Read BIBILLYA Mareiyo Meele a Iruva Mapookyony 11 Bible Online

Mapookyony 11 - BIBILLYA Mareiyo Meele a Iruva bible

Mapookyony 11

¹Ulana loose mmbo lwetiri kishomu kimwi na marero maangu.

²Kyeeri vandu valesamya uka taari ya ngaminy vakalollya uruka lurambalalyi efo Babilony vakakaafo.

³Vakaumburana, “Ndeny, lusongosie matofari eekora na muro nisha. Mmbo vetiri matofari ando a mawe, na lami ando a yeela.

⁴Vakaamba, Naasa ndeny lutane muri, na uroro lwa vayo lufike iruveeu, luwoni irina iniini, naambo lulasheenyanyaka urukeny koose.”

⁵Nndumi Iruva kaoloka nashelola muri eto na nnara eto vana va vandu vemma yuutana.

⁶Nndumi Iruva kaamba, “Lola! Vandu yeva mmbamwi na kishomu kyawo nkimwi, neefyo mfyo vakundye ipooka itana, naambo kulave-fo nndu aidima ipaaya ekyo valangye ikitana!

⁷Ndeny looloke nafo, lutarakanise kishomu kyawo vare valamannyana wo veni.”

⁸Naasa Nndumi Iruva kavanyanyata vakwaani urukeny koose; valakidimese itana muri ulya.

⁹Naasa irina lya vayo lyikavaangwa Babeli, nkyeyaamba nng'u Ndumi Iruva aletarakanisya kishomu kya ulana loose; na Ndumi Iruva kavanyanyata veende ulaniny koose.

¹⁰Elu llo ufyari lwa Semu. Semu mmbo etiri myaaka iyana kaira Arifakisadi myaaka ivii numa ya mura ulya.

¹¹Semu ekiira Arifakisadi kakaau myaaka mayana araanu, keera vana va kyuumi na va kyika.

¹²Arifakisadi kakaa myaaka makumi araru na iraanu kaira Sela.

¹³Ekiira Sela Arifakisadi kakaa myaaka mayana aana na iraaru, kaira vana va kyuumi na va kyika.

¹⁴Sela kakaa myaaka makumi araaru kaira Eberi.

¹⁵Ekiira Eberi Sela kakaa myaaka mayana aana na iraanu, keera vana va kyuumi na va kyika.

¹⁶Eberi kakaa myaaka makumi araaru na iina kaira Pelegi.

¹⁷Eberi ekiira Pelegi kakaa myaaka mayana aana na makumi araaru, kaira vana va kyuumi na va kyika.

¹⁸Pelegi kakaa myaaka makumi araaru kaira Reu.

¹⁹Pelegi ekiira Reu kakaa myaaka mayana avii na kyeenda kaira vana, va kyuumi na va kyika.

²⁰Reu kakaa myaaka makumi araaru na ivii keera Serugi.

²¹Reu ekiira Serugi kakaa myaaka mayana avii na mfungare, kaira vana va kyuumi na va kyika.

²²Serugi kakaa myaaka makumi kaira Nahori.

²³Serugi ekiira Nahori kakaa myaaka mayana avii, kaira Vana va kyuumi na va kyika.

²⁴Nahori kakaa myaaka makumi avii na kyeenda, kaira Tera.

²⁵Nahori ekiira Tera kakaa myaaka iyana na ikumi na kyeenda, kaira vana va kyuumi na va kyika.

²⁶Tera kakaa myaaka makumi mfungare, kaira Abramu, na Nahori na Haran.

²⁷Na elu llo ufyari lwa Tera. Tera kaira Abramu, na Nahori na Haran. Haran kaira Loti.

²⁸Haran kapooka ifwa ngota ndeeye Tera urukeny lulya alewonikya, llo uruka lwa Vakaldayo.

²⁹Abramu na Nahori vakaipoo vaka. Irina lya nka wa Abramu evaangwa Sarai, na irina lya nka wa Nahori ni Milka, mfu wa Haran, mmbwe eto ekee ndeeye wa Milka na wa Iska.

³⁰Na Sara ekee kyuumba, nalatiri mwana,

³¹Tera kaipo mwana wakwe Abramu, na Loti mwana wa Haran, mwana wa nsero wakwe, na nkaakwe Sara, nka wa mwanaakwe Abramu, vakasama woose Uru efo urukeny lwa Vakaldayo, veende urukeny lwa Kanaani vakafika Haran vakakaafo.

³²Myaaka ya Tera ikava mayana avii na iraanu. Tera kafiiya efo urukeny lwa Haran.