Read BIBILLYA Mareiyo Meele a Iruva Mapookyony 29 Bible Online

Mapookyony 29 - BIBILLYA Mareiyo Meele a Iruva bible

Mapookyony 29

¹Naasa Yakobo kawara shia yakwe, kandefika kulya urukeny lwa vandu va taari ya ngaminy.

²Ekifika-u kalollya kirori kya mura kyikee ando a imungony, na maronda araru a moonri alele kufii nakyo, mashika yoo ng'u ando maronda a findo aniyyaa, na yoo kaniny kya kirori kilya kukakaa-u iwe iniini.

³Maronda moose ng'u ando ashaa, na vakashebirimita-u iwe llya vakaniinga maronda awo mura, numa vakaviira iwe llya ando a vayo-se.

⁴Yakobo kavesa vandu valya, “Nyira vana va ma, a mmbo mukee vandu va kwi?” Vakammbia, “Yese llukee vandu va Haran.”

⁵Kavavesa, “A ndesa mwiishi Laban, mwana wa Nahori?” Vakammbia, “Lumwiishi.”

⁶Kavavesa-se, “A eefo inda?” Vakammbia, “Eefo nisha, na Raheli mfu wakwe eefo ashaa na moonri.”

⁷Kaamba, “Lola ulaalu ni nsanyiny, nta nshi kyeeri kya yuummbya findo-fo, tiniingeny mura, mundetiisa,”

⁸Vandu valya vakaamba, llushidimaa indo-fo, nkuti mbele luummbye maronda moose, numa vandu vabirimite iwe llya yoo kiroriny, llyo luniingeny moonri mura.

⁹Eereraa indo Raheli nawe kasha na moonri a ndeye, mashika mmbwe aesaa.

¹⁰Naasa llya Yakobo alelollya Reheli mwana wa Laban, mwana-maye wa maye, na moonri a Laban, mwana-maye wa maye, Yakobo kasembeya kufii, kabirimita iwe llya lyuuke alya kaniny kya kirori, kaniinga moonri a Laban mura.

¹¹Yakobo kamiminda Reheli, kaonisa unyanga kaiya.

¹²Yakobo kavia Reheli sheelyi we ni mfyari wa ndeye, sheelyi we ni mwana wa Rebeka. Naasa kaangusya kandevia ndeye mbony eto.

¹³Naasa elyi Laban amiita mbony ta Yakobo, mwana wa mfwa-maye kaangusya yeenda imwaammbya. Kankulyingillya kammiminda, kamweende kyeny. Nawe koongoya Laban mbony toose.

¹⁴Laban kammbia, “Dede yewe mmbo kukee ifua lyakwa na nyama yakwa.” Nawe kakaa kwakwe ando a mwiiri umwi sele.

¹⁵Laban kavia Yakobo, “Mashika elyi da kukee mfyari wakwa kushirundye ruu?” Shivia weesi lwafo mmbo lushevaa kyi?

¹⁶Laban mmbo eetiri vana va kyika vavii, irina lyeeto nniini ni Lea na irina lyeeto n-du ni Raheli.

¹⁷Lea we miso akwe ekee mafwafwa, kyeendi Raheli we etiri yuumba isha, kasennya miso deny.

¹⁸Yakobo kakunda Raheli, kaamba, “Mmbo shikurundyaa ando a myaaka mfungare shiwonise Reheli, mwana yeto wafo n-du.”

¹⁹Laban kammbia, nkisha shikuniinge yewe ngeta nndu ungyi;

²⁰Yakobo kandunndya myaaka mfungare naambo nawonise Raheli. Nayo kailollya nsha mikonu myaangu-da, ni elyi enkunndye nnu.

²¹Yakobo kavia Laban, “Shiniinga nka wakwa mashika mikonu yakwa yamiinana shiike nawe.”

²²Laban kaumbya vandu va kulya woose kavika ifura iniini.

²³Naasa kyeeri kya nkwaany kaipoo Lea, mfu wakwe, kamweengye Yakobo, nawe kakaa nawe.

²⁴Laban kaniingya Lea kishinga kyakwe Silpa nandunndye.

²⁵Naasa llya kulekya, ate ni Lea. Kavia Laban, “nkyoki ekyi kuleshitannya?”

²⁶Shilekurundya-se shionise Raheli? Nkyiki elyi kwashilemba? Laban kammbia, “Nshi-ndo kivee kunu kweru-fo, yoorisa yeto n-du nasongoye yeto nniini-fo;

²⁷Irisha isye mikonu mfungare, neese lukuningye yeu nawe kushirundye lyingyi myaaka ingyi mfungare.”

²⁸Yakobo katana indo, kamaa mikonu mfungare. Kanningya-se Raheli nave nka wakwe.

²⁹Laban kaniingya Raheli kishinga kilya kyakwe Bilha nandunndye.

³⁰Kakaa na Raheli nawe kakunda Raheli ngota Lea, karunda ando a myaaka ingyi mfungare kimaruma kyakwe.

³¹Nndumi Iruva akilollya Lea nnyalekundwa, nawe kansimba vana, lyo Raheli nyekee kyuumba.

³²Lea kakufinga kaira mwana kammbaanga Ruben, ni llya aleamba, mashika Nndumi Iruva allollya ngatara yakwa; ulaalu mmi wakwa asheshikundaa.

³³Kakufinga-se, kaira mwana kaamba, “Mashika llya Nndumi Iruva aleita nshikee nkunde-fo.” Llyo kashisimba-se yeu, irina lyakwe kammbaanga Simion.

³⁴Kakufinga-se kaira mwana, kaamba, “Ulaalu mmi wakwa ashesanga neeny, mashika elyi shamwiirya vana vararu.” Irina lyakwe kammbaanga Levi.

³⁵Kakufinga-se kaira mwana kaamba, “Tura yei nshearafumaa Nndumi Iruva” Irina lyakwe kammbaanga Yuda; kamanda iira vana.