Read BIBILLYA Mareiyo Meele a Iruva 1 VAMANGYI 1 Bible Online

1 VAMANGYI 1 - BIBILLYA Mareiyo Meele a Iruva bible

1 VAMANGYI 1

¹Mangyi Davidi ulaalu ammba nndu nkuu, naakwa nyeli mashinga akwe alensikya na masullya indi keengera iita mbeo.

²Naasa vandu vakwe vakammbia, “Mangyi mmbe, irisha lundekuruyya mwana wa kyeny ashekaa na yewe neekuvavara alale yoo uvariiny lwafo naambo kukooye iita nrike.”

³Kuruuywa mwana wa kyika Israeli shoose, naakwa kulya Shuvem vakandekooya-fo mwana nsha wa kyika avangwaa Abishaki nawo vakamweengye mangyi.

⁴Mwana yeu mmbo ekee mwana nsha nnu, kakaa na mangyi na immbawara, lyo mangyi nyelelala nawe-fo.

⁵Kyeeri ekyi Adoniya mwana wa Davidi na Hagithi, kapooka ikushoba na yaamba we mmbe ashevaa mangyi, kapooka ikudeesya na mitika ishomuwa ni Furasi, na vengyi makumi araanu, vesongoyaa mbee yakwe amwi na ifina, na indumisha.

⁶Indi ndeye Davidi nyalensakira nta imbesa nkyikyi elyi eefo etanaa indo-fo. Kya dede Adonia etiri nndu wa yuumba na ekee fwana shisha nnu, nawe mmbwe ekee mwanawo wa Absalomo.

⁷Adoniya kaumburana na Yoabu mwana wa Seruya amwi na Abiatari vakallatya Sadoki na vakakuluunga nawe.

⁸Indi Nkohani nkisuku Nathan, Shimei, Rei amwi na mashiinga a Davidi wo mmbekulunga na Adoniya-fo.

⁹Nkonu umwi Adoniya kaniingya kiraso kyekora kikee na moonri, ng'umbe amwi na ngashe eti shivanri ando kuvangwaa iwe lya shoka, kufii na usoka lwa Enrongel. Kavavaanga efo kirasony, vasero woose va mangyi Davidi, na taari ya Yuda.

¹⁰Indi-lyo nalakunde isanda-u, mwanamaye we Solomon, ao nkisuku Nathan, ao Beneya, nta mashinga a mangyi.

¹¹Naasa Natani keenda kwa Bethsheba, maye wa Solomon, kammbia kwammanya-se sheelyi Adoniya mwana wa Haggith akwaalwa mangyi we muni nta kulore mangyi eshi!

¹²Kwakooya kukundye ikira muu wafo na wa mwana wafo Solomon aranya kindo shiifo shikuvyia.

¹³Enda uviny kwa mangyi Davidi kundembia, ale mangyi Nndumi wakwa nshi yewe kweshilyiiya mboo, kwishaamba, “Mwana wakwa Solomon mmbwe ashekaya kiri kya Umangyiando afo? A-mmbo kyava inda lualu elyi Adoniya ankaya kiri kya umangyi?”

¹⁴“Nelyi kwiifo kureraa na mangyi na yeny shiveyaanga swany na ivangisa marero yoo afo mbee ya mangyi.”

¹⁵Naasa Bethsheba kandelolya mangyi kulya kirieny kyakwe kyelala. Mangyi mmikwa deny, na Abishaki mwana ulya wa kyika eefo nawe embavaraa.

¹⁶Bethsheba kafiiryandi mbee ya mangyi, nawe mangyi kammbesa. “Nkyokyi kukundye?”

¹⁷Bethsheba kammbia, “Nndumi wakwa, yeny ishinga lyafo, kwenshilyiiya mboo mmbe ya Nndumi Iruva wafo kwaamba, mwana wakwa Solomoni mmbwe ashiwarya kiri kyakwa kya Umangyi.

¹⁸Indi lualu Adoniya mmbe atiri uruka neewe nta kulaishi.

¹⁹Anniingya kiraso kya ikora, ng'umbe shiingyi, moori na ngashe shivanri kavaanga-u vana va kimangyi woose, Nkonu Abiatari na Yoabu nniini wa vasikari indi nalakunde ivaanga-u Solomon ishinga lyafo.

²⁰Na ulaalu mangyi nndumi wakwa, vana va Israeli woose mmbo vakuverye yewe naambo kuidimi ivavyia eto ashekaya kiri kyafo kya umangyi.

²¹Kulantana indo kyeeri ekyi kuiiyo na muu, numa yeny na mwana wakwa Solomon mmbo lushevaangwa vakumbi.”

²²Kyeeri Bethsheba eefo areraa na mangyi, Nkisuku Natani nawe kaveyaanga.

²³Vandu nawo vakavia mangyi, “Nikisuku Natani akee yaandi.” Nawe ekifika alya mangyi ekai kafiirya-ndi kifulu-fulu mbee yakwe.

²⁴Naasa Natani kaamba, ale mangyi nndumi wakwa mmbo kwaamba Adoniya mmbwe ashevaa mangyi ando afo?

²⁵Nkonu wa inu mmbo anniingya kiraso kya ikora kya ng'umbe shiingyi, moonri na ngashe shivanri. Kavaanga vana vafo woose, Yoabu, nniini wa Vaisraeli, amwi na Nkohani Abiatari, na lualu indi mmbo veefo veenaa na ifina veshambaa Adonia mmbwe mangyi.

