Read BIBILLYA Mareiyo Meele a Iruva 2 SAMUELI 3 Bible Online

2 SAMUELI 3 - BIBILLYA Mareiyo Meele a Iruva bible

2 SAMUELI 3

¹Naasa kukakaafo fira ya vandu va Sauli na valya va Davidi lyo Davidi keengera iwona finya kairya Sauli.

²Nawe Davidi kyeeri ekee Hebron kawona mwana wa mbee kammbaanga Amnoni, maaye ni Ahinoamu wa Yezreeli.

³Wa kavii ni Danieli, maye ni Abikaili ulya ekee nka wa Nabali wa kulya Karmeli. Na wa kararu ni Absalomo mwana wa Maaka mfu wa Tilmai we mangyi ya Geshuri.

⁴Wa kaana ni Adonia mwana wa Hagiti. Na wa karaanu ni Shefatia mwana wa Abitali.

⁵Wa karindaru ni Itreamu wa Elgla nka wa Davidi mmbo vana va Davidi valewonikya Hebron.

⁶Nalyo kyeeri ekyo kya fira ya vandu va Sauli na vandu va Davidi, Abineeri kaona nnduma nnu efo kwa Sauli.

⁷Naasa Sauli eetiri kitonga kyakwe kyevangwaa Rispa mfu wa Aya. Ishbosheti kavesa, “A nkiki elyi kwaanga neefo kwa kitonga kya nde?”

⁸Llyo Abineeri alesukyo nnu mmarero a Ishbosheti, kaamba, “A ndesa mmbo kukusarye mmbo nkeriingya Sauli, shava mwiirundya vandu va Yuda? Kutani kwafika inu mmbo shileva mwiirundya ndoo Sauli na vandu vakwe, na vambuya vakwe, nta nshilekurambikya Davidi-fo. Lyo ulaalu mmbo kukundye ishaamba waaruwo: kyeendi kyeendo ni nka yeu.

⁹Iruva nalyillye Abineeri, neeny shitanye Davidi ekyo Nndumi Iruva alemmbikya kyaasa,

¹⁰nasoke Sauli umangyi nalurwaa kwa Davidi kunu Israeli na Yuda, pookya Dani fika Beer-sheba.”

¹¹Nta Ishboshet nnyaleidima irouwa Abineeri-fo, kamwiiryaa

¹²Nalyo Abineeri karumya Davidi nrumi kulya eekai, kammbia, “Uruka yelu llwavi? Sanga neeny luve kindo kyimwi shikurambikye Israeli woose.”

¹³Davidi kammbia, “Nkisha, shisangaa neewe, lyo kwiifo kindo shikundye mbele ikutereva, nakyo ekyi, ‘Nkushaa ishilollya kulairiani na Mikali mfu wa Sauli-fo.’”

¹⁴Naasa Davidi karuma vandu kwa Ishboshet mwana wa Sauli, nambie, “Shiviirya Mikali we nka wakwa. Mmbo shilerina Vafilisti iyana naambo shimoore.”

¹⁵Naasa llyo Ishboshet aleruma vandu vakandeuta nka yeto kwa mmi wakwe Paltieli we mwana wa Laishi.

¹⁶Nalyo mmi yeu wakwe kansora yoo numa eshiiyaa kandefika Bahurimu. Llyo Abineeri embia, “Naasa, wuya-te!” Nawe kawuya-u!

¹⁷Nalyo Abineeri karera na vamiku va Israeli, kavavia, Llya lya mbee mmbo mweekundye Davidi namushillye.

¹⁸Naasa ulaalu Nndumi Iruva ankunda indo kasauwa Davidi, llya aleamba, “Mmbo nsherumaa nsero wakwa Davidi nandekira vandu vakwa va Israeli maakony a Vafilisti na efo maakony a vakiduva vengyi woose.”

¹⁹Abineeri kavevia na Vabenyaminy kindo ekyo. Kooka-fo keenda Hebron naambo nandekyoongoya Davidi shaasa kilesennya yewo woose alevavia mbony yeto.

²⁰Nawe Abineeri mmbo aleenda eeriani na vandu makumi avii, na Davidi kavavikya sukukuu.

