Read BIBILLYA Mareiyo Meele a Iruva 2 SAMUELI 14 Bible Online

2 SAMUELI 14 - BIBILLYA Mareiyo Meele a Iruva bible

2 SAMUELI 14

¹Naasa Yoabu mwana wa Serya kamanya shaasa mangyi Davidi akunndye Absalomo.

²Yoabu karuma vandu veende Tekoa, karuma nandeendwa-fo nka umwi atiri urango deny, kashemmbia, “Nkyekunang'are sheelyi kukee kiiyony, kuraa na soori ta kiiyo sheelyi kwafiiyo, mmbo shakutereva kulakwaambe nta mafura-fo, naambo kuve sheelyi kwankaa kiiyony fyeeri fyaasha.

³Llyo kweendeny kwa mangyi kunndemmbia, ‘Nalyo Yoabu kammbia shaasa andevia mangyi.’”

⁴Nawe nka ulya wa Tekoa llya aleanga kwa mangyi kandewa-si kifulu-fulu yoo mbee ya mangyi kammfiiryaa ndi kammbia, “Woi mangyi mmbo shakutereva, shitarama ukiva lwakwa.”

⁵Mangyi kammbia, “Niinda?” Nawe kammbia, “Shaasa kushilollye, mangyi, yeny mmbo shikee nka wa ding'u.

⁶Neeny kishinga kyafo mmbo sheetiri vasero vavii, nawo vakeenda kyaandeeny vakakabana, nawo veekitura nndu avaleta, umwi kakaba yeto ungyi kammbwaa.

⁷Nalyo vandu woose vakashiindukya yeny vakaamba, ‘Ende nsoro yeto alewaa yeto ungyi naambo luntaiye kiduva elyi alewaa yeto ungyi, lummbwae nawe. Nawe nta nnyashewonaa muye ding'u-fo. Naasany niindo vakunndye ishisoka ekyo kileshikiiya-u deny, kirumike-u, nta mmbakunndye ireeya mmi wakwa muya ding'u-fo.’”

⁸Nawe mangyi kavia nka yeto, “Kweengye kyeny, shikweenkyaa.”

⁹Nalyo nka yeto wa Tekoa kavia mangyi, “Woi mangyi nndumi, uravi elu lushiwuiye yeny na mmba ya nde, lyo lulawuiye mangyi nta umangyi lwakwefo.”

¹⁰Nawe mangyi kaamba, “Kwakooya nndu akurerya osho shivia, nawe nnyakureryaa lyingyifo.”

¹¹Nawe kammbia, “Woi mangyi nkyekummbwa Nndumi Iruva, Iruva wafo naambo yeto ataiya kiduva neewaa naleengere ilyamara, na mwana-akwa nasandyo-fo.” Nawe kaamba, “Mmbo shakuvia na irina lya nndumi Iruva nta ufii lumwi lwa mwana wafo lluwaa si-fo.”

¹²Nka yeto kammbia, “Nkye ra yeny kishinga kyafo shirere na mangyi lyimwi nsi ulaalu.” Nawe kammbia, “Kwaambaye.”

¹³Nka yeto kaamba, “A nkyikyi elyi yewe kulekusara indo kya vandu va Iruva? Kyasheengye shaamba indo mangyi mmbo aleera mbai, mashika mangyi nnyaleviira mwiirishiswa ulya wakwe-fo.

¹⁴Mashika yese loose lufwe, mmbo luvakye mura wapusuka ulakivaa iraa-u. Nawe Iruva nnyawaa nndu-fo. We mmbo akusara mesha kya yeto mwiirishiswa.

¹⁵Naakwa ni elyi shasha yaa ulaalu isherera na nndumi wakwa mangyi ni elyi vandu valesheerese nnu, neeny kishinga kyafo shakusara, ‘Ra shinderera na mangyi, kulakooye mangyi asheshiniingaa ekyo shantereva.