²⁶Indi yeny alakunde ishivaanga-u, nta Sadoki mwilosha, Beneya na Solomon.

²⁷A ndesa ni yewe Mangyi mmbe kuleniingya muumuu wa itana indo kulaifo nta ishinga lyafo lyimwi lyiishi mmbi yeto akeewarya umangyi lwafo?

²⁸Mangyi Davidi kaamba, “shivaangyeny Bathsheba nawe keenda isalala yo mbee ya mangyi.

²⁹Naasa mangyi kalya mboo kaamba Iruva muni finya, Iruva eefo na muu, eto aleshikira muu wakwa na ngatara shiingyi.

³⁰Ndesa shekulyiyaa mboo mbee ya Iruva muni finya, Iruva wa Israeli shaamba mwana wafo Solomon mmbwe ashekayaa kiri kyakwa kya umangyi, mmbwe ashevaa mangyi andou akwa.”

³¹Bethsheba kafiirya-ndi kifulu-fulu kaamba, “Nndumi akuniinge finya llung'anu.”

³²Naasa mangyi Davidi kavaanga Sadoki, Natanina Beneya.

³³Vekyisha kavavia “Ibweeny varundi vakwa vamiku amwi na mwana vakwa Solomon, nsaamiseny nshunguny na mumwiimye muundera kulya usakeny llwa Kihoni.

³⁴Naambo Nathani na Sadoki vandemwambya-fo mafura nawe Mangyi wa Israeli. Endekapeny maranda mwiishiimba ‘Mangyi Solomon nashillye llung'anu.’

³⁵Muvuye nawe mumfite yaandi naambo nashewarya umangyi-lwakwa. Mmbwe shilensauwa asheshillya Israeli na Yuda.”

³⁶Beneya karouwa kaamba, “Niindo kitanyika,” nawe Nndumi Iruva wafo nakivikye ngarami.

³⁷Ndesa Nndumi alekusongoya yewe mangyi kyiveeva indo kwa Solomon. Navikywa mbora efo ushilyiny lwakwe.

³⁸Naasa Sadoki nkohani, nkisuku Nathani na Beneya mwana wa Yekoyada, na Vakarethi na Vapelethi woose vakamwiimya kufika usokeny lwa Gihoni esaamye frasi ya mangyi Davidi we ndeye.

³⁹Nawe nkohani Sadoki kandeepoo mafura kulya yeemeny kaletya Solomon nave mangyi. Vandu woose vakaka mbembe veshaamba Solomon mmbwe mangyi.

⁴⁰Naasa vandu woose vakallatya numa veshimbaa na ifina vetiri ifura inniini nnu.

⁴¹Naasa Adonia ando amwi na veny valya veefo nawe vakeeta kyoorongye kisiiyaa. Yoabu ekiita mbembe tiikapoo, kavesa. “A kyoorongye ekyo efo muriny mmbo kyaambakyi?”

⁴²Eefo areraa indo, ate Yonathani mwana wa nkohani Abiatari nawe kaveyaanga;nawe Adonia kammbia, “Anga mmba, mashika yewe mmbo kukee nndu nsha, kukelweengye mbony shisha,”

⁴³Llyo Yonathani alerouwa Adonia kammbia, “Oode,” ni kimaruma mangyi Davidi ammbika Solomon kitiminy nave mangyi;

⁴⁴Nawe mangyi kasauwa nkohani Sadoki, nkisuku Nathani, Beneya mwana wa Yohayada na vakareth, na Vapelethi nawo vakamwiimya asaamyi frasi ya mangyi.

⁴⁵Nalyo nkohani Sadoki na nkisuku Nathani vakamwaamba mafura nave mangyi kulya Gihoni ulaalu mfo kundo wooka vefuraa na yiimba nkyo kimaruma mwiitye kyoorongye.

⁴⁶Ulaalu Solomon mmbwe Mangyi.

⁴⁷Kilanya mmwasi ngyama ta mangyi ando amwi na mashinga akwe, vakeenda kwa mangyi Davidi vakafura amwi nawe. Vakankundya mesha we mangyi Solomon, Iruva ansongoye na imwiidimisya kilanya mmwasi ngota ndeye we Davidi. Mangyi Davidi kafiirya-ndi yoo kitareny kyakwe kaoshora Iruva.

⁴⁸Katereva, kaamba “Nndumi Iruva wa Israeli narumishwa, eto aleidimisya mwana yeu wakwa katira umangyi ando akwa, amwi na ishiidimisya ifura elyo.”

⁴⁹Naasa veny valya va Adonia vakaereeya nnu, vakanyanyaka wo nndu na shia yakwe.

⁵⁰Nawe Adonia kiimba aleereya mangyi Solomon, karishya ulaleny lwa Nndumi Iruva, kandekutira na ndumba ta kitara kyeerasya.

⁵¹Mangyi Solomon keeta mbony, sheelyi Adonia anrishya ulaleny lwa Nndumi Iruva, atiri ndumba ta kitara kya irasya eshaamba, “Nshisomuka yaandi kulare mangyi Solomon ashilyisya mboo sheelyi nyashiwaa-fo.”

⁵²Mangyi Solomon. Kaamba, “Kamba nndu nsaari nkwiifo kindo kipaana-fo. Lyo shalolya-fo uravi loose ifwa nkuti nafwe,”

⁵³Naasa mangyi Solomon kaamba, “Navaangywa Adonia ooka kulya ulaleny. Adonia kasha kafiiryandi mbee ya mangyi, mangyi kammbia, ‘Kweengye kyeny.’”