Read BIBILLYA Mareiyo Meele a Iruva 2 SAMUELI 5 Bible Online

2 SAMUELI 5 - BIBILLYA Mareiyo Meele a Iruva bible

2 SAMUELI 5

¹Naasa ngyufyari toose ta Israeli tikasora Davidi kulya Hebron tikammbia, “Lola-te, yese mmbo lukee samu imwi neewe.

²Kasha elyo Sauli ekee mangyi yeeru, ni yewe kuletetera Israeli fireny vakaanga neesomuka. Nawe Nndumi Iruva kakuvia, ‘Ni yewe kusheisaa vandu vakwa Israeli kuvashillye.’”

³Niindo vamiku woose va Israeli vakasora mangyi kulya Hebron, nawe karera nawo nisha mbee ya Nndumi Iruva, vakamwambafo mafura nave mangyi ya Israeli.

⁴Davidi nnyetiri myaaka makumi araru llya alepooka ishillya, naasa kashillyan ando a myaaka makumi aana.

⁵Ekee Hebron mmbo aleshillya ando a myaaka mfungare na miiri irindaru, nafo kulya Yerusalemu myaaka makumi araru na iraru kashillya Israeli woose na Yuda.

⁶Nalyo mangyi na vandu vakwe vakarwa na Yerusalemu indekapa Vayebusi va kulya, nawo vakavia Davidi, “Kulammuuta-fo vafu miso na fitongororo nkuvingaafo, veekusarye vai nkuti nalemwa.”

⁷Lyo Davidi kakaba turuve ya Sayuni, nto muri uleva wa Davidi.

⁸Nkonu yeto llyo Davidi aleamba, “Yeto ashekabaa Vayebusi nasore shia yeyo ya mura nandekaba na vafu miso na fitongororo, mashika shivasuuye.” Nkyo vengyi valeamba, “Nnyashidimaa yaangafo-fo mashika a vafu miso na fitongororo.”

⁹Nalyo Davidi kakaa efo turuven yeyo, kaivaanga, “Muri wa Davidi.” Katana muri yeto nisha kuuka millo.

¹⁰Davidi keengera itira nnduma mashika llya Nndumi Iruva, Iruva muni matorito alekaa nawe.

¹¹Naasa Hiramu ekee mangyi ya Tiro karuma vandu vakwe kwa Davidi, kanrikya firi na veetana mmba na veepasha firi, vakeekya Davidi itana mmba.

¹²Davidi kamanya dede sheelyi Nndumi Iruva mmbo anta nye nave mangyi ya Israeli, na umangyi lwakwe kalunangisa tapu kimaruma kya Israeli.

¹³Naasa Davidi llya aleenda kulya Yerusalemu keengera yoora vaka vengyi, na vana vakwe vakeengereka vakyumi na va kyika.

¹⁴Na marina a vana yewo valeonikya kulya Yerusalemu, ambuka kulya Hebron: Shamua, Shobabu na Natan na Sulemani,

¹⁵Ibuhari, na Elishua, na Nefegi na Yafia,

¹⁶na Elishama, Eliada na Elifeleti.

¹⁷Na kyeeri Vafilisti valeeta Davidi ammbwa mafura nave mangyi ya Israeli, woose vakarwa vanderuuya Davidi. Nawe Davidi ekimanya indo kasoka na kulya turuveny.

¹⁸Vafilisti nawo vakasoka naambo vandekaa kwaasha kwaasha kulya imungony lya Varefai.

¹⁹Llyo Davidi alevesa Nndumi Iruva, “Ale Nndumi Iruva, shandekabana nawo? Kukundye ivavika maakony akwa?” Nawe Nndumi Iruva kammbia, “Yee saama vasore, mashika yeny nshevavikaa maakony afo.”

²⁰Davidi kandefika Baal-perasimu kakapanya-fo na Vafilisti, kaamba, “Nndumi Iruva mmbo asheengye vakiduva vakwa veengi sha mura washa.” Nkyo kimaruma alya kavaangau Baal-perasimu.

²¹Naasa Vafilisti vakaretya-u mafwanu awo na Davidi na vandu vakwe vakaafwafwala.

²²Vafilisti vakarwa lya kavii imungony yelyo lya Varefai.

²³Na llya Davidi alevesa Nndumi Iruva lyingi, kammbia, “Kulavasore-fo, lengetya efo numa yaawo kundevakapa kuuka alya miriny ilya ya madala.

²⁴Na kyeeri kusheetaa kiiyo kyawo kirwaa neefo miriny ya madala, llyo kushekaaryaa mmwasi, mashika nkyo kyeeri Nndumi Iruva akundye ikaba Vafilisti.”

²⁵Nawe Davidi katana indo shaasa Nndumi Iruva alembavasya, kakaba Vafilisti apookya Geba kandefika Gezeri.