Read BIBILLYA Mareiyo Meele a Iruva Mapookyony 15 Bible Online

Mapookyony 15 - BIBILLYA Mareiyo Meele a Iruva bible

Mapookyony 15

¹Numa ya findo efyo irero lya Nndumi Iruva lyikasheya Abramu yooryeny lyikammbia, “Kulairyee-fo Abramu, yeny mmbo shikee ngawo yafo, na waavi lwafo lwa pya lushevaa uniini nnu.”

²Abramu kaamba, “Woi Nndumi Iruva, a nkyokyi kushiniingaa? Neen nshikukaye indo shilatiri mwana, na yeto ashevaa muya ding'u wakwa ni Elieseri yeu wa Ndameski”

³Abramu kaamba, “Lola, nkuleshiniinga ngyeri-fo, na ishinga yeto awonikye kyeny kwakwa mbwe muya dingu wakwa.”

⁴Nalyo irero lya Nndumi Iruva lyikansheya lyikammbia, “Elieseri ishinga Yeu nnyashetiraa ding'u yafo-fo, kuuta mwana wafo kumuni mmbwe yeto ashevaa muni ding'u yafo.”

⁵Kansomuta poo, kammbia, “Ulaalu lola iruveeu kwekeni nyinyiri kwamiidima iteekyena. Kammbia, Ni indo ufyari lwafo lushevaa.”

⁶Kairikya Nndumi Iruva. Nawe kamwekyennya usumanu kimaruma kya vayo.

⁷Keengera immbia, “Yen ni Nndumi Iruva, shilekuuta kulya Uru lwa Vakaldayo shikuniinge uruka elu luve ding'u yafo.”

⁸Kaamba, “Ale Nndumi Iruva, mmbo shimanyaa inda uruka elu lushevaa ding'u yakwa?”

⁹Kammbia, “Sheengye ngashe ya taa ya myaaka iraru, na savana ya myaaka iraru, na suva ya myaaka iraru, na mbeta, na yaana lya mbuku.”

¹⁰Kamweengye efyo fyoose, kafipara nnang'ani kavii, wo kiparwe kakivika kikakulola neekyo kyingyi, lyo ndeye nnyaletipara-fo.

¹¹Kyeeri mamutony alesha-u, ilya minying'a Abramu kaombuta.

¹²Na kyeeri mwi wekeeoloka, Abramu kasheyo rwe shiroo, weerei na ireema fikansheya.

¹³Nndumi Iruva kavia Abramu, “Manya ufyari lwafo mmbo lushevaa weny urukeny lulakee lwavo, vasherundya vandu yewo na ilyiswa ukiva ando a myaaka mayana aana.

¹⁴Naasa vandu yewo vashevarundyaa nshevakapaa, numa vashekupo-fo verye masaa meengyi.

¹⁵Kya indi yewe mmbo kushewuyaa kwa vandoo na ufoo, kufwe na irikwa kwiitiri ukuu usha.

¹⁶Na irika lya kaana lyishewuyaa yaa, mashika uravi lwa Vaamori llwalemanda-fo.”

¹⁷Naasa kyeeri kya nkwaany ireema lyikaoloka, kipalapala kya muro na nsu fikakora nyama ilya.

¹⁸Nkonu eto Nndumi Iruva kavika kyaasa na Abramu, kaamba, “Ufyari lwafo mmbo shaluninga uruka elu, uka mura va Naili wa urukeny lwa Misri kukooye mura yeto nniini wa Frati,

¹⁹Mkeni, Mkenisi, Mkadmoni,

²⁰Mhiti, na Mperisi na Mrefai,

²¹na Mwamori, na Mkanani, na Mgirgashi na Myebusi.”