Read BIBILLYA Mareiyo Meele a Iruva 1 VAMANGYI 11 Bible Online

1 VAMANGYI 11 - BIBILLYA Mareiyo Meele a Iruva bible

1 VAMANGYI 11

¹Mangyi Solmoni kashekunda vaka veny veengyi, kashesanda na vefu va Farao; vaka va Moabi na va Vaamoni, na va Vaedoni, na va Vasidoni na va Vahiti;

²na va masanga, valya Nndumi Iruva alevavasa vana va Israeli, kavavia, Mulaange kwawo, nta wo valaange kwan-fo, mashika ni kya dede vashemwiinduta mirima yaan ishelatya maruva awo. Solomoni kashekutira nawo kya ivakunda.

³Katira vaka mayana mfungare vefu va kimangyi, na vaka va shia mayana araru; vaka ewo vakwe vakashemwaaluta nrima.

⁴Solomoni ekiva nkuu, vaka vakwe vakamwaaluta nrima, nawe kalatya maruva engyi nrima wakwe ukatura usumanu mbee ya Nndumi Iruva, Iruva wakwe, kilasha-deny na nrima wa Davidi we ndeye.

⁵Kimmba Solomoni aleshelatya Ashitoreti iruva nka wa Vasidoni na Milkomi, kindo Vaamoni vesuuye.

⁶Solomoni kalyamarya Nndumi Iruva, nta nalekunde ilatya Nndumi Iruva kya usumanu sha ndeye Davidi.

⁷Solomoni katannya Kemoshi usumanu lwa Vamoabi ando kwa uwe, kulya ifumbuny lyisumannyi na Yerusalemu, na Moleki usumanu lwa vana va Amoni.

⁸Ni indo-da aleveetannya vaka vakwe va ngyuruka ta veny ewo verasya maruva awongo.

⁹Naasa Nndumi Iruva kasua kimaruma kya elyi Solomoni alealashika nrima nawe kaisityo Nndumi Iruva, we Iruva wa Israaeli eto alensheya kavii sele.

¹⁰Emmbavavasa kya mbony eyo imwi tupu, alashelatya maruva engyi indi-we kalema fushu ilatya ndesa Nndumi Iruva alemmbavasa.

¹¹Kweekyo Nndumi Iruva kavia Solomooni, Kimmba kwantana indo nta kulakunde ilatya mavavaso akwa yoo shilekuikima ni kya dede kuti shikusoke umangyi shindeniinga ishinga lyafo.

¹²Indi kimaruma kya ndeye afo Davidi nshitana indo ulaalu-fo indilyo nshesolaa mwana wafo shiluute efo maakony akwe.

¹³Indilyo nshishesokaa-se deny-fo, mmbo shishenreeyaa muri umwi kimaruma kya Davidi ishinga lyakwa na Yerusalemu yeto shileusauwa.

¹⁴Llyo nndumi Iruva kandesaleesa nkiduva ekee mmbwe Hadadi Mwedoni awonikye mmba ya mangyi ya Edomu.

¹⁵Kyeeri Davidi ekee kulya Edomu nawe Yoabu nniini wa vasikari kandesaama nafo naambo nandekooya irika valya vemmbwaawa kandekapa valya woose alewakooya-fo vekee ni Vomi va Edomu.

¹⁶(Mashika mmbo Yoabu alekaa kulya ando a miiri irindaru we na Israeli kutani amaa iwaa womi woose vekee kulya Edomu);

¹⁷Hadadi ulya we na Vaedomi maata karisha nandefika kulya Misri aryani na varundi va ndeyeakwe; nawe ekee indo mwana n-du.

¹⁸Vakakwipoo Midiani vakafika Parani veryani na vandu vakandefika kwa Farao mangyi ya Misri eto alenniinga mmba na nrema kundo kwerema shoonga.

¹⁹Hadadi kang'ana, kasenya nnu mison a mangyi Farao kutani amworia varisinda wakwe we Tapenesi ulya ekee Malkia.

²⁰Nawe varasinda ulya wa Tapenesi kammbonnya Gembathi mwana Tapenesi kang'anisya mwana eto efo kyen kwa mangyi Faro mwana eto kanga'na ando amwi na vana va mangyi Faro.

²¹Hadadi ekiita kulya Misri sheelyi Davidi na vandeye valelala, na Yoabu we nniini wa vaskari alefwa Hadadi kavia mangyi Farao, Shiniinga muuumu sheende shiwuye urukeny lwakwa shimuni.

