Read BIBILLYA Mareiyo Meele a Iruva Mapookyony 28 Bible Online

Mapookyony 28 - BIBILLYA Mareiyo Meele a Iruva bible

Mapookyony 28

¹Naasa Isaki kavaanga Yakobo kammbikya mbora kammbavasa kammbia, “Kulasheondwa nka efo kwa vana va kyeny va Kanaani.

²Kwiipoo kweenda Padan-aramu, kufike kyeny kwa Bethueli nde-ya mau, kundeonndwa-fo nka efo kwa vana va Laban, mwana-maye wa mau.

³Iruva muni finya toose nakuvikye mbora, nakufumbute, neekwengera, kuve ironda iniini lya ngyufyari.

⁴Nakulyimmye mbora ya Abrahamu, yewe ando amwi na ufyari lwafo kushetira uruka elo kukee yeenda, elo Iruva aleniinga Abrahamu.”

⁵Naasa Isaki karuma Yakobo keenda kulya Padan-aramu, kwa Laban, mwana wa Betueli, nndu Mshami, mmbwe mwana-maye wa Rebeka, maye wa Yakobo na Esau.

⁶Esau kamanya Isaki mmbo ammbikya Yakobo mbora kanruma, Padan-aramu, nandewonisa-fo nka, neelyi alemmbikya mbora kammbia, “Kulaipoo nka efo kwa vana va kyeny va Kanaani-fo.

⁷Na lyingyi Yakobo mmbo aleinndya ndeye na maye kaenda Padam-aramu.”

⁸Esau kalollya vana va kyeny va Vakanaani mmbalesennya ndeye Isaki-fo.

⁹Naasa Esau keenda kwa Ishmaeli kaipoo Mahalathi, mfu wa Ishmaeli we mwana wa Abrahamu akee mwana-maye wa Nebayothi, nave nka wakwe ando amwi na vaka yewo ekee nawo.

¹⁰Yakobo kooka Beer-sheba keenda Haran.

¹¹Kafika ando kakaa-fo kio tara-raa, neelyi kwemmiila, kaipoo-u iwe lyimwi kalyekerya nrwe kalala rwe alya kweni.

¹²Kasheorya yoorya, akafi fitere fisalalyi fyuuka si fikafika iruveeu, na vasu va Iruva veshoolokaa na isaama nafyo.

¹³Na Nndumi Iruva kashesalala-u, kaamba, “Yeny ni Nndumi Iruva wa ndoo Abrahamu na Iruva wa Isaki; uruka elu yaa kulele shalukuniinga yewe na ufyari lwafo.

¹⁴Na ufyari lwafo lushevaa sha kiluulyi kya uruka, na yewe kushekwaana taari ya nkwaany na taari ya ngaminy, ndoo na sinde, neefo kwafo neefo ufyariny lwafo vandu woose va ulana vashevikywaa mbora.

¹⁵Neewe manya yeny shikee neewe, shikuringe wo ando kushendaa neeny nshekuviraa lyingyi fika yaa urukeny elu, mashika nshishekuraa-fo, kutani shainutya fyoose efyo shilekuvia.”

¹⁶Yakobo kaokya rweny kaamba, “Ni dede Nndumi Iruva akee ando yaa, neeny nta shilamanyi.”

¹⁷Nawe kairyaa nnu, Apaa ando aeresye! Kulakooye yaa ni mmba ya Nndumi Iruva, kukaveva ng'u mwaango wa iruveeu.

¹⁸Yakobo kakupoo ngama nraasi, kaipoo iwe llya alelyeekerya nrwe kalyisaleesa lyikava sha ngo, kalyiletya mafura.

¹⁹Ando alya kavaangau Betheli, kyeendi irina lya muri eto kipooka ni Luzu.

²⁰Yakobo kavika kyaasa kyakwe kaamba, “Iruva kankaa neeny, neeshiringa efo shieny yeyo nshiiraa, naveshininga shoonga yeelya na soori shiraa;

²¹neeny shammbuya kippwa kyeny kwa nde, llyo Nndumi Iruva ashevaa Iruva wakwa.

²²Na iwe elyi shalyisaleesa sha ngo lyishevaa mmba ya Iruva, na efo findony efyo fyoose kusheshiningaa nshekuutyaa-u kyenga kya ikumi.”