Read BIBILLYA Mareiyo Meele a Iruva Mapookyony 43 Bible Online

Mapookyony 43 - BIBILLYA Mareiyo Meele a Iruva bible

Mapookyony 43

¹Shaa ikarwaa kulya urukeny lwa Kanaani.

²Kyeeri valemaa ilya shoonga tilya valeuta Misri, ndeye wao kavavia, “Wuyeny kulya mundeluurya-se-fo shoonga.”

³Yuda kavavia, “Nndu ulya mmbo aleamba, ‘Mmusheshilolya kisangu kyako mwanany waany n-du nalansha neeni-fo.’

⁴Kwanra mwaneru n-du neende neese, lusokaa lundeura shoonga.

⁵Lyo kwanra kulamwekeya, llusokaafo mashika ndu ulya mmbo aleluvia, ‘Mmusheshilolyaa kisangu kyakwa, mwanany waany kanra nalesha neeni-fo.’”

⁶Israeli kaamba, “Nkyiki elyi muleshitannya ukasha indo mukavia nndu eto kwiifo mwana ungyi n-du?”

⁷Vakammbia, Nndu yeto mmbo alelusuma nnu mbony teru na ta kyeny kweru, kaamba, “A ndeye waany eefo na muu? Mutiri mwanamaye waany ungyi? Neese lukarouwa nisha efyo fyoose. A mmbo lweshidimaa imanya aluvia, Sokeny ando amwi neeto ungyi?”

⁸Yuda kavia ndeye Israel, “Shiniingya mwana yeu, lukupoo lweende, naambo lukie lulashefwa, yese neewe na vana veru.”

⁹Yeny shishevaa nkureeki wakwe, kushembwarya wokony lwakwa, shanra shilembiira, kwafo shinkurambikye, ra nsheva nndu nrekwa mbee yafo kyeeri kyoose.

¹⁰Mashika kulore ni elyi lwankuryariya, mmbo lwekooyaa lwambuya lya kavii.

¹¹Ndeye waawo Israeli kaamba, “Kwankooya niindo, taneny indi, endeny murye findo fya pya, munderwaaya nndu yeto, ukyi lunnywa, ubani, manemane na mafura.

¹²Mukamare fesa kavii mmwasi ando amwi na tilya tileviirwa mikusheny mweende mutirye, kulakooye mmbo tilerekyo

¹³Ipoony, na mwanany waany, mweende nawe neewuya nawe.

¹⁴Iruva muni finya toose namulyilye mbee ya nndu eto, namuporomuye mwanamaye yeto waany ungyi, na Benyamen. Neeny shanfiiyo m'mbana vakwa, naasa-da.”

¹⁵Naasa vandu yewo vakaipoo findo fya pya, vakaipoo na fesa kavii, na Benyamen, vakakwiipoo vakasoka Misri, vakandefika mbee ya Yosefu.

¹⁶Na llya alelollya Benyaminy kavia nndu yeto mwisalallya mmba yakwe, “Ende vandu yeva kulya kyeny, kushishe na ideesya, mashika vandu yeva mmbo vashelyaa neeny nsanyiny.”

¹⁷Nndu ulya katana shaasa Yosefu alevavasya. Nawe karwaa vandu yewo kyeny kwa Yosefu.

¹⁸Kyeendi vandu yewo vakairyaa mashika llya valerawa kwa Yosefu, vakakusara, ni kimaruma kya fesa tilya tileviiro kulya mikusheny kulakooye mmbo lweendwa kunu luutyo uvingo, lutiro mfungwa luve mashinga ando amwi na mishungu yeeru.

¹⁹Vakaserikya kufii na mwisalalya mmba ya Yosefu yoo mwangony vakarera nawe.

²⁰Vakammbia, “Lola, yese dede Kyaaro kilya kya mbee mmbo lulesoka lusheura shoonga.

²¹Lya lulefikya mba ya veny, lukaporomwa mikusha lukakooya efo mikusheny wo ndu fesa takwe efo nkusheny, wo umwi fesa toose, nato ekati lutirye toose.

²²Neese mmbo lurye na fesa tingyi naambo luure nato shoonga, nta llumanyaa nndu aleviira fesa eto efo mikusheny yeeru-fo.”

²³Kavavia, “Ufoo lukae neeni mulairyee-fo, Iruva waany, avekee Iruva wa ndeye waany, mmbwe eto alemuviirya pule yeyo efo mikusheny yaany. Fesa tany shiletilolya.” Naasa kavaporomuya Simion.

²⁴Nndu eto keende vandu yewo kwa Yosefu, kavaniinga mura, neevasangya marende, neeninga mishungu yaawo shoonga.

²⁵Vakatira kindo kilya kya pya verie kutani Yosefu alesha nsanyiny, mashika vemmbio mmbo vashelyaa shoonga nawe.

²⁶Kyeeri Yosefu alesha vakamweengye kindo kilya kya pya veerye, vakakwinyika vakafika si.

²⁷Kavavesa mbony tawo, “A ndeye waany mmiku ulya, aifo nisha ndesa?”

²⁸Vakaamba, “Ishinga lyafo, we ndeeto weeru eefo nisha, eefo na muu, vakafiirya ndi kyemwindya.”

²⁹Lya aipoo miso kalollya Benyamen, mwanawo, mwana wa maye, kaamba, “Yeu mmbwe mwanany n-du muleshivia mbony takwe?” Kammbia, “Iruva nakutarame mwanakwa.”

³⁰Yosefu kaangusya, yuukau ni llya nrima wakwe ulelooka kimaruma kya mwanawo, karuuya ando nandeiya, kaanga neefo kiryeny kyakwe kandeiya-fo.

³¹Kasangya kisangu, kasomuka kakukaarisa, kaamba, “Endeny shoonga.”

³²Vakadeesya shoonga we muni nawo veni, na Vamisri valya vekee nawe kyaanya kyawo, mashika Vamisri mmbashidimaa ilya na Vaebrania-fo, nielyi kwa Vamisri kikee kindo kya iipala.

³³Vakavikwa rembo, kupookya ulya wa mbee iwonika, kundekooya ulya n-du, vandu yewo vakafulukywa wo veni.

³⁴Vakarikyo waavi lwa shoonga luuka yoo meseny yakwe kyeendi waavi lwa Benjamen kalufumbuta karaanu ngota lwawo. Vakana, vakafura ando amwi nawe.