Read BIBILLYA Mareiyo Meele a Iruva 2 SAMUELI 1 Bible Online

2 SAMUELI 1 - BIBILLYA Mareiyo Meele a Iruva bible

2 SAMUELI 1

¹Sauli eekifwa llyo Davidi alewuya ammaa ivinga fira yakwe na Vaameleki, kakaa kulya Ziklagi ando a mikonu ivii.

²Nkonu yeto weletya kukasha nndu ooka fireny kulya Sauli eekai, afwani kiluulyi na soori takwe temmba ngosha, Llya alefika alya Davidi akai kawa si kamfiirya ndi.

³Davidi kammbesa, “A nkwi kooka? Kammbia, ‘Shooka kulya ulaleny lwa Vaisraeli.’”

⁴Davidi kammbesa, “A mmbo kileenda inda efo? Shakutereva shivia.” Nawe kammbia, “Vandu veru mmbo valefunwa vakarisha, na vandu veengyi vamfwa ando amwi na Sauli na mwana wakwe Yonatan”

⁵Davidi kammbesa, “A nkwi kwamanya Sauli amfwa ando amwi na Yonathan?”

⁶Nndu ulya kammbia, “Yeny mmbo sheekee uwe ya ifumbu lya Gilboa, shiilolaa, nawe Sauli eekusiiki na ifumu lyakwe lyo itorito vafrasi va vakiduva vekeembingya, na nalamanyi.

⁷Llya alelola numa ashilollye kashivaanga, shamwiirika.”

⁸Kashivesa, “Kwava vi?” Shammbia, “Shikee Mwemeleki.”

⁹Kashivia, “Osho, salala kufii neeny kushiwaa mashika mmbo shambaviswa nnu neeny mmbo shiyou kinanawo.”

¹⁰“Naasa shaansora shammbwaa, mashika llya shilelollya kambwa si nnyashiidimaa ikia-fo. Numa sheepoo kofia ilya ya kimangyi eeree na findo filya eeree efo maako, nafyo ekafi shifirye fyoose, mangyi.”

¹¹Nalyo Davidi karanndwa masara akwe, kyoora ting'wa, na valya vekee nawe vakavetana indo.

¹²Vekapa kiiyo vakaiya, valalye kindo fika nkwaany, veeshiyaa Sauli na Yonathan, na kya vandu vawo valefwa va mmba ya Israeli.

¹³Naasa Davidi kavia nndu ulya alemweengye mbony. “Nkwi kuukye?” Kammbia, “Yeny mmbo shikee mwana wa muny akee Mwaameleki.”

¹⁴Davidi kammbia, “A nta nkuleiryaa yoorwa woko lwafo kuwaa Nsauwe wa Nndumi Iruva?”

¹⁵Naasa Davidi kavaanga nsoro umwi kammbia, “Enda nkape kwamuutau,” Naasa kammbwaa.

¹⁶Davidi kammbia, “Samu yafo ikuwuye yewe kumuni, mashika ni yewe kumuni kwavika ukureeki kwaamba kulewaa Nsauwe wa Nndumi Iruva.”

¹⁷Naasa Davidi kaiya kya Sauli na mwanaakwe Yonathan eeshamba,

¹⁸Kikareiyo efo kyitabuny kya Yashari, kaamba, vana va Yuda Valoshwa findo efi:

¹⁹Valya vakee itumbe lyafo vakaa uwe deny ekakawo vammbwaawo, Ewe Israeli Lola shaasa vaafinya valetuulwa.

²⁰Mulakyaambe mbony yeti kunu urukeny lwa Gati-fo nta Mulavambise shieny ta Ashikeloni-fo. Naambo sambura ta Vafilisti valasheekapa Ukoru, Nawo ni vana va vandu valakee varini

²¹Neeni fidooro fya Gilboa, kwafo kulookefo laura nta mmbwa-fo, Nta fimu fya mareminy-fo Mashika kwafo nng'u tilewa ngao ta vaafinya Ngao ya Sauli, ikava sha ya ulya alandeambwa mafura

²²Valya mmbo valewaawa mashika Ura la Yonatan mmbo lwekeeronga Na usu lwa Sauli lukava wooyi

²³Sauli na Yonatan, vekee vakunde vakasennya Vekee na muu ao vammeefwa vakava kindo kyimwi Vakarumbuka sha ngoru, vakakaarya sha miiso

²⁴Yeni vaka va Israeli iyeny kwa Sauli, Alemuvika soori tidodorye ta itumbe, katishopa na saabu.

²⁵Shaasa vaafinya valewa fireny, Neewe Yonatany kwawaiyo uwe ya ifumbu

²⁶Shilerovyo nnu kimaruma kyafo, Yonatan wakwa nkunde, Elyi kweeshisenyi nnu. Ikunda lyafo lyeilanyi elyo lya vaka.

²⁷Apaa shaasa vaafinya valewa, Na shaasa fisha fya fira filemamitwa.