Read BIBILLYA Mareiyo Meele a Iruva Mapookyony 2 Bible Online

Mapookyony 2 - BIBILLYA Mareiyo Meele a Iruva bible

Mapookyony 2

¹Naasa mashora a yuumba iruveeu na ulana na fyoose fiiyo akamarisywa, amwi na matorito a vayo moose.

²Nkonu wa mfungare, Iruva kaimuya kara irunda mashora moose.

³Iruva kauvikya mbora, nkonu wa mfungare kauvika mweele, nkonu eto kaimuya, kara irunda mashora.

⁴Nnyendo iruveeu na ulana fileumbwa. Nkonu ulya Nndumi Iruva alepooka yuumba iruveu na ulana,

⁵nkwei-fo mooro nta unyany lwa mbuveny lwemmimya-fo, mashika Iruva nyeleende mbua-fo, nta nkweifo nndu wa irema-fo.

⁶Nnsiny ukasaama ukanisa sumbai,

⁷Naasa Nndumi Iruva kaipoo uteeri yoo sumbai kaumba nndu kambuya mumuyo wa muu, efo mmbweny nndu katira muu.

⁸Nndumi Iruva karonga nnda efo Eden, taari ya ngama, kavika-fo nndu eto alemwuumba.

⁹Nndumi Iruva, kamiisa efo sumbai miri misha ivikaa ndunda shisha, eto usenyi miso uvaa ilya na nri wa muu kauvika nnang'ani kavii ya nnda ulya, na nri wa urango lweemanya mesha na makasha.

¹⁰Usoka lwa mura ukasokkya Edeni, naambo unise nnda ulya, na kuuka-u ukakwaava iva mira iina.

¹¹Wa mbee ni Pishoni; nto uringitye uruka lwa Havila, efo kutiri saabu;

¹²Saabu ya uruka elo nshisha, efo kukavekaa-fo mafura afwaamaa nisha na mawe a wuuru uniini.

¹³Na mura wa kavii ni Gishoni nto uringitye uruka lwa Esopia.

¹⁴Irina lya mura wa kararu ni Trigrisi nto wiirye taari ya ngama ya uruka lwa Ashuru. Na mura wa kaana ni Frati.

¹⁵Nawe Nndumi Iruva, kaipoo nndu eto kammbika efo nndeny wa Edeni, naambo nauremyi na iuvavara.

¹⁶Nndumi Iruva kavavasa nndu eto, kammbia, “Ndunda ta wo nri kulyiiye,

¹⁷lyo ndunda ta nri wa imanya mesha na makasha kulashelya-fo, mashika nkonu eto kushelyaa ndunda ta nri eto ifwa nkuti kufwe.”

¹⁸Nasa Nndumi Iruva kaamba, “Nkivaa kisha nndu eto nakae we muni-fo, mmbo nshentannya mweeki ammbakye.”

¹⁹Naasa kyuukana na uteri Nndumi Iruva kaumba wo ifisi lya ngoroshonyi na wo ndeye, llyo kafyeende kwa nndu ulya alemuumba nalle mmbo aafishya marina-ki. Na marina alefishya fyuumbe efyo akava ng'u marina awo.

²⁰Kyasia nndu yeto kafishya marina mafisi moose yoo aivikkywa na yoo a ngoroshonyi na ndeye toose. Lyo nnyalelollya-fo mweeki nta umwi ammbakkye-fo.

²¹Llyo Nndumi Iruva keengye Adamu rwe shiroo, karekkya rony. Koota uvari lwa nndu yeto lumwi, kaviirya-u nyama alya uvari lwekai.

²²Uvari lulya Nndumi Iruva aleuta Adamu kaumba-fo nka, nawe kamweengye Adamu.

²³Adamu kaamba, “Naasany yeu nyiffwa maffweny akwa na nyama nyameny takwa, nkyony mmbo ashevangwaa nka, mashika mmbo aleutwa kwa nndu nndumi.”

²⁴Kweekyo ni indo nndu nndumi mmbo asheraa ndeye na maye nawe nandekunanavya na nka wakwe, nawo vashevaa mwiili umwi nsi.

²⁵Nawo ve vavii vekee mbereto, Adamu na nkaakwe, lyo mbalelollya sony-fo.