Read BIBILLYA Mareiyo Meele a Iruva Mapookyony 3 Bible Online

Mapookyony 3 - BIBILLYA Mareiyo Meele a Iruva bible

Mapookyony 3

¹Naasa shoka yetiri urango lwa ulembi ngota mafisi engyi moose Nndumi Iruva aleumba. Shoka ikavesa nka, “Vai-le, ni dede Iruva mmbo alemuvavasa mulalye ndunda ta nri moose kunu ndeny?”

²Nka karouwa shoka, “Ndunda ta nri moose wa kunu nndeny lushiidimaa ikulyiiya,

³indi lyo ndunda ta nri eto ukee yoo nndeny nnang'ani kavii ya nnda Iruva mmbo aleluvya, ‘mulalye ndunda ta nri yeto-fo nta mulaupaani-fo, naambo mulashe-ifwa.’”

⁴Nayo shoka ikarouwa, “Ekyo nshi dede-fo, mmushefwaa-fo,

⁵Iruva mmbo eeshi sheelyi nkonu eto mushelyaa, mmbo mushemmbakaa na imanya ekyo kisha na kikasha.”

⁶Nka akyilollya-se nri ulya nkyeelya kisha, ukaveesenya na miso, nato ushiidimisyaa nndu iranggwa! Nalyo kadova ndunda ta vayo kalya kaniinga na mmi, nawe kavelya.

⁷Vakaambuka miso ve-vavii, vakasukkywa elyi vakee mbereto, vakafuma maru a nri akava mbita ya kisiny.

⁸Vakasheita ntiri wa Nndumi Iruva erua-rua efo nnden elyi mwi warya. Adamu na nkaakwe vakaovya miso a Nndumi Iruva nnang'ani ya miri,

⁹Naasa Nndumi Iruva kavaanga Adamu kammbesa, “Nkwi kukai?”

¹⁰Kammbia, “Mmbo shaita, ntiri vafo kunu nndeny shairyaa, mashika elyi shikee mbereto shoovya.”

¹¹“A mmbovi akuvia kwiifo mbereto? A mmbo kwallya ndunda ta nri ulya shilekuvavasa kulalye?”

¹²Adamu kaamba, “Nka yeu kulenshiniinga nakae neeny mmbwe aleshiniinga ndunda ta nri eto, neeny shalya.”

¹³Nndumi Iruva kavia nka, “a nkyoki eki kuletana?” Nka kammbia, “Nshoka ileshilemba, shalya.”

¹⁴Naasa Nndumi Iruva kavia shoka, “Mashika elyi kuletana indo yewe mmbo kukee n-denge ngota Findo fyoose fyeevikya na ngota mafisi moose a ngoroshony; Mmbo kufurukaa na ndeu, Kulye uteeri kyeeri kyoose kya muu wafo.

¹⁵Neeny nshevikaa kiduva kyafo na kya nka eto Na nnang'ani ya ufyari lwafo na lwa nka, Ufyari lwakwe lushekupeetaa nrwe, Neewe kushemwaasa tutun.”

¹⁶Kaindukya nka, “Nkya dede nshekufumbutyaa ngatara yafo kyeeri kya iwona lyafo; Kushewonaa vana na mavina, Indi kushelanga mmi wafo Nawe ashekwitoryaa.”

¹⁷Kooka-fo, kavia Adamu, “Kimmba kulearanya unyanga lwa nka wafo, Na kwalya ndunda ta nri ulya shilekuwavasa kulalye Summbai mmbo yadengwa kimaruma kyafo, Mmbo kushelya fya nrike kyeeri Kyoose,

¹⁸Myeera na miinga fiingyifywa, Kushelya nyany ta mbuveny.

¹⁹Mmbo kushelyaa shoonga yafo na nrike wa kisangu, Kutani kwawuya uteerin, Mashika mfo kuukye, Nyelyi kukee kiluulyi Neewe mmbo kushewuyaa-fo.”

²⁰Adamu kafishya nkaakwe irina ni Eva, nkyo mmbwe akee maye wa vandu woose.

²¹Iruva Nndumi kasongesya Adamu na nka soori ta shonyi ya ifisi, kavavika.

²²Nndumi Iruva kaamba, “Naasa, akau nndu ammeva sheese, ammemanya fisha na fikasha, Naasa ulaalu nalashe yoorrwa woko nadove ndunda ta nri wa muu, nalye nakee na muu llung'anu!”

²³Naasa Nndumi Iruva kamuumbuta kulya Eden, nanderema sumbai efo autywa,

²⁴Naasa koombuta nndu eto na taari ya ngama ya nnda ulya wa Eden kavika-u usu lwa muro lumikaa na iveruka-veruka taari toose, iringa yoo shia yeyo yeekooya nri eto wa muu.