Read BIBILLYA Mareiyo Meele a Iruva Mapookyony 45 Bible Online

Mapookyony 45 - BIBILLYA Mareiyo Meele a Iruva bible

Mapookyony 45

¹Yoo Yosefu nnyalekiidima ikusuruma mbee yaawo vekee mbee yakwe-fo. Kakooma kaamba, “Uteny wo nndu mbee yakwa.” Nta nkwiiyo nndu alesalalau-fo, kyeeri Yosefu alekwaamba kwa vana va maye-fo.

²Karosya unyanga kaiya, kutani Vamisri vaita.

³Yosefu kavia vana va maye, “Yeny ni Yosefu, nde-yaa-kwa aiyo na muu?” Nta vana va maye valaidimi inrouwa, mashika mmbo valetirwa mmbwerei mbee yakwe.

⁴Yosefu kavia vana va maye, “Oshony kwakwa; naasa vakeenda kwakwe. Kavavia,” “Yeny ni Yosefu ulya muleshikumba shasha Misri.

⁵Naasany mulakiting'wa-fo nta ifulukkywa elyi muleshikumba kunu-fo, mashika Iruva mmbwe alesheende mbee yaany naambo shikire muu wa vandu veengyi.

⁶Mashika myaaka yei ivii shaa ileng'ana urukeny, neefo mbee mmbo kwiiyo myaaka iraanu sele ilatiri irema nta yuulu-la.

⁷Iruva mmbo aleshiruma shasonngwa mbee yaany naambo shishemudeesya kindo kyeemukira yeni shimwaauwe ando kuumu.

⁸Naasany nshi yeni mulesheende kunu-fo, ni Iruva, nawe kashivika shive sha nde kwa Farao, na nsongoru wa mmba yakwe, na ngari ya uruka loose lwa Misri.”

⁹Angusyeny ifikkya nde yaakwa, mummbie, “Mwana wafo Yosefu niindi aamba, Iruva mmbwe aleshivika mwisalallya Misri shoose, naasa oshony na kwakwa mulakutevese.”

¹⁰Neewe mmbo kushekaa urukeny lwa, Goshen. Kushekaa kufii neeny, yewe na vana vafo na vana va vana vafo, na findo fyafo fyeevikkya, na ng'umbe tafo, na fyoose kukee nafyo.

¹¹Kyeeri kwikee kunu Goshen mmbo nshekuniingaa fyeekulela; mashika kusaaye-u myaaka iraanu ya shaa, kulakooye ungwera yewe na fya mmba yafo.

¹²Yosefu kavavia-se, “Loleny, yeni moose na miso a mwaneru Benyamen, mumanyi sheelyi yeny mmbwe Yosefu dede.”

¹³Neeni mmbo musheviaa nde weeru mbony toose ta usuri lwakwa kunu Misri, na ta fyoose mulollye, mundeangusya imweende kunu.

¹⁴Kakulyingyillya Benyamen singony, kaiya na Benyamen kaiiya yoo singony yakwe.

¹⁵Kamiminda vana va maye woose, kaiya nawo, vekima indo vakapooka irera nawe.

¹⁶Kukaitiwa mbony kwa Farao kyeyaamba, Vana va maye va Yosefu vasheye kunu. Farao kasennywa, na mashinga akwe-da.

¹⁷Farao kavia Yosefu via vana va mau, “Taniny indi, Rikeny mishungu yaany mario, mukupoo mundefika urukeny lwa Kanaani,

¹⁸mundeepo ndeye waany na vandu vany woose, mushe, neeni nshemuningaa mesha a uruka lwa Misri, Neeni mmbo mushewuuraa mbora ta uruka.

¹⁹Neewe mmbo kwavavasywa, mutani indo, musheonisa mitika kunu Misri kimaruma kya vana vany na vaka vany, mundeipoo nde waany mushe.

²⁰Nta mulaatarike na kindo, mashika mesha a Misri ni any.”

²¹Na vana va Israeli niindo valetana. Yosefu kavaniinga mitika shaasa Farao alevavasya, kavaniinga na kishau kya shia.

²²Wo ndu kanniinga soori teyaalasha kyeendi Benyamen kanniinga fesa mayana araru na soori na soori isaau teyaalasha,

²³na ndeye kavenrikkya indo, mishungu ikumi irie mesha a Misri na mishungu ikumi irie shoonga, na mikate, na shoonga ya ndeye yelyiiya efo shia,

²⁴Kalakana na vana va maye vakeenda, kooka-fo kavavia, “Mulasakkye tara yefo shia.”

²⁵Vakooka Misri vakafika Kanaani kwa Yakobo, we nde yaawo.

²⁶Vakammbia mbony vakaamba, “Yosefu eefo na muu, na mmbwe eto akee mwishillya Misri shoose.” Kaawukwa mmuu, mashika nnyalevairikkya-fo.

²⁷Vakammbia na marero moose a Yosefu alya alevavia; kyeeri alelollya na mitika ilya Yosefu alerika, naambo naipowa nang'u, kawuiywa mmuu vyaa.

²⁸Israeli kaamba, “Naasa-da, Mwanakwa Yosefu eefo dede, ra sheende shindellola kulaore shamfwa.”