²²Farao kammbia a kyokyi kwatura kunu kwakwa, kutani kwakunda iwuya urukeny lwafo? Karouwa oode indi-lyo shiniinga muumu-da.

²³Iruva kamwiipoiyo nkiduva ungyi Rezoni mwana wa Eliada, ulya erisha nsongoru wakwe Hadadi mangyi ya Soba.

²⁴Nawe kaummbya vandu kava nsongoru waawo, naasa mangyi Davidi eshekiwaawa vandu valya va Soba, vakeenda Damesiki vakandekaa neeshillya-fo.

²⁵Nawe kava nkiduva wa Israeli fyeeri fyoose fya mangyi Solomoni. Mmwasi ya fyoose nsindara wa Hadadi ni kiduva na Israeli kashillya Shamu,

²⁶Yeroboamu mwana wa Nebati, Mwefraim wa Serua, Ishinga lya Sulemani, ulya maaye evangwaa Seerua, nka emfiiyo ni mmi, nawe kaipoiyo mangyi maako kyenkapa.

²⁷Ekyi nkyo kimaruma kyeipoiyo mangyi woko. Sulemani katana millo, kafinga kulya muriny va vandeeye we Davidi wewundukye.

²⁸Yerobuamu ekee nndu ntakusu atiri wiidimi uniini na Sulemani kalollya indo kammbika uwe ya mashora a mmba shoose ya Yosefu.

²⁹Kyeeri kilya Yeroboamu aleuka Yersalemu ekee shia nnang'ani kakwaanannya na nkisuku Ahiya Mshiloni, nawe Ahiya eree soori yakwe shiiya, vo veni kulaiyo nndu ungyi.

³⁰Ahiya katira soori ilya yakwe shiiya kairanndwa firami ikumi na fivii.

³¹Kavia Yeroboamu, “Nga yewe warya firami efi ikumi, mashika Nndumi Iruva, Iruva wa Israelli aamba indi mmbo nshesoka Sulemani umangyi efo maakony akwe shishekuninga yewe mmba ikumi

³²(Indi we shinniinge mmba imwi ive ya Davidi ishinga lyakwa na Yerusalemu muri nsauwe nnang'ani ya miri myoose ya mmba ta Israeli)

³³Ni mashika elyi valeshira yeny vakainndya Ashitoreti, iruva nka wa vasidoni, na Kamoshi, iruva wa Vamoambi na Milkomi, iruva wa vana va Amoni nta valakunde ilatya shia takwa, itana masha misony akwa, itira mavavaso akwa na mirumbuye yakwa, sha Davidi we ndeye.

³⁴Indilyo nshinsoka umangyi loose-fo mmbo nshemwaalwa nave nniini mikonu ya muu wakwe moose kimaruma kya Davidi nndundi wakwa llya aleindya mavavaso na mirumbuye yakwa.

³⁵Lyo nshesoka nsero wakwe umangyi, nalyo nshekuniinga yewe mmba ikumi

³⁶Na yeny nsheniinga mwana yeto wakwe mmba imwi, naambo Davidi nndundi wakwa nashemika mbee yakwe mikonu myoose efo Yerusalemu ulya shileusauwa kya isaleesa-fo irina lyakwa.

³⁷Na yeny nshekwipoo yewe kushillye ndesa nrima wafo ukundye mmbo kushevaa mangyi uwe ya Israeli.

³⁸Kwakooya kweeta na yaaranya shaasa shiifo shikuvavasyaa, kwawetana fya usumanu mbee yakwa kwaveiinndya mavavaso akwa sha Davidi nndundi wakwa, naasan mbo nshekaa ando amwi na yewe shikutannye mmba ya toki, sha llya lletannya Davidi llyoony nshekuniingaa Israeli.

³⁹Na kwa kimaruma ekyi nshesisaa vana va Davidi, kwa kyeeri kifii.

⁴⁰Naasa Sulemani kukunda iwaa Yeroboamu, indu-we Yeroboamu karishya Misri kwa Shishaki Mangyi wa Misri, kandekaa kulya Misri kutani ufu lwa Sulemani.”

⁴¹Na filya filesaa-fo fya Sulemani na mashora akwe moose aletana na urango lwakwe loose; A-ndesa-Nshi yoondo akee mareiye efo kyitabuny kya mbony ta Sulemani?

⁴²Na mikonu Sulemani aleshillya kulya Yerusalemu uwe ya Israeli yekee ni myaaka makumi aana.

⁴³Nawe Sulemani kashefwa karikwa kulya muriny wa Davidi we ndeye. Nawe Rehoboam mwana wa Sulemani kasheshillya ando akwe.