Read BIBILLYA Mareiyo Meele a Iruva Mapookyony 23 Bible Online

Mapookyony 23 - BIBILLYA Mareiyo Meele a Iruva bible

Mapookyony 23

¹Nawe Sara kava na myaaka iyana na makumi avii na mfungare, nto suku ta Sara.

²Sara kafiiya Kiriath-arba, mfo Hebron kulya urukeny lwa Kanaani.

³Abrahamu kasha immbikya kiiyo na imuiya,

⁴Abrahamu kauka yoo nying'a wa nka wakwe wekai, karera na Bani Hethi, kammbia, “Yeny mmbo shikee muny, nkwany shikai; shiningeny ando a irika, shirike nnying'a va nka wakwa.”

⁵Wahiti vakarouwa Abrahamu vakammbia,

⁶“Nkyelwaarannyi-dwa woi mbee, nndu nniini deny kunu kweru ni yewe, rika nka vafo wafo ando yoo kushesauwaa efo fifuny fyeru, nta nkwiifo nndu ashekwiimaa kifu kyakwe, kure kularika nying'a va nka vafo-fo.”

⁷Abrahamu kavafiirya ndi Wahiti yewo.

⁸Nawe karera nawo kavavia, “Kwakooya mulangye indo shirike nnying'a va nka vakwa naambo ushuuke, shaaranyiny naambo musheshiterevya kwa Efroni wa Sohari.

⁹Naambo nashiniinge mbanga ya Makpela ikee yoo mbai ya irema lyakwe, nashiniinge kwa wuuru lwiishwe, mwiiyo, naambo ave ando akwa, eerika vandu.”

¹⁰Naasa Efroni mmbo ekee yoo nnang'ani ya Vahiti. Efroni Mhiti kavia Abrahamu, na Vahiti, veshaaranyaa, na vandu woose va efo poo kwakwe kaamba,

¹¹“Nshiindo-fo nndumi wakwa, nkyeshaaranya, Irema elyo mmbo shalyikuniinga, na mbanga yeyo ando amwi nalyo mbee ya vana va vandu vakwa mmbo shakuniinga, kurike-u nnying'a wafo.”

¹²Abrahamu kavaindya,

¹³Kavia Efroni, na vandu va uruka woose veetye, kavavia, “Shakutereva kushaaranyi, ‘Wuuru lwa irema mmbo shiniingyaa, kuluwarye, neeny llyo shiriken-fo nnying'a va nka wakwa.’”

¹⁴Ekroni kavia Abrahamu,

¹⁵“Nndumi wakwa mmbee, shaaranya, ‘Kyenga kya uteeri, wuuru lwa vayo lukee shekeli ta fesa mayana aana ntimaaki kwakwa yeny na yewe? Shakutereva rika nnying'a wa nka wafo.’”

¹⁶Abrahamu kairikya marero a Efroni. Abrahamu kamwekennya ileri tilya emmaa isenda maarwiny a Vahiti, shekeli ta fesa mayana aana, ndesa tikwaani neeto ta veekapa mbusha.

¹⁷Naasa nrema ya Efroni yeyo yekee Makpela kuleenda na Mamre, nrema na mbanga ya vayo, na miri myoose yeyo yekee efo ireminy yelyo na eyo yekee efo minyanuny taari toose, fyoose mmbo fyeekenwa,

¹⁸five masaa a Abrahamu, mbee ya Vahiti veeiyoo, na vandu woose va muri wakwe.

¹⁹Naasa efyo fikiinukya, Abrahamu karika Sara nka wakwe, efo mbangeny ya Makpela taari ya ngama ya Mamre, mfo Hebron, kulya urukeny lwa Kanaani.

²⁰Na nrema yeyo na mbanga ya vayo, fikaringisyo sheelyi ni masaa a Abrahamu aniingwa Mmbahiti, kuve ando akwe a irika.