Read BIBILLYA Mareiyo Meele a Iruva 2 SAMUELI 19 Bible Online

2 SAMUELI 19 - BIBILLYA Mareiyo Meele a Iruva bible

2 SAMUELI 19

¹Nawe Yoabu kashevio shaasa mangyi akeeiya kya Absalomo.

²Nkyo ivinga lyawo fireny nkonu ulya lyikava nkiiyo kwa vandu va uruka woose, llya valemanya sheelyi mangyi mmbo atirwa mfoova kimaruma kya mwana wakwe Absalomo.

³Vandu vakaovya nkonu ulya, vetirwa ni usutu sha vandu varisha fireny.

⁴Naasa mangyi kasikya kisangu kyakwe kaiya neefwa nnu, wo mwanakwa Absalomo, Absalomo mwanakwa, wo mwanakwa!

⁵Kyasian, Yoabu kashefika kwa mangyi kammbia, “Inu yewe mmbo kwallyilyisa vandu vafo mmbo vasero vafo woose valekwaauwa kulashewaawa, yewe na vana vafo, wa kyuumi na va kyika, na vaka vafo, na fishinga fyafo.

⁶Lyo yewe koora inu shaasa kukuundye yewo vakusuuye, kwavesua yewo vakukundye. Inu mmbo kwaamba paa sheelyi vasongoru na vasero vafo nshi kindo, kwafo yewe-fo, mashika inu llyo shamanya deny, kukooye Absalomo mmbwe akya neese loose lusye, mmbo kyeekusennya yewe deny.

⁷Naasany ulaalu somukya na poo, kundeviirya vasero vafo muu mashika lyo yeny mmbo shakuvia na irina lya Nndumi Iruva kwanra kulasomuka, nkwiifo nta nndu umwi akaa kyaalu kyafo inu-fo, neekyo kishuukaau mmbo kishevaa kikasha ngota efyo kulellollya uka udu lwa-fo fika inu.”

⁸Nawe mangyi kasomuka kandekaa yoo ngiriny. Na vandu vakandevywa mangyi nnyoo ngiriny akai nawo vakeenda vakasorau mangyi. Nawo mmbo vemmeenda wo nndu yeemeny lyakwe.

⁹Efo ngyufyariny toose vandu va Israeli vakasakya veni na veni, vakaamba, “Mangyi mmbo aleluuta maakony a vakiduva veru, kaluauwa makony a Vafilisti, kyeendi we karisha mbee ya Absalomo kasama urukeny.

¹⁰Nawe Absalomo yeto lulensauwa nave mangyi yeeru, mmbo amfiyya fireny. A ekyo kyeema ulaalu lulaambe mangyi naviiryo kiri kyakwe nkyoki?”

¹¹Naasa mangyi karuma nrumi kwa vakohani valya Sadoki na Abiatari vandevio, “Rereny na vamiku va Yuda woose, muvavie, ‘Ankyiki elyi mwafurumya indo yaamba ulaalu mangyi nawuye?’ Mashika mmbo ammiita shaasa Israeli valeamba, naambo vammbiire-se.

¹²Yeni mmbo mukee va iffwa na samu yakwa, nkyiki musheva va mafurumyony iviira mangyi kyeny.”

¹³Naasa endevieny Amasa, “A nshi yewe kukee samu yakwe shimuni, iffwa na nyama yakwa?” Nawe Iruva na lwaauwe we muni, kwanra kulava yewe ando a Yoabu, kutetere vasikari vakwa woose kyeeri kya-fo kyoose

¹⁴Elyi alerera indo kava mmbo antira mirima ya Yuda woose vakava vamwi nsi. Nawo kavavia mangyi, “Woi mangyi, wuya yewe na vasero vafo woose.”

¹⁵Nalyo mangyi kawuya, kafika alya Yordan. Na Yuda vakasha Gilgali vasheammbya mangyi, vanduute Yordan.

¹⁶Shimei we mwana wa Gera, wa ufyari lwa Benyaminy wa Bahurimu, kaangusya isoka na vandu va Yuda naambo lundeammbya mangyi Davidi.

¹⁷Nawe mmbo eeriani na vandu kyiku. Nawe Silba ulya eke ishinga lya Sauli, ando amwi na vana vakwe ikumi na varaanu, na mashinga makumi avii, vakasongoya mangyi iruuka Yordan.

¹⁸Na ngalava imwi ikaruuta vandu va mangyi nakyo kikansennya. Llyo Shimei mwana wa Gera kawo si yoo mbee ya mangyi akimaa iruuka Yordan.

¹⁹Kammbia, “Woi nndumi wakwa mangyi kulasue, nta kulasheekummbwa makasha akwa moose shiletana kyeeri kilya nndumi wakwa aleuka Yerusalemu.

²⁰Mashika yeny shiishi ukasha lwakwa. Na yeny mmbo shava wa mbee wa mmba ya Yosefu isheammbya nndumi wakwa mangyi.

²¹Naasa Abishai mwana wa Seruya karouwa kaamba, Shimei mmbo araa nalawaawa llya alearara needenga mangyi nsauwe wa Nndumi Iruva?”

