Read BIBILLYA Mareiyo Meele a Iruva Mapookyony 25 Bible Online

Mapookyony 25 - BIBILLYA Mareiyo Meele a Iruva bible

Mapookyony 25

¹Abrahamu kaora nka ungyi evangwa Ketura.

²Kamwiirya Zimrani, na Yokshani, na Medani na Midiani, na Ishbaki na Sua.

³Yoshbaki kaira Sheba na Dedani; na vana va Dedani mmbo Vaashuru na Valetushi na Valeumi.

⁴Na vana va Midiani mmbo Efa, na Eferi na Hanoki, na Abida, na Eldaa. Ewo woose vekee vana va Ketura.

⁵Abrahamu kaniingya Isaki findo fyoose etiri.

⁶Kyeendi vana va vaka vallya vadu Abrahamu enkaa nawo kavaniinga findo fya pya, kavasamisa vauke deny alya Isaki ekai, kyeeri ekee na muu veende taari ya ngaminy, fika uruka lwa Kedemu.

⁷Yeti nto suku ta muu wa Abrahamu alekaa ulaniny myaka iyana makumi mfungare na iraanu.

⁸Abrahamu kainutwa kafwa ammikwa ukuu usha, mmiku deny, keenda isanga na vandu vakwe.

⁹Vana vakwe Isaki na Ishmeli vakamwaara mbangen ya Makpela kulya iremin lya Efroni wa Sohari Mhiti kulella Mamre.

¹⁰Efo ireminy llya Abrahamu alelyuura kwa Vahiti mfo Abrahamu na Sara valerikwa.

¹¹Naasa Abrahamu ekifwa, Iruva kavikya mwanaakwe Isaki mbora. Na Isaki kakaa kufii na Beer-lahoi-roi.

¹²Na elu llo ufyari lwa Ismaeli, we mwana wa Abrahamu ulya Hajiri Mmisri kishinga kya Sara aleirya Abrahamu.

¹³Na yaa nng'u marina a vana, marina awo na ngyufyari tawo.

¹⁴Apookye iwonika kwa Ismaeli ni Nebayoth, na Kedari, na Mibsamu na Mishma na Duma na Masa,

¹⁵na Hadadi na Tema, na Yeturi, na Nafishi, na Kedema,

¹⁶Yewo mmbo vana va kyuumi Ishmaeli, na yoo nng'u marina awo, efo mirin yaawo, na ando kwawo, vasongoru ikumi na vavii shaasa ngyuufyari tawo tikai.

¹⁷Na yei nnyo myaaka ya Ishmaeli, myaaka iyana makumi araru na mfungare, kainutwa kafwa, kandesanga na vandu vakwe.

¹⁸Vakakaa pookya Havila fika shuri, kulla Misri, kwisoraa shia ya Ashuru, kakaa yoo nnang'ani ya vana va maye woose.

¹⁹Na eti nto ngyufyari ta Isaki mwana wa Abrahamu. Abrahamu mmbo aleira Isaki.

²⁰Isaki katira myaaka makumi aana kyeeri aleora Rebeka wa Betueli Mshami wa Padan-aramu, mwana-maye wa Laban, Mshami, kava nka wakwe.

²¹Isaki katereva Nndumi Iruva kimaruma kya nka wakwe, mashika nnyetiri mwana-fo. Nawe Nndumi Iruva kamwirikya, na Rebeka kakufinga.

²²Vana vakakapannya efo nsangeny wakwe. Nawe kaamba, “Kwankooya ni indo, a mmbusha-ki ikaa na muu?” Kavesa Nndumi Iruva.

²³Nndumi Iruva kammbia, Ni vandu vavii vakee nsangeny wafo, Na vandu yewo vavii kusheveera, nao vakwaavaa. Umwi ashetiraa finya ngota eto ungyi. Na yeto mbee asherundyaa yeto n-du.

²⁴Mikonu yakwe ya yiira ikifika, ate, mmaasa akee nsangeny mbwakwe.

²⁵Wa mbee kaonika, nawe mmbo eedodorye, katira fii mwiiliny koose. Vakambaanga Esau.

²⁶Elyi numa mwanao kaonika woko lwakwe lwitiri Esau tutuny. Kavaangwa Yakobo, Isaki mmbo etiri myaaka makumi arindaru kyeeri nkaakwe eera vana ewo.

²⁷Vana vakang'ana, Esau kava nndu mwaasa mafisi kasa, kava nndu wa kasa, na Yakobo kawa nndu mfoo, kakaa kyeny;

²⁸Lyo Isaki kakunda Esau mashika elyi elyaa findo efyo ewaa, na Rebeka kakunda Yakobo.

²⁹Yakobo kakora shoonga shisha deny. Esau kasha ooka kasa, etirwa nshaa nnu.

³⁰Esau kavia Yakobo, “Shakutereva shininga shoonga yeyo yafo shilye, mashika mmbo nkeeyuma.” Nkyo vakambaanga Edomu.

³¹Yakobo kammbia, “Shikumbya mbele waavi lwafo lwa mwana mmbee.”

³²Esau kammbia, “Lola yeny nkufii na ifwa, waavi elu lwa iwonika mmbo lusheekyaa-ki?”

³³Yakobo kammbia, “Shilyiiya mboo mbele.” Nawe kallyiya mboo, kankumbya waavi lwakwe lwa mwana mbee.

³⁴Yakobo kaniinga Esau nkate na kifwe, nawe kalya, kana, naasa keenda, kooka alya. Ni indo Esau alemina waavi lwakwe lwa mwana mmbee.