Read BIBILLYA Mareiyo Meele a Iruva Mapookyony 12 Bible Online

Mapookyony 12 - BIBILLYA Mareiyo Meele a Iruva bible

Mapookyony 12

¹Nndumi Iruva kavia Abramu, “Kwiipoo kuuke kunu urukeny lwafo, na ufyari lwafo na va mmba ya ndoo, kwende kundefika urukeny elo nshekoraa.

²Neeny nshekwallwaa ufyari uniini, shikuwikye mbora, nsheng'anisa irina lyafo neewe kuwe mbora;

³vekuvikya mbora neeny nshevavikyaa mbora, neeto akudengaa neeny shindenge, neefo kwafo mfo ngyufyari toose ta ulana tishevikyoo mbora.”

⁴Kyasia Abramu keenda shaasa Nndumi Iruva alemmbia, Loti keenda amwi nawe. Nawe Abramu etiri myaaka makumi mfungare na iraanu kyeeri euka Haran.

⁵Abram u keepoo nkaakwe Sarai na Loti mwana wa mwanamaye, ando amwi na findo fyawo fyoose vetiri, na vandu yewo valewonisa efo Haran, vakauka-fo naambo veende Kanaani, nao vakaanga urukeny lwa Kanaani.

⁶Abramu keera nnang'ani ya uruka kafika ando kweele kwevaangwa Shekemu; kutiri nri va mwaloni va More. Na Vakanaani kyeeri ekyo mmbo vekaa urukeny elo.

⁷Nndumi Iruva kakoora na Abram efo yooryeny kammbia, “Ufyari lwafo nshevaningaa uruka elu.” Nawe katannya-u Nndumi Iruva kitara kyeerasya yeto alekoora nawe.

⁸Naasa kooka-u keenda ifumbuny lyikee taari ya ngaminy ya Beteli, kareiya-u yeema lyakwe; taari ya nkwaany, na Ai taari ya ngaminy, katannya-fo Nndumi Iruva kitara kyeraasya, kavaangya-u irina lya Nndumi Iruva.

⁹Abramu keepoo kyaaro keengera yeenda taari ya Negebu.

¹⁰Naasa kukakaafo shaa kulya urukeny lulya, Abramu kasoka na Misri, naambo nakaefo kyaangu, mashika elyi shaa yeng'ani nnu urukeny.

¹¹Naasa kufii nafike Misri, kavia nka-wakwe Sarai, “Kwiishi, yewe mmbo kukee nka mweremutu.

¹²Naasa kyeeri Vamisri vashekulollyaa, mmbo vashaamba, ‘Yeu ni nka-wakwe, nawo mmbo vashiwaa, neewe vakure na muu;’

¹³Shakutereva kwaambe mmbo kukee mfwama, kive kisha kyakwa kyeendwa ni yewe, neeny shikae na muu kimaruma kyafo.”

¹⁴Naasa Abramu ekifika Misri, Vamisri vakalollya sheelyi nka yeto mmbo akee mweremutu nnu.

¹⁵Vasongoru va Farao vakallolya vakamwitikisya kwa Farao, naasa nka ulya kaipowa karawa mmba kwa Farao.

¹⁶Nawe kimaruma kya Sarai katannya Abramu mesha Farao kaniinga Abramu moonri, na ng'umbe, mishungu ya kyuumi, na ya kyika, mashinga a kyuumi a kyika na ngamula.

¹⁷Kyeendi Nndumi Iruva kakapa Farao na va mmba yakwe, kyeendwa ni Sarai we nka wa Abramu.

¹⁸Naasa Farao kavaanga Abramu kammbia, “Nkyoki ekyi kwashitannya? Nkyiki elyi kulaore kuleshivia yeu ni nka-wafo?”

¹⁹“A nkyiki elyi kuleamba yeu ni mfwamau, kutani shamwipoo kava nka wakwa? Naasa ulaalu, ipoo nka wafo, kweenda.”

²⁰Farao kavavasya vandu vamwiimyi ando amwi na nka-wakwe, na wo kindo ekyo etiri.