Read BIBILLYA Mareiyo Meele a Iruva 1 VAMANGYI 17 Bible Online

1 VAMANGYI 17 - BIBILLYA Mareiyo Meele a Iruva bible

1 VAMANGYI 17

¹Naasa Elia Mtibshi, wa veny va Giliard, kavia Ahabu, Kwa irina lya Nndumi Iruva, Iruva wa Israeli, yeto shiifo shimwiindyaa, shasalala mbee yakwe mmbo shakuvia, nkushekaa kuve-fo laura ao m-mbwa kyeeri ekyi kyoose kulare shaamba-fo.

²Irero lya Nndumi Iruva, lyikasheya elia lyikaamba ,

³Kwiipo kunu kulle na taari ya ngama kundekusuruma-fo, kufii na usoka lwa Kerithi kufii na Yordan.

⁴Mmbo kushenaa mura wa usoka elo, nsherumaa mangola ashekufurukannya-fo.

⁵Naasa keenda katana ndesa Nndumi Iruva alemmbia, kandeka kufii na usoka lwa kerithi lukee kufii na Yordan.

⁶Mangola kava amweengyee nkate na nyama ngama, na nkate na nyama nkwaany kana mura wa usoka lulya.

⁷Kukafika mikonu usoka lulya lukaumya mashika uruka llwa llweniingwa m-mbwa-fo.

⁸Irero lya Nndumi Iruva lyikansheya, elia likambya,

⁹Kwipoo kweende Serepta muri wa Sidoni kundekaa-fo, mashika shandeesya-fo nka wa ding'u nawe ashekulelala.

¹⁰Naasa, kakwipoo keendaa Serepta, naasa ekifika kulya muriny ulya, apaa, akau nka wa ding'u afo asana ngwi, kammbaanga kammbia, shakutereva, sheengye na bakuri yei yafo mura wa ina.

¹¹Elyi afo asheendaa kammbaanga-se, kammbia, shakutereva kusheengye kyenga kya nkate.

¹²Nawe, kammbia, Kwa irina lya Nndumi Iruva, Iruva wakwa eefo na muu, nshitiri nkate-fo, kuuta woi lwa nswa muunnywa efo nakoriny, na mafura mannywa na shupa, nto ngwi yeti ivii shiifo shisanaa yaandi shindekora shilye yeny na mwana yeu wakwa naasa lufwe.

¹³Elia kammbia, Kulaereye-fo, endetana ndesa kwaamba; indilyo kushisongosye mbele nkate n-du kushengye, llyo kwiidimi isongosya wafo na mwana.

¹⁴Mashika Nndumi Iruva, Iruva wa Israeli; aamba indi, Nakori ilya ya nswa nnyishaangwaa-fo, shupa ilya ya mafura nnyisyaa-fo, kutani Nndumi Iruva ende m-mbwa lyingyi.

¹⁵Naasa katana ndesa alevyo ni Elia, we muni, na Elia, na mmba yakwe vakalya mikonu miingyi.

¹⁶Nayo nakori ilya ya nswa nnyaangwa-fo, nta shupa ilya ya mafura nnyesia-fo, nalyo irero lya Nndumi Iruva lyikainukya shaasa lyilererwa ni Elia.

¹⁷Naasa numa ya vayo, mwana wakwe nka ulya, nka wa mmba ilya kalwaa ndwari ikanrovya kutani afwa.

¹⁸Nka ulya kavia Elia, nkyokyi kutiri na yeny yewe nndu wa Iruva? A mmbo kulesha kwakwa, naambo ulyamari lwakwa lukummbuwo na ishiwaiya mwana wakwa?

¹⁹Kammbia, shiniinga mwana eto wafo. Kammbwarya mbafuny yakwe, kansaamisa uwe kirieny kyakwe kamwaara yoo kitaren kyakwe.

²⁰Katereva Nndumi Iruva kaamba, Woi Nndumi Iruva, Iruva wakwa, a kyiki kutannyi nka yeu kivave indi. Kutani kwambwaiya mwana wakwe?

²¹Naasa kakoorwa yoo uwe mwanakararu, katereva Nndumi Iruva, kaamba, Woi Nndumi Iruva, Iruva wakwa, shakutereva kuviirye mwana yeu muu lyingyi.

²²Nndumi Iruva kaarannya unyanga lwa Elia, mwana kawiiyose mmuu karuka

²³Elia kawarya mwana kamoolota si amuuta kulya kai kamuniingya maaye, Elia kaamba, lola, mwana wafo eefo na muu.

²⁴Nka ulya kavia Elia, ulaalu shammanya yewe mbwe nndu wa Iruva, na Irero lya Nndumi Iruva kaniny kafo ni lya dede