə ńdaŋ lə́ nə́ əpúmə́tsəŋkə ŋwu məsɔŋ pɨ teelə́ ə́ pə́ nə́ móg, ndíʼ, ḿbɨ ḿbə́ nə́ ajú zə́ mbɨ əjǐ chî nə́ ándó amúʼ yə paŋ nə́ lə́ páʼ ə́ kə fɛ́d nə́ á ntso pələəmə́ pə́.

¹⁹Mətɨ mə́ pələəmə́ mə́ chî lə́ á ntso pó, pó əsaŋə́ póobə́, əsaŋə́ əpɔ́b ə́ chî lə́ ándó mənó mə́ túg nə́ ətûə, pó lɔg əsaŋə́ pəwɨ́ ńdímkə pɨ ə́wə́.

²⁰Apuʼə pɨ pə́ mbî, páʼ əpú pɨ nə ńkě nə́ ághɔ́b jwítə pô, pó nə ńkě sɛdnə̂ á ndzəm əpú pó kə tsoŋkə̂ nə́ ńgóʼkə lə́ pô, kɨ ḿmɛdtə̂ á mə́ tə́ nə́ ə́sə́əkə pəpɛ̌sê kɨ məsê mə́ məfɨgə páʼ pə́ tsoŋkə̂ nə́ nə́ gôl, sɛləba, bəlonə, nə́ ngɔʼ kɨ nə́ atǐə, páʼ pó kě nə́ əliʼ zə́ənə ńkě zóʼə kɨ ńnyinə̂ pô.[49]

²¹Pó nə ńkě kə́ ńkwúblə məntɨ́ mɔ́b ə́fɛ́lə á mə́m mə́ tə́ nə́ jwítə pɨ, á mə́m məkaŋ mɔ́b, kɨ á mə́m ndzɔʼə́ tə apímnə kəənə á mə́m əzə̌ əghɔ́b pô.