Read BIBILLYA Mareiyo Meele a Iruva 2 SAMUELI 17 Bible Online

2 SAMUELI 17 - BIBILLYA Mareiyo Meele a Iruva bible

2 SAMUELI 17

¹Ahitofeli keengera ivia Absalomo, “Shira shisauwe vandu fiku ikumi na fivii neeny kio ekyi kyeni shisore Davidi,

²neeny mmbo shindenrayaa kyeeri aaraye, nalakiidimaa itana kindo, naawukwa deny. Llyo vandu yewo vakwe woose varishaa, neeny shiwaane na mangyi muni.

³Neeny llyo nsheviraa vandu yewo vakwe kwafo, nalyo uruka mmbo lushetiraa ufoo.”

⁴Nakyo kikasennya Absalomo ando amwi na Israeli woose.

⁵Naasa Absalomo kaamba, “Vaangeny Hushai Mwariki lwaarannyi makusaro akwe nawe.”

⁶Naasa Hushai ekifika kwa Absalomo kammbia shaasa Ahitofeli aleamba, kammbesa kwakooya kivaa itana indo, ao kwaluvia makusaro afo.

⁷Nawe Hushai kavia Absalomo, “Kindo ekyi Ahitofeli arera nkivaa itana ulaalu-fo.”

⁸Hushai keengera yaamba, “Yewe kwiishi na vandu vakwe shaasa vakee vakaari, nawo vakee vanyaasi sha ngare yasokwa ngurana ya vayo efo kasa. Na kingyi-se, ndoo ni inndu lya fira, nnyalalaa yoo vasikari vakwe vakai-fo.

⁹Mwiishi, ulaalu mmbo akemoovise mbangeny, ao ando kungyi. Nkyo kyeeri maata vawo vashewaawaa, wo nndu ashiitaa mmbo ashaambaa, ‘Ekakawo vandu va Absalomo vanshishwa sha ng'umbe.

¹⁰Nalyoony naakwa ni ulya akee nkaari sha miiso, mmbo asyaa neeke sha muuya, mashika Israeli woose mmbo veeshi shaasa ndoo akee nkaari na vandu vakwe woose kiwo.’

¹¹Nkyo yeny mmbo sheshaamba indi, ‘Israeli woose pookya Dani fika Beer-sheba vashe yaa kukai, vashe woose piny, shaasa vafye neewe kuvasongoye kumuni fireny.

¹²Llyo yese lusherorovaa efo koose Davidi akai na kukava kwi. Neese llyo lushemmboyaa tiny shaasa laura yooloka, lulalekeyaa nta umwi waawo naturushuke-u.

¹³Nalyo kwakooya nkundo kwa muriny akai, vandu veru mmbo vavivaa muri yeto moose luurwaa imungony, kulasherewaafo nta iwe lyimwi.’”

¹⁴Nawe Absalomo na vandu vakwe woose vakaamba, “Ekyo Hushai aamba nkyo kikee kisha ngota kilya kya Ahitofeli.” Kimmba nawe Nndumi Iruva mmbo alema ekyo kya Ahitofeli naambo urumato lusheye Absalomo.

¹⁵Naasa Hushai kavia vakohani valya Sadoki na Abiatari, Ahitofeli mmbo ammivia Absalomo na Israeli woose kindo kivasumannyi itana, neeny shavevaniinga makusaro akwa.

¹⁶Nkyo ulaalu rumyeny Davidi nrumi mummbie indi, “Kio ekyi kya inu lola nnu kulashelala kufii na iriko llya lya kasa, naruuke we na vandu vakwe, nalashekooywa kunu namamitwa we na vandu woose.”

¹⁷Nawe Yonatan na Ahimaasi mmbo vekee kufii na Enrogeli yevereyaa nka umwi kava mwiveengye mbony, nawo vakanderwaaya Davidi mbony yeto, wo vaka yewo vakakusuruma naambo valalollyo veshaa na kulya muriny.

¹⁸Lyo kukava-fo nsoro umwi avalollya kandevia Absalomo. Nalyo vakeenda ve wavii veshaangusyaa, vakafika Buharimu kyeny kwa nndu eetiri kirori ekyo kya mura efo kari kwakwe, vakooloka efo kiroriny.

¹⁹Na nka yeto muni keepoo kifiniko kafinika yoo kaniny kya kirori ekyo, kaalala-u nganu kaanika naambo nndu nalalollye-u.

²⁰Naasa vasero va Absalomo vakasora nka ulya efo mmba vakammbia, “A Yonatan na Ahimaasi nkwi vakai?” Nka ulya kavavia, “Mmbo varuuka mura vakeenda.” Veekivauwa valavalollye vakawuya Yerusalemu.

²¹Veekiwuya vandu valya vakooka yefo kiroriny, vakandevia Davidi vakaamba, “Ukeny yaa muruuke mura sere, niindo Ahitofeli alluvia.”

²²Nawe Davidi kooka-u ando amwi na vandu vakwe woose, vakaruuka Yordan, neelyi kulekya vemmaa iruuka woose.

²³Naasa Ahitofeli ekilollya kilya alevavia nkyalatywa kasaama nshungu wakwe, keenda kyeny kulya muriny wakwe. Nafo kasongosya mbony ta mmba yakwe, kakuvanika kafwa; kanderikwa kulya kifuny kya ndeye.

²⁴Davidi kandefika Mahanaimu. Nalyo Absalomo karuuka Yordan ando amwi na Israeli woose.

²⁵Nawe Absalomo kavika Amasa natetere vasikari vakwe woose ando a Yoabu. Amasa yeu mmbo eke mwana wa nndu avaangwaa Yeteri, nawe ni Mwismaili, maye ni Abikaili mfu wa Nhashi mfwamaye wa Seruya, maye wa Yoabu.

²⁶Absalomo na vandu vakwe mmbo valendemannya ulale kulya Gileadi.

²⁷Nalyo Davidi ekifika Mahanaimu, Shobi mwana wa Nahashi wa Raba, nawo ni Vaamoni, na Makiri mwana wa Amieli wa Lo-debari, nawo Barsilai, Mgileadi wa Rogeli.

²⁸Vakeende nafo mboloko teelaya na bakuri, na nungu na nganu, na nswa na soko ta ngata shiingyi,

²⁹na wukyi na mafura eevee, na moonri na mafura a ng'umbe, naambo Davidi na vandu vakwe vakooye ilya, mashika elyi valelollya yefo kasa mmbatiri shoonga-fo, mmbo vaaraye na yaakuka.