Read BIBILLYA Mareiyo Meele a Iruva Mapookyony 21 Bible Online

Mapookyony 21 - BIBILLYA Mareiyo Meele a Iruva bible

Mapookyony 21

¹Nndumi Iruva kasheya Sara shaasa aleamba, na Nndumi Iruva kantannya shaasa alemmbia.

²Sara kakufinga kairya Abrahamu mwana wa womi wa ukuuny lwakwe, kyeeri kilya alevio ni Iruva.

³Abrahamu kammbaanga irina ni Isaki, mwana ulya aleonika, ulya Sara alemwiirya.

⁴Kyeeri Isaki etiri mikonu nyanya, Abrahamu kanrina shaasa Iruva alemmbavasya

⁵Nawe Abrahamu ekee nndu wa myaaka iyana, kyeeri mwana wakwe, Isaki alewonika.

⁶Sara kaamba, “Iruva anshisimba seko, wo nndu ashiitaa mmbo asekaa neeny.”

⁷Kaamba-se, “Mmbi eviaa Abrahamu vai Sara eeshootaa vana? Mashika mmbo shilemwiirya mwana kyeeri kya ukuu lwakwe.”

⁸Mwana kang'ana, katorwa; Abrahamu kavika nndumwa nniini nkonu ulya Isaki atorika.

⁹Sara kalollya mwana ulya wa Hajiri Mmisri, ulya emwirya Abrahamu, vetavanaa na Isaki.

¹⁰Naasa kavia Abrahamu, “Umbuta kishinga ekyi na mwana wakwe, mashika mwana wa kishinga nnyaonaa ding'u na mwana wakwa Isaki-fo.”

¹¹Na irero elyo lyikava ikasha deny kwa Abrahamu, kimaruma kya mwana wakwe.

¹²Iruva kavia Abrahamu, “Irero elyi lyilave ikasha misony afo-fo, kimaruma kya mwana yeto, na ishinga elyi lyafo. Kyoose ekyo Sara akuviaa arannya unyanga lwakwe, mashika yoo kwa Isaki ufyari lwafo lushevaangwaa.

¹³Na mwana yeto wa ishinga ashevaa ufyari uniini, mashika naakwaa ni-we ni wa ufyari lwafo.”

¹⁴Abrahamu kakupoo ngama nraasi keepoo nkate na ndivi ya mura kaniingya Hajiri kanrika yeeveny lyakwe, na mwana, kavasama; nawe kasomuka, karekya efo kasa ka Beer-sheba.

¹⁵Mura ulya ukasia efo ndiviny, kaara mwana yoo si ya isiki.

¹⁶Keenda nallole ekee kwaasha, ando a waasha lwa mita iyana; mashika mmbo alekusara, nalalollye mwana efwaa; nawe karewa ellolaa, kaonisa, unyanga kaiya.

¹⁷Iruva kaita unyanga lwa mwana, Nsu wa Iruva kavaanga Hajiri auka iruveeu kammbia, “Niinda, Hajiri? Kulairyee-fo, mashika Iruva amiita kiiyo kya mwana efo akai.

¹⁸Salala, kwiipoo mwana, kuntire maakony afo, mashika nshemwallwa nave ufyari uniini.”

¹⁹Iruva kantarammbwa miso, nawe kalollya kirori kya mura keenda kaishura ndivi mura, karita mwana.

²⁰Iruva kakaa na mwana yeto, nawe kang'ana, kakaa kasa kava mwaasa na ura.

²¹Kakaa kasa ka Parani, maye kamwengye nka ambuta Misri.

²²Kyikava kyeeri kilya Abimeleki, na Fikoli nniini wa ironda lyakwe lya askari, vakarera na Abrahamu, vakammbia, “Iruva mmbo akee neewe na fyoose kukeetana.

²³Naasa ulaalu shilyiiyany mboo na Iruva, sheelyi nkusheshitannya ukasha nta mwana wakwa-fo, nta nshuku wakwa-fo, kyeendi shaasa shilekutannya mesha neewe kushitannyi, na uruka yelu kukeerua rua nnang'ni ya vayo.”

²⁴Abrahamu kammbia, “Shilyiyaa mboo.”

²⁵Naasa Abrahamu kalollya sheelyi Abimeleki ni nndu wa tangalu kyimaruma kya kirori kya mura kilya mashinga a Abimeleki valekilammya.

²⁶Abimeleki kaamba, “Yeny nshiishi nndu yeto aletana kindo ekyi-fo, nta nnyaleshivia-fo, nta nshilemmiita kindo ekyi-fo, kuuta inu yeni.”

²⁷Abrahamu kaipoo suva na ng'umbe kafiniingya Abimeleki, nafyo fi fivii fikava fyevasanda.

²⁸Abrahamu kauta ngurana ta moonri mfungare to sheni.

²⁹Abimeleki kavia, Abrahamu “Ngurana eti ta moonri mfungare kwativika sheni, nkyo kyaamba kyi?”

³⁰Kammbia, “Ngurana eti mfungare ta moonri mmbo kutiwarya wokony lwakwa, tive ukureeki lweamba ni yeny shilesuma kirori ekyi kya mura.”

³¹Nkyo kavaanga ando alya Beer-sheba, mashika elyi valelyiiya-u mma ve vavii.

³²Naasa vakakusanda alya Beer-sheba. Abimeleki na Fikoli nniini wa itorito vakwe vakakwiipo vakawuya urukeny lwa Vafilisti.

³³Abrahamu kavaaya nri wa mfumu efo Beer-sheba, kavaangya-u irina lya Nndumi Iruva, Iruva wa llung'anu.

³⁴Abrahamu kakaa akee muny kulya urukeny lwa Vafilisti ando a mikonu miingyi.