Read BIBILLYA Mareiyo Meele a Iruva 1 VAMANGYI 12 Bible Online

1 VAMANGYI 12 - BIBILLYA Mareiyo Meele a Iruva bible

1 VAMANGYI 12

¹Rehoboamu keenda Shekemu, mashika Vaisraeli woose mfo kundo vemmeenda naambo vandemwaallwa mangyi.

²Yeroboamu mwana ulya wa Nebati ekiita mbony eti, (mashika ni kulya Misri ekai kundo alerishya kimaruma kya mangyi Sulemani. Yeroboamu kakaa kulya Misri

³Vakaruma vandu vandemmbaanga) naasa Yeroboamu na vandu vakwe woose va Israeli vakeenda indevia Rehoboamu vakaamba.

⁴Nndeyaafo mmbwe aleallwa irio lyeru lyikava iroo, naasa ulaalu lwaangurye ushinga na irio llya iniini lulerikwa ni ndeyaafo neese lukurunndye

⁵Kavavia, Endeny kyany ando a mikonu iraru, naasa muvuye lyingyi. Vandu vakeenda kyawo.

⁶Mangyi Rehoboamu kakunda ikwaanannya na vamiku valya verundaa na Solomoni we ndeakwe llya eefo na muu, kaamba, “A mbony-ki mukeshiniinga naambo shirouwe vandu yeva?”

⁷Vakammbia vakaamba, “Kwammirikya iva ndundi wa vandu eva inu, na ivarunndya, kwiivarouwa na ivaniinga marero mesha, naasa mmbo vashevaa varundi vafo kyeeri kyoose.”

⁸Indi we kalema yaaranya filya alevio ni vaoroye vandu vakuu, kaaranya filya alevio ni vaoroye vakoo valya aleng'ana nawo; na isalala mbee yakwe.

⁹Kavavia, a ndesa ni makusaro-ki mukeshiniinga naambo luidimii irouwa vandu eva valerera na yeny vakaamba, lwaangurye irio elyi lulerikwa ni ndeyaafo?

¹⁰Nalyo vakoo valya vekee ando amwi nawe vakammbia veshambaa indi, vandu valya valekuvia, veshaamba, ndeyeafo mmbwe aleallwa irio lyeru likava iroo, lyo yewe lweekye lyive yaangu, kuvavie indi; nni wakwa wa nshengela ni mmbongye ukailanya kisi kya ndeyeakwa.

¹¹Naasany, ndesa llya ndeyeakwa alemurika irio iroo yeny mmbo shilyengeraa lyive iroo mmwasi, we mmbwe alemukapa na ngova yeny mmbo shimukapa na nguluva.

¹²Naasa Yeroboamu nkonu wa kararu na vandu vakwe vakandefika kwa Yehoboamu, ndesa mangyi ambavia, kaamba shiwiieny nkonu wa kararu.

¹³Mangyi karouwa vandu valya kwa unyaasi; nalakitani shaasa llya vamiku valya vemmbya

¹⁴kawarouwa elatyaa makusaro alya aleniingwa ni vakoo valya kaamba, ndeyeakwa mmbwe alemurika irio iroo yeny mmbo shilyengeraa lyive iroo mmwasi, we mmbwe alemukapa na ngova indi yeny mmbo shimukapa na nguluva.

¹⁵Naasa mangyi nnyalekyaarannya vandu valya-fo, mashika mbony yei mmbo yuukye kwa Nndumi Iruva naambo irero lya Nndumi Iruva lyikooye yiinukya llya alevia Yeroboamu mwanaa wa Nebati kwa kana kya Ahiya Mshiloni.

¹⁶Naasa Israeli woose vekilolya sheelyi mangyi nnyalekivaarannya, naasa vandu ewo vakarouwa mangyi vakammbia a, “A mmbwaavi-ki lutiri kunu kwa Davidi? Nta llutiri ding'u efo kwa mwana wa Yese-fo” Naasa! Eni Israelii endeny yeemeny kwany, Ee Davidi ulaalu kunle mmba yafo kumuni. Nalyo Israeli vakeenda kyao yeemeny kwawo.

