Read BIBILLYA Mareiyo Meele a Iruva Mapookyony 16 Bible Online

Mapookyony 16 - BIBILLYA Mareiyo Meele a Iruva bible

Mapookyony 16

¹Naasany Sarai nka wa Abramu nalamwirye mwana. Kyeendi etiri kishinga kya Misri, evangwaa Hajiri,

²Sarai kavia, Abramu, “Naasany Iruva anshifinga shilaoni mwana, warya kishinga ekyi kyakwa, kukee nawe kulakooye nsheonisaa-fo ufyari Abramu keerikya.”

³Sarai nka wa Abramu keepoo Hajiri Mmisri kishinga ekyo kyakwe, kanrammbikya Abramu nawe nka wakwe. (Kyeeri Abramu enkaa urukeny lwa kanaani myaaka ikumi.)

⁴Naasa kawarya Hajiri nawe kakufinga. We muni llya alelollya ekufingye, kamina Sarai.

⁵Sarai kavia, Abramu, “Ukasha elu luleshikooya lukukaye yewe; mmbo shilekurambikkya kishinga ekyi kyakwa kipooteny kyafo, nawe ekilollya, ankufinga, yeny nshilekiva kindo mbee yakwe-fo. Nndumi Iruva narummbwe kindo ekyi nnang'ani yakwa na yewe!”

⁶Nawe Abramu kavia Sarai, “Lola, kishinga kyafo mmakony afo kikai ntanyi kisumani shaasa kulollye.” Sarai kallyisa ukiva kutani nawe arisha.

⁷Nsu wa Nndumi Iruva kallollya kulya usokeny yefo kasa, usoka lukee mbai ya shia ya yeenda Suri.

⁸Kammbia, “Yewe Hajiri kishinga kya Sarai, nkwi kwauka, na nkwi kukeenda?” Kammbia, “mmbo shikeerisha shuuke kisanguny kya nkyeku wakwa Sarai.”

⁹Nsu wa Nndumi Iruva kammbia, “Wuya kwa nkyeku wafo, kwiikunyiisye.”

¹⁰Nsu wa Nndumi Iruva kammbia, “Nkya dede nshefumbutaa ufyari lwafo, nta lluvaa yeekyena shaasa luvaa wiingyi-fo.”

¹¹Nsu wa Nndumi Iruva kammbia, “Lola, yewe mmbo kukufingye ulaalu, mmbo kusheiraa mwana wa kyuumi, nawe kushembangaa irina lyakwe ni Ishmaeli, mashika Nndumi Iruva ammiita kiyyo kya ukiva lwafo.

¹²Nawe mmbo ashevakaa itiko mbee ya vandu veengyi, nawe ashekaa ngapanuny na vandu vengyi, nawe ashekaa mbee ya vana va maye woose.”

¹³Kasenda irina lya Nndumi Iruva yeto alerera nawe, “Yewe kukee Iruva alollye, mashika aleamba, fika yaa mmbo shilelollya yeto ashilollye yeny!”

¹⁴Naasa Kirori ekyo kya mura kikavaangwa Beer lahai-roi. Nakyo mmbo kyikee nnang'ani ya Kadeshi na Beredi.

¹⁵Hajiri kairya Abramu mwana wa womi; Abramu kamfishya irina lyakwe ni Ishmaeli, mwana yeto wa kyuumi Hajiri alemwiirya.

¹⁶Nawe Abramu etiri myaaka makumi nyanya na irindaru kyeeri Hajiri alemwirya Ishmaeli.