²²Lyo mangyi Davidi kaamba, “Ekyo kyamuting'a nkyoki yeni vana va Seruya kutani mwava vakiduva vakwa inu? A mmbo akifwaa nndu ungyi yaa Israeli inu? A mmbo shilaishi sheelyi yeny mangyi ya Israeli?”

²³Nalyo mangyi kaamba, “Shimei, nkufwaa-fo. Mangyi kallyiya mboo.”

²⁴Naasa Mefiboshet nshuku wa Sauli keenda naambo nandeammbya mangyi Davidi, nawe nnyeutye fii-fo, nta ngyala ta marende nta yuuta nguyo-fo, nta nnyalesangya soori takwe-fo, kipookya nkonu ulya mangyi alerisha Yerusalemu, kufike nkonu ulya alewuya.

²⁵Naasa eekifika Yerusalemu yaammbya mangyi, mangyi kammbia, “Ale Mefiboshet, nkyikyi elyi kulore kulevandama neeny llya shilerisha?”

²⁶Nawe kammbia, “Nndumi wakwa mangyi, ni ishinga lyakwa lyileshilemba, mashika yeny nsero wafo mmbo shekunndye ideesya nshungu wakwa, shisaame naambo sheende shivandame na mangyi, kimmba shikee kitongororo shilashiidimaa ivarya na marende.

²⁷Nawe mmbo aleshiriingya kwafo, woi mangyi, lyo mangyi nndumi wakwa mmbo akee sha nsu wa Iruva. Woi mangyi kushitanyiny ekyo kyakusennya.

²⁸Mashika lyo vandu va mmba ya nde mmbo veesumani ifwa mbee ya mangyi, lyo kwalanga ishiwarya yeny nsero wafo shive mwiilya neewe neena neewe. A ni usumanu kyi shitiri lwefuuya mangyi kya mmwasi?”

²⁹Naasa mangyi kammbia, “A nkyikyi elyi kweengera irera efyo fyoose. Yeny shimurammbikyaa umangyi lwa Sauli mukwaavye na Siba.”

³⁰Mefiboshet kammbia, “Naakwa Siba awarya ding'u shoose lyo yeny mmbo shifurye elyi mangyi nndumi wakwa awuya na ufoo.”

³¹Nawe N'gileadi ulya Barsilai kasoka auka Rogelimu keenda aryani na mangyi kutani vakillya mura wa Yordan.

³²Barsilai mmbo ammikwa deny, wa myaaka makumi nyanya. Mmbwe eva mwiniinga mangyi shoonga kulya Mahanaimu, kimmba elyi eke nndu atiri wiidimi uniini.

³³Naasa mangyi kavia Barsilai, “Luruuke loose, neeny shindekulellya kulya Yerusalemu.”

³⁴Lyo Parsillai kavesa mangyi, “A ni myaaka iinga ikwaani sheengyere naambo shiidimi yeenda na mangyi ya Yerusalemu?

³⁵Inu nshitiri myaaka makumi nyanya, a shishiidima-se yaawuya kyindo kisha na kikasha? A ishinga lyimanyaa-se kyindo lyilyee ao lyinee? A shikyaaranyaa ngyunyanga ta veembi womi na vaka? A nkyikyi ishinga lyeengyere irovyo kya mangyi?

³⁶Ishinga lyafo llyisheenda lyikillye Yordany kinnywa na manyi. A nkyikyi mangyi ishitee na raangya sha eywa?

³⁷Shatereva, ra ishinga lyafo lyiwuye, naambo shindefiiyya muriny mbwakwa, kufii na fifu fya nde na ma wakwa. Indi ayi ishinga lyafo Shimhamu; lyire lyeende na kwakulya amwi na nndumi wakwa mangyi; lyintannye wo kyindo kwakunda.”

³⁸Na mangyi karouwa kaamba, “Shimhamu mmbo asheenda kwakulya neeny na yeny shintannye shaasa kwakunda; wo kyindo kushiterevaa mmbo shikutannyaa.”

³⁹Llyo vandu woose vakakillya kwakulya ya Yordany na mangyi karuuka; mangyi kakaba kiisi Parsillai na kammbikkya mbora kanra keenda kyeny kwakwe muni.

⁴⁰Mangyi keengera kyaaro fika Kilkali na Shimhamu keenda nawe; vandu woose va Yuda na kyenga kya vandu va Israeli, vakyeemya mangyi kyaarony kyakwe.

⁴¹Llyo vandu woose va Israeli vakasheya mangyi vakammbia, “A nkyikyi mwamaaye weeru, vandu va Yuda vakwiiwa, vakaruuta mangyi na va mmba yakwe Yordany, na vandu va Davidi woose amwi nawe.”

⁴²Womi woose va Yuda vakarouwa womi va Israeli, “Ni kyimaruma mangyi mmwanamaaye weeru. A nkyikyi mwasswa kya mbony yei? A llwallya kyindo kyoose kya mangyi? Ao nnyalluniinga simbo nta imwi?”

⁴³Na vandu va Israeli vakarouwa womi wa Yuda vakaamba, “Mmbo lutiri fyenga ikumi kwa mangyi na kwa Davidi mmbo lutiri mmwasi yaany. A nkyikyi mwalwiila? A nsheese-se lweeke va mbee irera kya iviira mangyi eru?” Indi marero a womi va Yuda akavava na ngota a womi wa Israeli.