¹⁷Indi lyo Rehoboamu kashillya vana va Israeli valya vekee kulya miriny ya Yuda.

¹⁸Nalyo mangyi Rehoboamu kakamara Adoramu ulya ekee mwishilya Shokoa, nawo vaisraeli woose vakankapa na mawe kutani afwa. Mangyi Rehoboamu kasaama ikari karishya Yerusalemu.

¹⁹Kupookya yoondo Israeli vakatiriana kiduva na mmba ya Davidi fika inu.

²⁰Naasa vekiita sheelyi Yeroboamu ammbuya vakanrumya vandu nashe ikwaannya vakamwaalwa mangyi ya ishilya Israeli, nta kulalollyo-fo nndu alekaa kyaalu kya mmba ya Davidi kuutafo mmba ya Yuda sheni.

²¹Nalyo Rehoboamu ekifika Yerusalemu kasangirya woose va mmba ya Yuda na va Ufyari lwa Benyaminy, na vandu va fira vasauwe fiku iyana na makumi nyanya; naambo vashekapana fira na vana va Israeli, naambo vasheviirya umangyi Rehoboamu, mwana wa Solomoni.

²²Indi irero lya Iruva lyikasheya Shemaya nndu wa Iruva lyishambaa

²³Via Rehoboamu mwana wa Solomoni, mangyi ya Yuda na va mmba shoose ya Yuda, na Benyamiini, na vandu valya valesaau kwaambe,

²⁴Nndumi Iruva aamba indi; Mulaende, nta mulakapane na Israeli vana va mau-fo, wuyeny wo nndu kyeny kwakwe, mashika mbony yeny ni kwakwa yuukye. Naasa vakaarannya irero lya Nndumi Iruva, vakawuya vakeenda shaasa Nndumi Iruva aleamba.

²⁵Llyo Yeroboamu aletana muri Shekemu kulya ifumbuny lya Efuraimu kandekaa-fo. Kandeuka kulya kashetana Penueli.

²⁶Yeroboamu kaamba efo nriminy, ulaalu umangyi lushewuyaa efo mmba ya Davidi.

²⁷Kwakooya vandu eva vasaama Yerusalemu indeniingyafo kiraso efo mmba ya Nndumi Iruva, llyo mirima yaawo ishevuyyaa mangyi waawo we Yeroboamu mangyi ya Yuda nawo vasheshiwaa yeny na iwuyana na mangyi waawo Yeroboamu mangyi ya Yuda.

²⁸Naasa mangyi karumbwa shila kasongosya ng'umbe ivii ta arera, kavia vandu loleny, ni kindo kyuumu deny kwany isaama mundefika kulya Yerusalemu, elyi llyo iruva lyany lyilemusaamisa muuka kulya urukeny lwa Misri.

²⁹Imwi kaivika kulya Betheli, na ingyi kulya Dani.

³⁰Kindo ekyi kyikava ulyamari, mashika vandu mmbo valeenda iindya ng'umbe tilya kufike kulya Dani.

³¹Nalyo kashetena mmba ando kwa uuwe kashevika-fo vakohani wooka mmba ya kikohani Levi.

³²Yeroboamu kaamba ive-fo sukukuu mwiiri wa nyanya kwikee nkonu ikumi na karaanu, katana indo kulya Yuda na kulya Betheli koose kandeutya-fo kiraso kya ng'umbe tilya alesongosya; kashevikafo na vakohani valya ando kwa uuwe alya unsongosya.

³³Kasheniingya kiraso uwe ya kitara kya irasya kilya ensongosya kulya Betheli kwikee nkonu ikumi na karaanu mwiiri wa nyanya, nkonu enrummbwa we muni efo makusarony akwe; kavia vana va Israeli vaindye nkonu eto, ekimaa itana indo kandesaama alya ando kweerasya kakorya-u ufumba.