Read BIBILLYA Mareiyo Meele a Iruva Mapookyony 18 Bible Online

Mapookyony 18 - BIBILLYA Mareiyo Meele a Iruva bible

Mapookyony 18

¹Nndumi Iruva kasheya Abrahamu alya kufii na Ngorosho ya Mamre, kyeeri ekee rembo yoo mwangony wa yeemeny lyakwe nsanyiny mwi wivaa.

²Kaipoo miso kalla, kalollya vandu vararu vasalalyi mbee yakwe. Nawe ekivalollya karisha indevaambya, auka alya mwaangony wa yeema, kakwiinyika kafika si.

³Kaamba, “Nndumi Iruva wakwa, kwakooya shimusennyi misony any mulashiire ulaalu yeny ishinga lyany-fo.

⁴Reny weendwa mura munnnywa musangye marende[4] any, mwimuye yaa kwasi ya nri yeu.

⁵Neeny sheende shoonga shaangu muviirye nrima muu, numa mweendeny, kwakooya mmbo mwasheya ishinga lyany” Vakaamba, “Nkisha, tana shaasa kwaamba.”

⁶Naasa Abrahamu kaangusya uviny kaanga na efo yemeny kwa Sara, kaamba, “Itika! Ipoo kilo isaru ta nswa mmamiri kusongosie mikate.”

⁷Abrahamu karisha kafika usirony, keendefo ngashe shimamiri ya ng'umbe shisha kainiingya nndundi, kavavasya ideesywa.

⁸Kaipoo malela, na nyama ya ngashe ilya aleideesya, kavika mbee yaawo. Kasalala mbee yaawo yoo si ya nri ulya ivafurukannya nawo vakalya.

⁹Vakammbia, “Nka wafo Sara nkwi akai?” Kaamba, “Akee kulya yeemeny.”

¹⁰Kammbia, “Nkya dede nshekuwuiyaa kyeeri sheekyi kyeni mwaaka ushaa, na lola, nka wafo Sara asheonisaa mwana wa womi.” Sara kakiita eekee mwangony wa yeema yoo numa yakwe,

¹¹Naasa Abrahamu na Sara vemmikwa, irika lyawo lyikava iniini, na Sara emmaa imanda na ngata ya kyika.

¹²Naasa Sara kaseka nriminy wakwe, kaamba, “Shammeva nkyeku na mmi wakwa ammikkwa, nkyuumu kweeru iira mwana.”

¹³Nndumi kavia Abrahamu, “Nkikyi elyi Sara aseka kaamba vai, ‘yeny dede shiwonaa mwana,’ neeny shamma ikkwa?”

¹⁴Ni irero lyingalyi lyiifo lyikee yuumu lyilemi Nndumi Iruva? Elyi kyeeri kya vayo nshekuwuiyaa kyeeri kya nnsaka sheekyi kyeni mwaaka ushaa na Sara asheiraa mwana wa womi.

¹⁵Sara kalema fushu, kaamba, nshaleseka-fo, kimmba aleiryaa. Nawe kammbia, “Mmbongo, kwanseka.”

¹⁶Naasa vandu yewo vakauka-fo veshorisaa fisangu fyawo Sodomu. Abrahamu keenda eriani nawo eveemyaa.

¹⁷Nndumi Iruva kaongwa, “A shasuruma Abrahamu kindo nkeekitana?

¹⁸Kwakooya Abrahamu ashevaa ufyari uniini, lutiri finya na yoo kwakwe ngyufyari toose ta ulana tishevikyoo mbora.

¹⁹Mashika shillolye we mmbwe yeto ashesalallyaa vana vakwe, na va mmba yakwe vasore shia ya Ndumi, vasore dede na usumanu, naambo Nndumi Iruva nawe nainutye Abrahamu fyaasa fyakwe.”

²⁰Nndumi Iruva kaamba, “Kimmba kiiyo kya Sodomu na Gomora kyannanga, na ngyulyamari tawo tamfumbuka nnu.

²¹Naasany, kuti shooloke ulaalu shilole kwakooya efyo vakeetana fiinani na kiiyo ekyo kileshifikya; kwakooya nshi indo, shimanyaa.”

²²Kyasia vandu valya vakauka-fo vevinngyaa Sodomu, kyeendi Abrahamu kakaa usumanu na Iruva.

²³Abrahamu kasembea kufii kammbia, “A mmbo kusherumataa yeto wa usumanu kunsande na yeto nravi?

²⁴Kungyi veefo makumi araanu va usumanu efo muriny, kulyamare, nta kure kulasarya muri yeto kyeendo ni yewo makumi araanu va usumanu veefo?

²⁵Oode kulatani indo-fo, kuwaa yeto wa usumanu na yeto nravi! Yeto wa usumanu nave sha yeto nravi! Oode mwisalallya ulana nare nalatana usumanu?”

²⁶Ndumi kaamba, “Shankooya efo Sodomu va usumanu makumi araanu muriny, mmbo nsheraa koose kimaruma kyawo.”

²⁷Abrahamu karouwa, kaamba, “Naasa shanfura irera na Nndumi Iruva, llyo shikee kiluulyi na ifu tupu.

²⁸Kulakooye vasheangwa-u varaanu alya makuminy araanu vatiri usumanu, a mmbo kushelyamaraa muri moose elyi vamaangwa-u varaanu?”

²⁹Keengera irera nawe lyingyi eshambaa, “Kweenda vashekooyofo makumi aana?” Kaamba, “Nshitanaa kindo kimaruma kya yewo makumi aana-fo.”

³⁰Kaamba, “Nndumi Iruva nalasheiswa neeny, kya indi shireraa da, shaambe, kungyi vashelollywa-fo makumi araru.”

³¹Kaamba, “Lola, shilangye irera na Nndumi Iruva, kungyi vashekooya-fo makumi avii?” Kaamba, “Kimaruma kya yewo makumi avii nshishelyamaraa-fo.”

³²Kaamba, “Nndumi Iruva nalasheiswa neeny mmbo shireraa lyimwi nsi ulaalu, Kungyi vashelollywa-fo ikumi.” Kaamba, “Kimaruma kya yewo ikumi nshishelyamaraafo.”

³³Naasa elyi Nndumi Iruva alemaa irera na Abrahamu, keenda; na Abrahamu kawuya kyeny kwakwe.