Read BIBILLYA Mareiyo Meele a Iruva Mapookyony 32 Bible Online

Mapookyony 32 - BIBILLYA Mareiyo Meele a Iruva bible

Mapookyony 32

¹Yakobo kawara shia yakwe na vasu va Iruva vakakwaanannya nawe.

²Llya Yakobo avalollya indi kaamba, “Elyi ni ironda lya Iruva.” Ando alya kavaanga-u Mahanaimu.

³Naasa, Yakobo karuma varumi vaire mbee yakwe yeengya mwana-maye Esau, vafike urukeny lwa Seiri kulya kasa ka Edomu;

⁴kavavavasya kaamba, “Vieny nndumi wakwa Esau Indi, ‘Mmbo shekee kwa Laban nafo nkundo kweny, shakyeeywa-fo fika ulaalu.’

⁵Neeny mmbo shitiri ng'umbe na mishungu na moonri na mashinga, a kyuumi na kyika; neeny mmbo sharuma vandu varere nawe shiwoni iirikyo mmbwe.”

⁶Varumi valya vakawuya kwa Yakobo vakaamba, “Mmbo llwafika kwa mwana-mau, Esau, nawe ekato eefo ashekwaammbya, aryani na vandu mayana aana.”

⁷Naasa Yakobo kairyaa nnu, na yeereve nnu, kaava vandu valya varyani nawe, na moonri, na ng'umbe na ngamula fyoose maronda avii.

⁸Kaamba, “Kwakooya Esau asheya ironda efyo lyimwi nalyikabe, ironda elyo lyingyi mmbo lyikiaa.”

⁹Yakobo kaamba, “Woi Nndumi Iruva wa saawoye vakwa Abrahamu, na Iruva wa ndeyaakwa Isaki, Nndumi nnyewe kuleshivia, ‘Wuya kweende urukeny lwafo, na lwa vandu vafo, neeny nshekutannyaa mesha;’

¹⁰Neeny nshisumani nta kinnywa isarya na usha elo loose kuletannya ishinga lyafo-fo, mashika kyeeri shekillya Yordan mmbiri sheni sheerye wokony, kyeendi ulaalu shammba maronda avii.

¹¹Shaauwany mmbe, maakony a mwana-ma, Esau, mashika elyi shimwereiye, nalasheshikapa yeny na vaka na vana vakwa.”

¹²Neewe mmbo kuleamba, “Ni dede nshekutannyaa mesha, nshefumbuta ufyari lwafo luve sha nsanga wa yeeve, ulavaa yeekyena shaasa ukee mwiingyi.”

¹³Kakaa-fo kio kilya, numa kaipoo findo maata filya eetiri, kaniinngya mwana-maye Esau kya pya;

¹⁴savana mayana avii, na oro makumi avii, moonri mayana avii na suva makumi avii,

¹⁵ngamula tishootaa makumi araru ando amwi na ngashe ta vayo, ng'umbe makumi aana na shau ikumi, na ngashe ta vayo ikumi.

¹⁶Katiniingya mashinga akwe, wo kironda kyaanya, Nawe kavia mashinga akwe, “Ruukeny mbele yeni mwiire mbee, mure-u mwaanya yoo nnang'ani a ironda yelyo lyingyi.”

¹⁷Kavavasya ulya wa mbee kammbia, “Mwana-ma Esau kankukooya, neekuvesa eshaambaa, ‘Yewe mmbo kukee wa-vi? Nkwi kukeenda? Na lyingyi efi fiirye mbee mfya-vi?’

¹⁸Naasa aamba, ‘Mfya ishinga lyafo we Yakobo. Ni simbo arikkya nndumi wakwe Esau. Nawe ekato akee numa yeeru.’”

¹⁹Kavavasya-se yeto wa kavii na wa kararu, woose yewo vekeekapa findo efyo, kavavia, “Niindo musheviaa Esau, elyi mushekwaanannya nawe.”

²⁰Na lyingyi ambeny, “Ekalyo ishinga lyafo Yakobo lyikee numa yeeru. Mmashika llya alekusara mmbo lushewuyanaa nawe kyeendwa nsimbo eto ta pya shatiita mbee, numa shilole kisangu kyakwe kulakooye kishesumanaa neeki kyako.”

²¹Naasa karuma simbo tilya tikasonngwa mbee yakwe, we muni kasaa alya emannyi ulale.

²²Kakupoo kio kilya ando amwi na vaka vakwe vavii, na mashinga akwe avii, na vana vakwe ikumi na umwi, kakillya iriko lya Yaboki.

²³Kavaipoo kavaruuta mura, kavaruuta ando amwi na fyoose ekee nafyo.

²⁴Yakobo karewa muni; na nndu umwi kavakyana nawe kio tara-raa.

²⁵Kyeeri alelollya nnyakemmbinga kambaana shoro Yakobo keeruka kyeeri kilya eekekuuta nawe,

²⁶Nawe kammbia, “Shilekeya sheende mashika mmbo kukeekya, nawe kammbia, Kwanra kulashivikkya mbora nshishekulekeiyaa-fo.”

²⁷Kammbesa, “Irina lyafo mmbovi?” Kammbia, “Yey Nnyakobo.”

²⁸Kammbia, “Irina lyafo nkushekivaangwa-se Yakobo-fo, mashika mmbo kavakyana na Iruva na vandu, neewe kwavinga, ulaalu mmbo kuvaangwa Israeli.”

²⁹Yakobo kammbesa, “Shakutereva, shivia irina lyafo?” Kammbia, “Nkyiki elyi kwashivesa irina lyakwa?” Kammbikkya-u mbora.

³⁰Yakobo kavaanga ando alya ni Penueli, mashika aleamba, “Mmbo shakwanannya na Iruva kisangu kwa kisangu na yeny shakyiia-u.”

³¹Mwi ukammikya kyeeri ekeekillya Penueli, katingirya kimaruma kya shoro yeyo yakwe.

³²Naasany vana va Israeli fika inu mmbalyee nrarii eto wa shoro-fo, mashika llya alepaana Yakobo nraari yeto wa shoro.