Read BIBILLYA Mareiyo Meele a Iruva Mapookyony 17 Bible Online

Mapookyony 17 - BIBILLYA Mareiyo Meele a Iruva bible

Mapookyony 17

¹Kyeeri Abramu ekee nndu wa myaaka makumi kyeenda na kyeenda, Nndumi Iruva kasheya Abramu kammbia, “Yeny ni Iruva Muni finya shoose; salala mbee yakwa kuve nsongovisi.

²Neeny nshivikaa kyaasa kyakwa na yewe, na yeny nshekufumbutaa nnu deny.”

³Abramu kafirya ndi kisangu kyikapaana si. Iruva kammbia,

⁴“Yeny shammbika kyaasa kyakwa na yewe, neewe kushevaa nde wa ngyufyari shiingyi!

⁵Nta irina lyafo nkushevaangwaa-se Abramu-fo, kyaindi ulaalu irina lyafo ni Abrahamu, mashika shankuvika kuve nde wa masanga meengyi.

⁶Nshekwaallwaa kutire ufyari uniini nnu, na Wamangyi vasheparikaa kwafo yewe!

⁷“Kyaasa kyakwa na yewe shikivangisaa, na ufyari lwafo lwa numa na vana vawo, kive kyaasa kya llung'anu, sheelyi mmbo shikee Iruva wafo na wa ufyari lwafo lwa numa.

⁸Neeny nshekuningaa yewe na ufyari lwafo uruka elu kukee-fo ulaalu, uruka loose lwa Kanaani, luve ushilyi lwany llung'anu, neeny nshevaa Iruva waawo”.

⁹Iruva kavia Abrahamu, “Neewe lyo kutire kyaasa kyakwa, yewe na ufyari lwafo na vana vawo.

¹⁰Ekyi nkyo kyaasa kyakwa kushekitiraa, yewe na yeny, na ufyari lwafo, wo nndu nndumi kwany mmbo asherinwaa.

¹¹Mmbo musherinwaa, murumbwe ishong'u lya kimaama na kindo ekyo mmbo kishevaa wende lwa kyaasa kyakwa neeni.

¹²Mwana wa kyuumi wa mikonu nyanya kwany narinwa wo nndu nndumi efo ngyufyariny tany, yeto awonikkye kwany, neeto akee muure na fesa tafo na yeto moose akee muny nalakee wa ufyari lwafo.

¹³Mwana mmbee kyeny kwafo, neeto akee muure na fesa kuti narinwa, na kyaasa kyakwa kishekaa mwiliny wany, kive kyaasa kya llung'anu.

¹⁴Na nndu nndumi nalakee nrini, nndu yeto mmbo ashelakaniswaa na vandu vengyi; mmbo afisha kyaasa kyakwa.”

¹⁵Iruva kavia Abrahamu, “Nawe Sarai nka wafo nkushekimmbaangaa Sarai-fo, mashika irina lyakwe lyishevaa Sara.

¹⁶Neeny nshembikkyaa mbora, na lyingyi nshekuningaa mwana wakwe, yee, nshembikkyaa mbora, nawe ashevaa maye wa masanga, na vamangyi va ngyufyari vasheukaa kwakwe!”

¹⁷Naasa Abrahamu kawa si kifulufulu kaseka efo nriminy, kaamba, “A ndesa, kwa nndu wa myaaka iyana awonikaa-fo mwana? Nawe Sara akee wa myaaka makumi kyeenda ashiraa mwana?”

¹⁸Abrahamu kavia Iruva, “Kulakooye Ishmaeli mmbwe kwemwirikyaa!”

¹⁹Iruva kaamba, “Nshi indo-fo, lyo Sara nka wafo ashekwiiryaa mwana wa womi, na irina lyakwe kushemmbangaa Isaki. Neeny yoo kwakwa nshekaarisya-u kyaasa kyakwe kive kyaasa kya llung'anu kimaruma kya ufyari lwakwe lwa numa yakwe.

²⁰Na kya Ishmaeli, shamkwirannya, shammuvikya mbora shimfumbute neengereke nnu deny. Asheiraa vamangyi ikumi na vavii, nawe nshembikaa nave ufyari uniini nnu.

²¹Kyeendi lyo kyaasa kyakwa mmbo nshekikaarisyaa yoo kwa Isaki da, yeto Sara ashekwiiryaa kyeeri sheekyi mwaka ushaa.”

²²Iruva kamanda irera nawe, kasaama ooka kwa Abrahamu.

²³Abrahamu kaipoo Ishmaeli na yewo woose vewonikye kwakwe na yewo vekee woore na fesa woose, womi woose va mmba ya Abrahamu kavarina nkonu ulya mweni, shaasa Iruva alemmbia.

²⁴Nawe Abrahamu etiri myaaka makumi kyeenda nakyeenda kyeeri erino.

²⁵Na mwana yeto wakwe Ishmaeli etiri myaaka ikumi na iraru kyeeri erino.

²⁶Nkonu yeto mweni Abrahamu karino ando amwi na mwana wakwe Ishmaeli.

²⁷Na vandu woose va mmba yakwe, vawonikye kyeny kwakwe, na yewo woore na fesa uka wokony, vakarino ando amwi nawe.