Read BIBILLYA Mareiyo Meele a Iruva Mapookyony 5 Bible Online

Mapookyony 5 - BIBILLYA Mareiyo Meele a Iruva bible

Mapookyony 5

¹Elu llo uramba lwa ufyari lwa Adamu. Llya Iruva aleumba nndu mmbo alemuumba wa fwana yakwe.

²Kaumba nndu nndumi na nndu nka, kavavikkya mbora kavafishya irina ni mwana wa “Nndu” nkonu ulya valeumbwa.

³Adamu katira myaaka iyana na makumi araru, kaira mwana wa kyuumi ambakkye wa fwana yakwe, kammbaanga Seti.

⁴Fyeeri fya Adamu amma yiira Seti ni myaaka mayana nyanya keera vana va kyuumi na va kyika.

⁵Mikonu myoose ya Adamu alekaa ulanin ni myaaka mayana kyeenda na makumi araru, naasa kafwa.

⁶Seti keera Enoshi eetiri myaaka iyana lyimwi na iraanu.

⁷Seti ekimaa yiira Enoshi kakaa-u myaaka mayana nyanya na mfungare, kaira vana va kyuumi na va kyika.

⁸Suku ta Seti toose ni myaaka mayana kyeenda na ikumi na ivii, kafwaany.

⁹Enoshi etiri myaaka makumi kyeenda keera Kenani.

¹⁰Enoshi ammira Kenani kakaa-u myaaka mayana nyanya na ikumi na iraanu, kaira vana va kyuumi na va kyika.

¹¹Suku toose ta Enoshi ni myaaka mayana kyeenda na iraanu, kafwaany.

¹²Kenani kakaa myaaka makumi mfungare, kaira Mahalaleli.

¹³Kenani kakaa, myaaka mayana nyanya na makumi aana, ammaa yiira Mahalaleli, keera vana va kyuumi na va kyika.

¹⁴Suku toose ta Kenani ni myaaka makumi kyeenda na ikumi, kafwaany.

¹⁵Mahalaleli kakaa myaaka makumi arindaru na iraanu, kaira Yaredi.

¹⁶Mahalaleli ammiira Yaredi kakaa-se myaaka mayana nyanya na makumi araru, kaira vana va kyuumi na va kyika.

¹⁷Suku toose ta Mahalaleli ni myaka mayana nyanya na makumi arindaru na iraaru kafwaany.

¹⁸Yaredi kakaa myaaka iyana makumi arindaru na ivii, kaira Enoki.

¹⁹Yaredi ekiira Enoki kakaa myaaka mayana aana, kaira vana va kyuumi na va kyika.

²⁰Suku toose ta Yaredi ni myaaka mayana kyeenda makumi arindaru na ivii, kafwaan.

²¹Enoki kakaau myaaka makumi arindaru na iraanu, kaira Metusala.

²²Enoki keenda ariani na Iruva amma yiira Metusala myaaka mayana araru, kaira vana va kyuumi na va kyika.

²³Kafwa etiri myaaka mayana araru makumi arindaru na iraanu.

²⁴Enosi keenda ariani na Iruva, kareka kulu, mashika Iruva mmbwe alemwiipoo.

²⁵Metusala kakaa-u myaaka iyana makumi nyanya na mfungare, kaira Lameki.

²⁶Ekimaa yiira Lameki Metusala kakaau myaaka mayana mfungare makumi nyanya na ivii, kaira vana va kyuumi na va kyika,

²⁷Suku toose ta Metusala ni myaka mayana kyeenda makumi arindaru na kyeenda, kafwaany.

²⁸Lameki kakaa-u myaaka iyana makumi nyanya na ivii, kaira mwana,

²⁹Kamfishya irina ni Noe, kaamba, “Yeu mmbwe yeto asheluviiryaa muu efo mashoreny eru na ngatareny ta maako eru yaa ulanin elu Nndumi Iruva aleludenga.”

³⁰Lameki ammaa iira Noe kakaa-u myaaka mayana araanu makumi kyeenda na iraanu, kaira-se vana va kyuumi na va kyika.

³¹Suku toose ta Lameki mmbo alefwa etiri myaaka mayana mfungare makumi mfungare na mfungare.

³²Noe katira myaaka mayana araanu. Noe kaira Semu na Hamu na Yafeti.