Read BIBILLYA Mareiyo Meele a Iruva Mapookyony 9 Bible Online

Mapookyony 9 - BIBILLYA Mareiyo Meele a Iruva bible

Mapookyony 9

¹Iruva kavikya Noe mbora na vana vakwe, kavavia, “Fumbukeny mwishure uruka.

²Wo ifisi lyiiyo lyishemwereyaa neemureremya, na wo ndeye yeefo ngini-u, neefyo fyoose fiishwe efo si, makunga moose a efo yeeveny, mmbo fyambikwa maakony any.

³Efyo fyoose fikeenda fikee na muu nshoonga yaany, shasa shilemuninga mare a nyany ni indo-da shavemuniinga efi fyoose.

⁴Lyo samu, mulasheina-fo.

⁵Ni dede wo nndu apuswa samu ya nndu ungyi mmbo shimmbesaa. Na wo ifisi lyiwaa nndu mmbo shilyiwaa.

⁶Yeto ashepuswaa samu ya nndu nawe samu yakwe ishepusuwaa, mashika Iruva mmbo aleumba nndu wa fwana kyakwe.

⁷Neeni fwarikeny, mufumbuke, ngyeeri taany tiishure uruka!”

⁸Iruva kavia Noe, ando amwi na vana vakwe.

⁹“Lola-te yeny shikee ivika kyaasa neeni; na ngyeeri tafo ta numa.

¹⁰Na wo kyuumbe kyikee ando amwi neeni, ndeye, findo fyevikkya mmba, na wo ifisi lya ngoroshony yaa ulaniny lyikee neeni, fyoose efyo filesomuka isandukuny, na fyoose fikee na muu ulaniny.

¹¹Na kyaasa kyakwa shikeekyikaarisa kwany, ni indi, nta ekyo kyoose kitiri muu nkikyilyamarwaa-se na mura-fo; nta nkukyikaa-fo mura, nta mura yo numa ilyamara uruka-fo.”

¹²Iruva kaamba, “Elu llo wende lwa kyaasa ekyi shavika neeni, na wokindo kyuumbe kikee neeni, na ngyufyari toose fika llung'anu;

¹³Yeny shavika ukova lwa mmbwa mafishiny, llo lushevaa wende lwa kyaasa kyakwa nnang'ani yakwa na ulana.

¹⁴Neelyi nsheendee mafishi urukeny arandave, na ukova elo lushelollywa-u,

¹⁵Neeny mmbo nshekummbwa kyaasa kyakwa, ekyo kyikee nnang'ani yakwa neeni, na wo kiumbe kiiyo kitiri muu, nta mura mbushekifumbuka ilyamara fyoose fitiri muu-fo.

¹⁶Naasa ukova elo lushelollywaa mafishiny; neen nshelullaa, shikumbwe kyaasa kilya kya Iruva na vandu kya llung'anu na wo kyuumbe kiiyo kitiri muu kikee ulaniny.”

¹⁷Iruva kavia Noe, “Elu llo wende lushoora mma nnang'ani yakwa na findo fyoose fitiri muu kunu urukeny”.

¹⁸Vana va Noe valeuka isandukuny ni Semu, Hamu na Yafeti; na Hamu mmbwe ndeye wa Kanaani.

¹⁹Eva vararu mmbo vana va Noe, na ngyeeri yaawo nnyo ileishura ulana.

²⁰Noe kava nremi wa mbee, kavaaya irema lya misabibu.

²¹Kana mfinyu kanangwa kakaa-fo mbereto efo yeemeny lyakwe.

²²Hamu, ndeye wa Kanaani, kalolya ndeye eefo mbereto, kandevia vana va maye vavii vekee poo,

²³Semu na Yafeti vakaipoo soori ya nkorori vakailambara meeveny, wo ve vavii vakaenda venkapye mungo, valasheelollya usutu lwa ndeyaawo vakansikkya.

²⁴Noe kamarukya unangweny lwakwe kamanya kilya mwana wakwe n-du alentannya.

²⁵Kaamba, “Kanaani nave nndenge! Nasheva ishinga lya mashinga a vana va maye.”

²⁶Kaamba-se, “Semu avikywa mbora ni Nndumi Iruva, Iruva wakwa; Na Kanaani nawe ishinga lyakwe.

²⁷Iruva nang'anise Yafeti, Nakae meeminy a Semu. Na Kanaani nave ishinga lyakwe.”

²⁸Na Noe numa ya mura ulya kakaany myaaka mayana araaru na makumi araanu.

²⁹Myaaka myoose ya Noe ni mayana kyeenda na makumi araanu, kafwaany.