Read BIBILLYA Mareiyo Meele a Iruva 2 SAMUELI 24 Bible Online

2 SAMUELI 24 - BIBILLYA Mareiyo Meele a Iruva bible

2 SAMUELI 24

¹Nawe Nndumi Iruva karooywa ni unyafi kimaruma kya Israeli. Keesa Davidi naambo naveengye ukiva, kammbia, “Endeekyena Israeli na Yuda.”

²Llyo mangyi evia Yoabu, ulya eesongoye vasikari vakwe, “Ira efo ngyufyariny toose ta Israeli, pookya Dani kufike Beerseba, mundeekyena vandu, naambo lumanyi yeekyena lyawo.”

³Nawe Yoabu kavia mangyi, “Nndumi Iruva wafo nafumbute vandu, veengereke ka iyana, na mangyi nndumi wakwa nasennyo mmbo, lyo nkyikyi elyi nndumi mangyi asennyo nkindo ekyi?”

⁴Lyo nnyalealasha kilya emmaamba-fo. Naasa Yoabu kookau na vasongora woose va vasikari vakandeekyena vandu va Israeli.

⁵Vakanderuuka Yordan vakandemannya ulale alya Aroeri taari ya woko usha lwa muri ulya nnang'ani ya imungo lya Gadi fika Yaseri.

⁶Vandu va ufyari lwa Giliadi vakasha na Vahiti efo Kadeshi, vakasha Dani, na kuuka Dani vakandefika Sidoni.

⁷Vakandefika turuveny ya Tiro, na miri myoose ya Vahivi na ya Vakanaani. Na lyingyi vakooka miriny ya Yuda efo Beerseba.

⁸Vekimaa yiira urukeny koose, vakashefika Yerusalemu kummisya miiri keenda na mikonu makumi avii.

⁹Nawe Yoabu kasheenngye mangyi yeekyena lya vandu woose. Na Vaisraeli valya veekamara usu vakava fiku mayana nyanya na va Yuda fiku mayana aranu.

¹⁰Davidi eekimaa yeekyena vandu kasavaa nriminy. Nalyo kavia Nndumi Iruva, “Mmbo shallyamara deny elyi shileekyena vandu. Nkyo ulaalu woi Nndumi Iruva mmbo shakutereva kushuute uravi elu, mashika yeny nsero wafo mmbo shiletana utondo deny.”

¹¹Elyo lya ndesi irero lya Nndumi Iruva lyikasheya nkisuku wa Davidi we Gadi lyikammbia,

¹²“Enderera na Davidi kumbie, Nndumi Iruva aamba indi, ‘Mmbo shakuniinga findo firaru kusauweu kyimwi shikutannyi.’”

¹³Nawe Gadi kandevia Davidi, indi, “Kwasauwa myaaka mfungare ya shaa ikusheye urukeny lwafo? Ao, vakiduva vafo vakurishise ando a miiri iraru? Ao urukeny lwafo luwonise ndwari shuumu ando a mikonu iraru? Kwaambe ekyo kwasauwa-u, shinderouwa yeto ashiruma.”

¹⁴Nalyo Davidi kavia Gadi, “Mmbo shamfulukyo deny. Ulaalu ra luwoye yoo wokony lwa Nndumi Iruva, kimmba isarya lyakwe ni iniini lyo shilawe maakony a nndu wa vandu-fo.”

¹⁵Naasa Nndumi Iruva keengye Israeli ndwari shuumu ikapooka ngama kufike nkonu ulya ukeendeerye imande. Vandu fiku makumi mfungare vakafwa pookya Dani fika Beer-sheba

¹⁶Kyeendi kyeeri nsu ulya alekunda yeenda Yerusalemu nandevakaba Nndumi Iruva kaalasha, kavia nsu yeto wakwe “Naasa kifye, ra.” Nawe nsu ulya wa Nndumi Iruva mmbo emfika alya muunguny weekapya nganu wa Arauna, Myebusi.

¹⁷Davidi eekilollya nsu ulya alerumwa kavia Nndum Iruva, Lola Nndumi Iruva ni yeny shilekulyamarya, nnyeny shilerenga, “A vandu yeva nkyoki valelyamara? Shikaba na mmba ya nde nakamwi.”

¹⁸Nkonu yeto Gadi kasora Davidi, kammbia, “Kupoo kundeutya Nndumi Iruva kiraso alya muunguny kwa Arauna, Myebusi.”

¹⁹Nalyo Davidi karwa kandetana shaasa Nndumi Iruva alemmbavasya na kana kya Gadi.

²⁰Arauna yeto kalola, kalollya mangyi na vandu vakwe llya veefo vashaa na kwakwe. Arauna kakupoo kawo si kifulu-fulu yoo mbee ya mangyi.

²¹Arauna kaamba, “A nkyoki kyeende mangyi nndumi wakwa kwakwa?” Davidi kammbia, “Mmbo shasha naambo nshoora muungu yeu, shitanyi-u Nndumi Iruva ando eerasya, naambo ndwari ilya shuumu yuutwa kweru.”

²²Naasa Arauna kavia Davidi, “Mangyi nndumi wakwa nawarye ando yaa natannyi-u shaasa akunda we muni. Mangyi lola kwiiyo na ng'umbe ta yuuta kiraso kyeekora na muro, kwiiyo na fiiya efi fyeekaba nganu, na mitaato ya ng'umbe mfyo fivaa ngwi ta muro yeto.

²³Findo efi fyoose, woi mangyi, mmbo shafikuniinga yewe.” Naasa Arauna kavia mangyi, “Nndumi Iruva, Iruva wafo nakunde ikwiirikya.”

²⁴Kyeendi mangyi kavia Arauna, “Oode, kilasheeva indo-fo, findo efi mmbo shifyuuraa kwafo shitaa wuuru lwa vayo songosiny, mashika nshikunndye yuutya Nndumi Iruva, Iruva wakwa firaso fyeekora na muro shilavinyi-fo.” Nalyo Davidi koora ando kwekee muungu weekapya nganu na ng'umbe tilya kataa fesa ta vayo.

²⁵Nawe Davidi katannya-u Nndumi Iruva kitara kyeerasya, kootya-u na firaso fyeekora na muro fya ufoo. Nawe Nndumi Iruva keerikya kiterewo kyakwe, na ndwari yeyo shiroo yensheya Israelli ikamanda llya yeni.