Read BIBILLYA Mareiyo Meele a Iruva Mapookyony 30 Bible Online

Mapookyony 30 - BIBILLYA Mareiyo Meele a Iruva bible

Mapookyony 30

¹Nawe Raheli eekilollya nnyakeyiirya Yakobo mwana, Raheli kalollya mfwamaye kififi. Kavia Yakobo, “Shiwonisya vana; kilammba indo, nkuti shifwe,”

²Yakobo katirwa ni unyafi kimaruma kya Raheli kaamba, “a yeny mmbo shikee ando a Iruva, yeto alekwiima vana?”

³Kammbia, “Yaa kwiiyo kishinga kyakwa Bilha, kaa nawe naambo nashiirye mwana, neeny shioni mwana ooka kwakwe.”

⁴Naasa kanningya Bilha kishinga kyakwe kava nkaakwe. Yakobo kakaa nawe.

⁵Nawe Bilha kakufinga kairya Yakobo mwana.

⁶Raheli kaamba, “Iruva mmbo ashiniinga usumanu lakwa, kashaaranya unyanga lwakwa kashiniinga mwana;” Naasa kambaanga irina lyakwe n'Dani.”

⁷Bilha kishinga kya Reheli kakufinga keerya Yakobo mwana wa kavii.

⁸Raheli kaamba, “Yei ni fira shuumu shikeekapana na mfwama, neeny shavinga.” Kammbaanga irina lyakwe Naftali.

⁹Lea ekilollya ammanda iwona, kaipoo Silpa kishinga ekyo kyakwe, kanningya Yakobo, nakee nawe.

¹⁰Silpa kishinga kya Lea kamwirya mwana.

¹¹Lea kaamba, “Ni pule shisha! Kammbaanga Kati.”

¹²Silpa kishinga kya Lea kairya Yakobo mwana wa kavii.

¹³Lea kaamba, “Nkyeni yeny, mashika vaka vengyi vasheshivia shikee wa ngoma.” Kambaanga Aseri.

¹⁴Ruben kakupoo kyeeri kya fimu kalollya ndunda ta matungusha efo nreminy, keengye maye we Lea, Naasa Reheli kavia Lea, “Shiningan matungusha maangu yoo a mwana wafo.”

¹⁵Nawe kammbia, “Mmbo kwiishi ni kindo kidu ishisoka mmi wakwa, na ulaalu mmbo kuvekundye ishisoka matungusha a mwana?” Raheli kammbia, “Kimmba ni indo mmbo ashelalany kwafo na matungusha a mwana wafo.”

¹⁶Yakobo kasha nkwaany auka efo mbuveny, Lea kandemwaambya, kaamba, “Nkuti kwaange kwakwa mashika shandeesya na matungusha a mwana wakwa, kalallya kwakwe kio kilya.

¹⁷Iruva kaarannya Lea, nawe kakufinga kairya Yakobo mwana wa karaanu.”

¹⁸Lea kaamba, “Iruva mmbo ashiniinga weesi lwakwa. Mashika mmbo shileniingya mmi wakwa kishinga kyakwa. Kammbaanga Isakari.

¹⁹Lea kakufinga-se, nawe kairya Yakobo mwana wa karindaru.”

²⁰Lea kaamba, “Iruva mmbo asheengye mbony shisha, ulaalu mmi wakwa ashesamyaa kwakwa kimmba shammwirya vana varindaru.” Kammbaanga Zabulon.

²¹Numa kaira mwana wa kyika, kammbaanga irina lyakwe Dina

²²Iruva kakummbwa Reheli; Iruva kamwarannya, kamwelelisya ndeu.

²³Kakufinga kaira mwana, kaamba, Iruva ammuta usutu lwakwa.

²⁴Kammbaanga Yosefu, kaamba, “Nndumi Iruva nasheengerye mwana ungyi.”

²⁵Naasa kyeeri Raheli aleira Yosefu, Yakobo kavia Laban, “Shilekeya sheende kweru, mfo urukeny lwakwa.”

²⁶Shiningya vaka vakwa na vana vakwa, mashika kulelollya urundi lwakwa shaasa shilekurunndya.

²⁷Laban kammbia, “Kwakooya shileva nsha misony afo, kaa-u, mashika yeny shammemanya Iruva mmbo aleluvikya mbora kimaruma kyafo.”

²⁸Kaamba, “Amba weesi lwafo elo kukunndye neeny nshekutaa.”

²⁹Kammbia, “Kulelollya shaasa shilekurunndya na shaasa findo fyafo fyevikkya filekaa kwakwa.”

³⁰Mashika umasi lwafo llwekee udu shilandesha kwafo, nalo ulaalu lwang'ana, Nndumi kakuvikkya mbora wo ando shileenda. Naasany ulaalu, niindii shisalallyany mbony ta mmba yakwa shimuni?

³¹Kammbesa, “A shakuniinga-kyi ndesa? Yakobo kaamba, ‘Kulashiniinge nta kindo-fo, kwashitannya kindo mmbo nsheesa lyingyi findo fyafo neefiwutisa neefiringa,

³²Ra shiire efo findony fyafo fyoose fyeevikkya inu, shisauwe-fo efyo fya mapoo-poo na fya mavaru-varu, na moonri yoo afwani muu, na fya maparanga na mavaru-varu efo mburuny, nafyo five mfyo weesi lwakwa.’

³³Na usumanu lwakwa lushekooraa efo mbee, kyeeri kushesha kya weesi lwakwa elo lukee kwafo. “Wo mburu shoose yeyo ilatiri maparanga ao mavaruvaru, ao yoonri lyilafwani yuu, ikallolyo kwakwa, ive sheelyi mmbo ikee shiive.”

³⁴Laban kammbia, “Na kikuviyeny indo shaasa kwaamba,”

³⁵Naasa kauta-fo mburu ta woro na suveny ta maparanga na ta mavaru-varu, shoose titiri ivara yeelwa, na moonri muu moose, katirambikya vana vakwe,

³⁶keenda kwaasha na Yakobo ando a mikonu iraru; nawe Yakobo keesa findo fya Laban filya filesaa-u.

³⁷Yakobo karuuya rungo shivisi ta miri, katouwa makanda a vayo, nrungo eto tikatira mishira myaa.

³⁸Kasaleesa rungo eto yoo ando findo finiiyaa mura.

³⁹Findo efyo fikawata mbee ya rungo tilya, fikafyaa ngurana ta maparanga na ta mavaru-varu.

⁴⁰Na Yakobo karauwa moonri alya asore tilya teetiri mishira na tilya toose teeke shuu efo findony fya Laban. Filya fyeeke fyakwe muni kafiviira mbai, nta nnyalekifisanda na findo fya Laban-fo.

⁴¹Na wo kyeeri findo filya fyeetiri finya filewata, kavesaleesa rungo tilya mbee ya vayo alya tisheniiyaa mura naambo tivake mishira ya rungo tilya.

⁴²Kyeendi findo filya fifwafwa nnyalefyeende alya rungony tilya-fo. Naasa filya fifwa-fwa fikasaa kwa Laban, na filya fitiri finya fikava fya Yakobo.

⁴³Naasa nndu yeto kaingifywa nnu, katira findo fiingyi na mashinga, a kyuumi na a kyika na ngamula na mishungu miingyi.