²¹Naasa Abineeri kavia Davidi, “Ra sheende shindekusang'irya vandu va Israeli woose, naambo vashekuvikya kyaasa, kuvashillye woose shaasa nrima wafo ukundye.” Naasa Davidi kairikya, Abieneri keenda eefurye.

²²Nalyo Yoabu na vandu va Davidi vakasha vauka fireny, varye findo fiingyi valeuta-fo, lyo we Abineeri nnyeekee kulya Hebron-fo, kimba Davidi ammutauwa kakweengya na nsia.

²³Llya Yoabu alesha na itorito vakwe kashevio sheelyi Abineeri wa Neli mmbo alefika kwa mangyi Davidi, nawe kansauva nakweengye na ufoo.

²⁴Naasa llyo Yoabu aleenda kwa mangyi kammbia, “Nkyoki ekyi kwatana? Nkiki elyi Abineeri asha kwafo neewe kwanra keenda?

²⁵Yewe nkwiishi Abineeri mwana wa Neri-fo, mmbo alesha ikulemba, na manyi mbony tafo, yaanga lyafo na isomuka lyafo.”

²⁶Llya Yoabu alesomuka alya kwa mangyi kanderuma vandu vanderuuya Abineeri, vakandemkooya alya usokeny lwa Sira, lyo we Davidi nnyalemanya mbony yetifo.

²⁷Abineeri ekiviirwa Hebron Yoabu kwamwiipoo kanrwaa mbai kamfita yoo nnang'ani ya ngiri ya muri, vai sheelyi ambyaa kindo kya kyama. Llya yeni kankapa ifumu lya ndeu kafiiya-u llya yeni. Nawe Yoabu mmbo aletana indo kimaruma kya samu ya Asaheli ulya ekee mwanamaye alewaawa ni Abneri.

²⁸Kyeeri Davidi aleeta mbony yeti kaamba, “Yeny na umangyi lwakwa llutiri mbese kya ekyo-fo, na Nndumi Iruva eeshi, kimaruma kya samu ya Abineeri mwana wa Neri,

²⁹Yoabu nave nndenge we na va mmba yakwe, neefo kwawo kulawiike-fo nndu nndumi alwaa ndwari ya samu-fo, na nndu wa ivave, na nndu mweenda na misengye, na nndu awawaa fireny, na kuvekaafo veelyiwa nshaa.”

³⁰Niindo Yoabu na mwanamaye Abishai valewaa Abineeri mashika llya nawe alewaa Asaheli fireny kulya Gibeon.

³¹Naasa Davidi kavia Yoabu na valya woose ekee nawo, “Randweny masara any muraa makunnya, muiye Abineeri. Naasa mangyi kasora nnying'a ulya,

³²Abineeri kanderikwa kulya Herbon, Nawe mangyi kaffwa na unyanga kya Abineeri alya kifuny, na vandu woose vakaiya.

³³Mangyi kaiya kya Abineeri kaamba, “A mmbo kyava inda Abineeri kafwa sha itondo?”

³⁴Nnyekeemfinge maako-fo, Nta marende-fo. Shaasa nndu awoya veala shia, niindo kileva kyakwe. Na vandu vakeengera imuiya.

³⁵Naasa vakasha vandu naambo valelembye mangyi shoonga nsanyiny ulya. Nawe kalya mboo kaamba, “Dede ya Iruva, nshilyau kindo kyoose-fo, kutani kushiilaa.”

³⁶Na vandu valya vakalollya nkisha-da, shaasa valevesenyo mfilya mangyi ekeetana.

³⁷Llyo vandu va Israeli valemanya nshi mangyi alekunda Abineeri nawaawa-fo.

³⁸Llyo mangyi alevia vandu valya vakwe, “Mwammanya-se sheelyi ni nndu umwi nsongoru kaveva nniini atuulwa kunu Israeli?

³⁹Neeny mmbo shaanguyo mfinya naakwa shaambwa mafura shive mangyi ya Israeli. Na vana yeva va Seruya mmbo vakeeshirovya. Neeto mwiilyamarya Nndumi Iruva nantae kiinani na ulyamari lwakwe.”