Read BIBILLYA Mareiyo Meele a Iruva 2 SAMUELI 20 Bible Online

2 SAMUELI 20 - BIBILLYA Mareiyo Meele a Iruva bible

2 SAMUELI 20

¹Nalyo kweefo nndu umwi wa ngula evaangwa Sheba, wa Bikri wa ufyari lwa Benyamen. Nndu yeu mmbo ekaba iranda kaamba, “Yese llukee va Davidi-fo, nta llutiri ding'u na mwana yeu wa Yese-fo. Yeni Israeli wo nndu naware shia keenda.”

²Vana va Israeli veeta indo vakarafo isora Davidi vakasora Sheba wa Bikri. Lyo wo vandu va Yuda vakeengera isora mangyi waawo Davidi uka alya Yordan vakandefika Yerusalemu.

³Naasa mangyi Davidi ekifika Yerusalemu keepoo vaka valya fishinga ikumi, valya alevareeya mmba vailole, kavavika efo mmba vakaefo sha vaka va ding'u, vakaringwa kulave nndu aanga kwawo. Vakaringwa indo fika ifwa lyawo.

⁴Nalyo mangyi kavia Amasa, “Endeende vandu va Yuda vashekaa ya ando a mikonu iraru, neewe kukeeu.”

⁵Amasa keenda kavasang'irya, lyo kakyeeyo iwuya na kyeeri kisumani.

⁶Naasa llyo Davidi alevia Abishai, “Sheba mwana wa Bikri mmbo arye ilumaa, kakashaa ngota Absalomo. Ipoo vasero va nndumi wafo kunsore nta nalasheewona mwaanya wa yaanga muriny utiri turuve-fo, mashika mmbo asheovyaa-fo”

⁷Naasa llyo vandu va Yoabu, na Vakerete, na vapeleti, na vandu vakaari woose valesomuka wooka kulya Yerusalemu vakandevingya Sheba wa Bikri.

⁸Naasa veekee alya iweny llya iniini lya Gibeoni, Amasa kashevaammbya. Nawe Yoabu mmbo eree masara akwe a fira, na nkanda, na usu kisiny, naasa elyi eefo asheendaa indo usu lwakwe lukawa si.

⁹Yoabu kavia Amasa, “Ufoo lukae neewe mwanama.” Naasa llyo Yoabu katira Amasa nguyo takwe na woko usha sheelyi ammimindaa.

¹⁰Nta Amasa nnyalelola usu elo lweekee wokony lwa Yoabu-fo. Naasa Yoabu kanrandwa nalo ndeu maala akakillya si moose nta nnyalembiirya-fo, kafwa. Numa Yoabu na Abishai mwanamaye vakasora Sheba wa Bikri.

¹¹Nsero umwi wa Yoabu kasalala kufii nawe kammbia, “Yeto akundye Yoabu akee kyaalu kya Davidi nasore Yoabu.”

¹²Kyeeri ekyi lyo Amasa we nkulya shia ekekummbya muu epusukaa samu. Nndu ulya alollya vandu woose vansalala veelolaa kandeipoo nnying'a wa Amasa kandewoososya soori kandeurika.

¹³Kyeeri ekyi valya va Amasa vakasora Yoabu naambo vanderuuya Sheba wa Bikri.

¹⁴Nawe mmbo aleira efo kwa Vaisraeli woose fika Abeli, na kwa Betmaaka na kwa Vabikri woose, neewo vakakulunga woose varuuye Sheba.

¹⁵Nawo vakashenshingillya efo Abeli ya Bet-maaka, vakasang'irya uteri sha usau yoo isimambeny lya muri, llyo vakafisha isimamba lya muri.

¹⁶Nafo kweefo nka umwi nnrango, kaonisa unyanga kaamba, “Shaarannyiny, shaarannyiny-te, vieny na Yoabu nashe na yaa kufii, shirere nawe.”

¹⁷Naasa Yoabu kasembeya nang'u nka ulya kammbia, “Nnyewe Yoabu-ro?” Kammbia, “Yee.” Nawe kammbia, “Arannyany marero a kishinga kyafo.” Na Yoabu kammbia, “Shiitye-te.”

¹⁸Nka yeto kaamba, “Elyo kasha vandu mmbo veeshaambaa, ‘Mulare mularuuya mbony kulya Abeli.’ Nawo niindo valetana.

¹⁹Yenu mmbo shikee kyaalu kya yewo veeruuya ufoo vakee kunu Israeli. Yewe mmbo kukunndye imamita muri yeu ukee nto maye wa Israelli. Nkyikyi elyi kukunndye imamita ding'u ya Nndumi Iruva?”

²⁰Nalyo Yoabu kanrouwa kammbia, “Nta kilave indo kwakwa, nshikunndye ilyamarafo.

²¹Shaasa kukusarye nshi indo-fo. Lyo mmbo kwiifo nndu umwi wa kulya mafumbuny a Efraimu avaangwaa Sheba wa Bikri, nawe mmbo akundye iwaa mangyi, Davidi-sho, kyasia nsomuteny we muni nsi, neeny shuuke kunu muriny yeu.” Nawe nka ulya kavia, Yoabu, “Vereya kweeryo nrwe wakwe neefo uwe ya isimamba.”

²²Naasa nka ulya kasora vandu woose karera nawo na urango. Vakarummbwa Sheba mwana wa Bikri nrwe vakeerya Yoabu efo poo, nawe kakaba iranda, wo nndu kawara shia yakwe keenda kyeny. Yoabu nawe kawuya kwa mangyi kulya Yerusalemu.

²³Nawe Yoabu mmbo ekee mwiisalallya vasikari woose va Israeli. Benaya mwana wa Yehoyada kasalallya Vakereti na Vapeleti.

²⁴Adoramu we kasalallya mashora a finya, Na Yehoshafati mwana wa Ahiludi kava mwiireiya findo fyeekumbura.

²⁵Shausha we mwiireiya findo. Sadoki na Abiatari wo makohani.

²⁶Na ungyi ni Ira wa Yairi, we mmbo eke nkohani wa mangyi Davidi.