Read BIBILLYA Mareiyo Meele a Iruva Mapookyony 20 Bible Online

Mapookyony 20 - BIBILLYA Mareiyo Meele a Iruva bible

Mapookyony 20

¹Abrahamu kookafo keenda uruka lwa Negebu, kakaa nnang'ani ya Kadeshi na Shuri, kakaa efo Gerari.

²Abrahamu kaamba endi kya Sara nka wakwe, “Ni mfwamaye,” Naasa Abimeleki mangyi ya Gerari karika vandu vandeende Sara.

³Kyeendi Iruva kasheya Abimeleki na yoorya elyi kio kammbia, “Kwanfwa yewe kimaruma kya nka yeto kulemwipoo mashika ni nka wa nndu.”

⁴Abimeleki lyo nyemmupaanafo, kaamba, “Woi Nndumi, a mmbo kushewaa vandu va usumanu?”

⁵A nshi we muni aleshivia, “yeu ni mfwama?” Na nka yeu muni kaamba, “Yeu ni mwanama. Na nrima woorokye na maako alatiri mbese, nkyo shiletana indo.”

⁶Iruva kammbia yooryeny, “Na yeny shiishi-da, mmbo kuletana, indo na nrima woorokye, nkyo neeny shakwiima kulashilyamarye, shakwiima kulampaani.

⁷Naasa ulaalu viira nka yeto kwa nndu yeto, mashika we ni nkisuku, nawe mmbo ashekuterevyaa, kukyie. Kyeendi kwallema immbiira, manya sheelyi dede yewe mmbo kushefwaa ando amwi na fyoose kutiri.”

⁸Abimeleki kakwipoo nraasi, kavaanga mashinga akwe moose, kavavia vandu mbony tilya shoose vakaita na maarwi awo, na vandu yewo vakairyaa nnu;

⁹Naasa Abimeleki kavaanga Abrahamu kammbia, “Nkyokyi kwalutannya? Nkyokyi shikulyamarye kutani kwasheengye yeny na vandu va umangyi lwakwa ulyamari yelu uniini indi? Mmbo kwashitannya kindo kilavaa itana.”

¹⁰Abimeleki kavia Abrahamu, “Mmbo kulelollya inda kutani kwatana indo?”

¹¹Abrahamu kammbia, “Mmbo shilelollya deny, yaa vandu mbereiye Iruva-fo, nawo mmbo vashidimaa ishiwaa kimaruma kya nka wakwa.”

¹²Nawe dede ni mfwama, mfu wa nde, lyo nshi wa ma-fo, lyo kava nka wakwa.

¹³Naasa kyikava kyeeri Iruva aleshiuta yefo kyeny kwa nde, shammbia, “Elyi llyo isarya lyafo kusheshitannyaa, wo ando lusheendaa kwaambe, Yeu ni mwanama.”

¹⁴Naasa Abimeleki kaipoo suva, na ng'umbe, na mashinga, a kyuumi na mashinga, a kyika kaniinga Abrahamu, kambiirya nka wakwe Sara.

¹⁵Abimeleki kaamba, “Uruka lwakwa kululollye, sauwa ando kukundye.”

¹⁶Nawe kavia Sara, “Lola! Shaniingya mwanamau fesa kyiku tive kindo kyeyuuta sony mbee ya yewo woose vakee neewe, neewe kushevaa wa usumanu mbee ya vandu woose.”

¹⁷Abrahamu katereva Iruva, na Iruva kashiisa Abimeleki, na nka wakwe, na mashinga akwe nawo vakaira vana.

¹⁸Ni llya Nndumi Iruva enfinga nsanga va vandu va kyeny kwa Abimeleki valaire vana, kyeendwa ni Sara nka wa Abrahamu.