¹⁶Kimmba mangyi ashaarannya naambo naauwe ishinga lyakwe maakony a yeto akunndye ishimamita yeny na mwana yeto wakwa naluute yaa ulaniny Iruva aluvikye.’”

¹⁷Nalyo shaamba, “Ekyo nndumi wakwa mmbo akee sha nsu wa Iruva, aidima irauwa mesha na makasha we nndumi Iruva, Iruva wafo nakukaye.”

¹⁸Nawe mangyi kavia nka ulya, “Ulaalu mmbo shakutereva, kulashisurumi nta kindo kyimwi kya efyo nkuvesaa-fo,” nka yeto kaamba, “Kwaambaye mangyi wakwa nndumi.”

¹⁹Mangyi kammbesa, “Ni Yoabu alekutannya efyo fyoose?” Nawe kammbia, “Woi mangyi nndumi, dede nkwiifo nndu ashiidimaa ilema ekyo mangyi ammaamba na katana-ki-fo, mashika nsero wafo Yoabu mmbwe ashivavavasya kashoora ekyo shireraa yeny kishinga kyafo.

²⁰Na nsero wafo Yoabu mmbo atana indo naambo naalashe kindo ekyo. Nawe mangyi nndumi wakwa mmbo akee mwaarya nnu kavaka nsu wa Iruva, katana amanya mbony ta ulana loose shaasa tikai.

²¹Llyo mangyi alevia Yoabu, ‘Naasa shanrummbwa mbony yei, enda kundeviira Absalomo nashe.’”

²²Nawe Yoabu kawa si kifulu-fulu kanfiirya ndi, kaana mangyi, kaamba, “Shallollya shaasa inu shawonisa ikiiyo yoo kwafo, woi mangyi wakwa nndumi, kimmba mangyi aniinga nsero wakwe filya fyekeemperesha nriminy.”

²³Llyo Yoabu aleuka-u keenda fika Geshuri, keende Absalomo fika Yerusalemu.

²⁴Mangyi kavavasa Absalomo nalashe kwakwe-fo, lyo neende kyeny.

²⁵Kulya Israeli koose nkweifo nndu esennyi sha Absalomo-fo. Pookya uvayo fika nrweny nnyetiri teve-fo.

²⁶Fii ta nrwe wakwe mmbo teesangi kamu, tikava shiroo, nawe kava mwituuta wo mwaka lyimwi.

²⁷Absalomo mmbo eniingwa vana vararu va kyuumi na umwi wa kyika. Yeto wa kyika ni Tamari, nawe eke nsha nnu. Davidi asarya Absalomo

²⁸Absalomo mmbo alekaa myaaka ivii myoose kulya Yerusalemu kulore alollya mangyi neeriso.

²⁹Naasa karummya Yoabu nrumi, naambo nashenrwaa kwa mangyi, kyeendi nalakunde isha. Kanrummya nrumi lya kavii kavelema-da.

³⁰Naasa Absalomo kavia varundi vakwe, “Kimmba nrema ya Yoabu ya nganu ifiitani na wakwa, endeny mukandewaatya muro.” Nalyo varundi va Absalomo vakandelyaatya muro.

³¹Llyo Yoabu alesora Absalomo kyeny kwakwe kandemmbia, “A mmbo kyava inda elyi varundi vafo vakora nrema yakwa?”

³²Absalomo kammbia, “Yeny mmbo shilekurummya nrumi kushe kwakwa naambo kushirwaa kwa mangyi shindemmbesa, ‘Mmbo kilemaany-ki elyi shilooka Geshuri? Nshi kyeevaa kyeni kukooye shilekukaya-fo deny?’ Ulaalu shikunndye ifika mbee ya mangyi, na kwakooya shilyamarye nashiwaa.”

³³Naasa Yoabu keenda kanderuuya mangyi efyo fyoose, nawe kavaanga Absalomo nawe kawa si kifulu-fulu, kamwiindya, mangyi nawe kamiminda Absalomo kyeemmbwarya.